CAWN DINGMI 35
A Ṭhami Biakhiahnak Tuah Khawh Ning
Kan dihlak in biakhiahnak kan tuah cio. Mah kan biakhiahnak tampi nih kanmah siseh Jehovah he kan i pehtlaihnak ah siseh ṭhatnak asiloah ṭhatlonak a chuahter khawh. Tahchunhnak ah, khoika ah dah kan um lai, kan herhmi tangka zeitindah kan hmuh lai asiloah innchunghawi kan ngei lai maw, ngei lai lo timi kong he aa tlaiin biakhiahnak kan tuah a hau men lai. A ṭhami biakhiahnak kan tuah tikah a nuammi nunnak kan ngei kho i Jehovah lung zong kan lawmhter khawh.
1. A ṭhami biakhiahnak tuah awkah Baibal kha zeitindah na hman khawh?
Biakhiahnak na tuah hlanah Jehovah bawmhnak hmuh awkah thlacam law mah kong he aa tlaiin Jehovah nih zeitindah a hmuh ti kha hngalh awkah Baibal kha hlathlai. (Phungthlukbia 2:3-6 rel.) Thil sining cheukhat ah cun Jehovah nih a fiangmi nawlbia a kan pek. Cucaah mah nawlbia ngaih dingin biakhiahnak na tuahmi cu na tuah khawhmi lakah a ṭha bikmi thimnak a si.
Asinain Baibal ah zeidah tuah awk a simi timi kong he aa tlaiin a fiangmi nawlbia a um lo ah tah zeitin? Jehovah nih lam aan hruai peng lai i na “zulh awk hnga lam” kha aan hmuhsak lai. (Isaiah 48:17) Zeitindah? Lam aan hruai khomi phunglam hna kha kawl. Baibal phunglam hna cu Pathian ruahnak le hmuhnak a langhtermi a hrampi biatak an si. Baibal chung i a kong pakhat kan rel tikah mah he aa tlaiin Pathian nih zeitindah a ruah ti kha kan hngalh tawn. Jehovah ruahnak hna kha kan hngalh tikah a lung a lawmhtermi biakhiahnak hna kha kan tuah khawh.
2. Biakhiahnak na tuah hlanah zei kong hna dah na ruah awk a si?
Baibal nih hitin a ti: “Mifim nih cun a lamh ding kha ṭha tein a zoh.” (Phungthlukbia 14:15) A sullam cu biakhiahnak kan tuah hlanah kan i thimmi kong ruah awkah a caan kan pek a hau tinak a si. Naa thimmi pakhat cio kong he aa tlaiin hitin i hal: ‘Zei Baibal phunglam he dah aa pehtlaih? Mah kaa thimmi nih zeitindah a ka umter lai? Ka biakhiahnak nih midang kha zeitindah a hnorsuan hna lai? A biapi bikmi cu ka biakhiahnak nih Jehovah lung a lawmhter lai maw?’—Deuteronomi 32:29.
Jehovah cu a ṭha le a ṭhalo kong he aa tlaiin chimnak nawl a ngei. A nawlbia le a phunglam kha ṭha tein kan hngalh i mah kha zulh dingin biakhiahnak kan tuah tikah kan chiaṭha thleidannak lungthin kan cawnpiakmi a si. Chiaṭha thleidannak lungthin timi cu thil pakhat kong he aa tlaiin a hmaan, hmaan lo a kan hngalhtertu kha a si. (Rom 2:14, 15) Cucaah ṭha tein cawnpiakmi chiaṭha thleidannak lungthin nih a ṭhami biakhiahnak tuah awkah a kan bawmh.
TAM DEUH IN HLATHLAI
Biakhiahnak tuah awkah Baibal phunglam le kan chiaṭha thleidannak lungthin nih zeitindah a kan bawmh timi kong kha hlathlai.
3. Baibal lamhruainak kha zul
Biakhiahnak kan tuah tikah Baibal phunglam nih zeitindah a kan bawmh khawh? VIDEO kha piah, cun a tanglei biahalnak hna hi i ruah u.
-
Zalong tein thimnak nawl timi cu zeidah a si?
-
Jehovah nih zeicah zalong tein thimnak nawl a kan pek?
-
A ṭhami biakhiahnak tuah khawh awkah zeidah a kan pek?
Baibal phunglam he aa tlaiin tahchunhnak pakhat hngalh awkah, Efesa 5:15, 16 rel. Cun “caanṭha nan hmuhmi paohpaoh” ṭha tein hman khawh ning kong kha i ruah u . . .
-
hmaan tein Baibal rel awk.
-
a ṭha deuhmi innchunghawi, nulepa, fapa asiloah fanu si awk.
-
Khrihfabu pumhnak ah i pumh awk.
4. A ṭhami biakhiahnak tuah awkah na chiaṭha thleidannak lungthin kha cawnpiak
A kong pakhat he aa tlaiin Baibal ah a fiangmi nawlbia a um ahcun a ṭhami thimnak tuah cu a fawimi a lo men lai. Asinain a fiangmi nawlbia a um lo ah tah zeitin? VIDEO kha piah, cun a tanglei biahalnak hi i ruah u.
-
Mah video ah unaunu pakhat nih a chiaṭha thleidannak lungthin cawnpiak awk le Jehovah lung a lawmhtermi biakhiahnak tuah awkah zei hna dah a tuah?
Kan tuah awk a simi biakhiahnak tuah awkah midang kha zeicah kan hal hna awk a si lo? Hebru 5:14 rel law mah biahalnak hna hi i ruah u:
-
Kan caah biakhiahnak tuahpiak dingin midang sinah hal cu a fawimi a lawh hmanhah kanmah tein zeidah kan thleidan thiam a herh?
-
Na chiaṭha thleidannak lungthin cawnpiak awk le a ṭhami biakhiahnak tuah awkah zeinihdah aan bawmh khawh?
Khuaram hmanthlak bantukin kan chiaṭha thleidannak lungthin nih kan nunnak ah lam a kan hruai
5. Midang chiaṭha thleidannak lungthin kha upat
Minung cu kan i lawh cio lo caah kan biakhiahnak zong aa lo cio lo. Cucaah midang chiaṭha thleidannak lungthin kan upat kha zeitindah kan langhter khawh? Thil sining pahnih kong hi ruathmanh:
Thil sining 1nak: Sam tawi tein tan a duhmi unaunu pakhat cu sam tawi tein tan a duh lomi unaunu tampi an umnak Khrihfabu ah aa ṭhial.
Rom 15:1 le 1 Korin 10:23, 24 rel law mah biahalnak hna hi i ruah u:
-
Mah Baibal caang ah hrambunh in mah unaunu nih zeitindah biakhiahnak a tuah khawh? Na chiaṭha thleidannak lungthin nih tuah dingin nawl a awnhmi thil pakhat kha mi pakhat chiaṭha thleidannak lungthin nih a awnh lo ahcun zeidah na tuah lai?
Thil sining 2nak: Unaupa pakhat nih Baibal ah zu din cu a palh tiah a chim lo ti kha a hngalh ko nain zu din lo dingin bia a khiah. Mah unaupa cu hnianghrawmnak puai pakhat ah sawm a si i mah ah unau pawl nih zu aan dinmi kha a hmuh.
Phungchimtu 7:16 le Rom 14:1, 10 rel law mah biahalnak hna hi i ruah u:
-
Mah Baibal caang ah hrambunh in mah unaupa nih zeitindah biakhiahnak a tuah khawh? Na chiaṭha thleidannak lungthin nih a awnh lomi thil pakhat kha mi pakhat nih a tuahmi na hmuh ahcun zeidah na tuah lai?
A ṭhami biakhiahnak tuah awkah zei kehlan dah na hlan khawh?
1. Zeidah ka tuah lai timi kong he aa tlaiin biakhiahnak tuah awkah Jehovah sinah bawmhnak hal.—Jeim 1:5.
2. Mah kong he aa pehtlaimi phunglam pawl hngalh awkah Baibal le Baibal hrambunhmi cauk hna ah hlathlai. Cun hmuhtonnak a ngeimi Khrihfa pawl sin zongah na hal khawh hna.
3. Na biakhiahnak nih na chiaṭha thleidannak lungthin le midang chiaṭha thleidannak lungthin a hnorsuang hna lai maw timi kong zong kha ruat.
MI CHEUKHAT CHIMMI: “Na duhmi thil paoh tuahnak nawl na ngei. Midang ruahnak cu a biapi lo.”
-
Midang ruahnak i telin Pathian ruahnak kha zeicah biapi ah kan chiah awk a si?
A TAWINAK
Thil pakhat kong he aa tlaiin Jehovah nih zeitindah a hmuh ti le kan tuahsernak nih midang kha a bawm hna lai maw asiloah harnak a pe hna lai maw ti kha kan hngalh ahcun a ṭhami biakhiahnak kan tuah khawh lai.
I Ruahṭi Ṭhannak
-
Zeitindah Jehovah lung a lawmhtermi biakhiahnak na tuah khawh?
-
Na chiaṭha thleidannak lungthin kha zeitindah na cawnpiak khawh?
-
Midang chiaṭha thleidannak lungthin na upat kha zeitindah na langhter khawh?
HLATHLAI CHAP
Pathian he nan i hawikomhnak a fehter khomi biakhiahnak kha zeitindah na tuah khawh?
“Pathian Thang A Ṭhattermi Biakhiahnak Tuah” (2011, April 15, Vennak Innsang)
Jehovah nih zeitindah ruahnak a kan cheuh timi kong kha hlathlai.
Pa pakhat cu a harmi biakhiahnak tuah awkah zeinihdah a bawmh timi kong kha hlathlai.
A Sunglawi Tukmi Thluachuah Kha Jehovah Nih Aamah A Khaan (5:46)
Thil pakhat kong he aa tlaiin a fiangmi lamhruainak a kan pek lo tikah zeitindah Jehovah lung kan lawmhter khawh timi kong kha hlathlai.
“Baibal Nawlbia Pakhat Na Herh Peng Maw?” (Vennak Innsang capar)
Mah Kong Hna Zong Hi Na Duh Khawh Men
ATU LE ATU AN HALMI BIAHALNAK
Jehovah Tehte Hna Tuahmi Baibal Cawnnak Program Cu Zeidah A Si?
Jehovah Tehte Hna nih man loin an tuahmi Baibal kong i ruahceihṭinak program ah zei bantuk Baibal lehnak paoh kha na hman khawh. Na chungkhar dihlak asiloah na hawile ahopaoh nangmah he cawn dingin na sawm khawh hna.
