CAWN DINGMI 36
Zei Thil Paohah A Dingfelmi Si
Mikip nih a dingfelmi hawikom ngeih an duh. Jehovah zong nih a hawile cu a dingfelmi an si lai tiah aa ruahchan. Asinain a dingfel lomi mi tampi an umnak hi vawlei ah dingfel tein um cu a fawi lo. Zei thil paohah dingfel tein umnak nih zei ṭhathnemhnak dah a chuahter?
1. Dingfel tein um a biapitnak a ruang cu zeidah a si?
Midang cungah dingfel tein kan um tikah Jehovah kha kan dawt i kan upat ti kan langhtermi a si. Mah hi ruathmanh: Jehovah nih kan ruahmi le kan tuahmi thil vialte kha a hngalh dih. (Hebru 4:13) Dingfel tein um dingin kan i thimmi kha a hmuh i mah nih a lung a lawmhter. Baibal ah hitin a ti: “Mi lungthin ṭhalo cu BAWIPA caah fihnung an si i miding mi cu Pathian nih a zumhmi an si.”—Phungthlukbia 3:32.
2. Nifatin kan nunnak ah dingfel tein kan um khawhnak lam cheukhat cu zei hna dah an si?
Jehovah nih “pakhat le pakhat biatak i chim” hna seh ti a kan duh. (Zekhariah 8:16, 17) Mah cu zei sullam dah a si? Kan chungkhar, kan rianṭuanṭi hawi, Khrihfa unau asiloah cozah nawlngeitu pawl sin i bia kan chim tikah lihbia asiloah a hmaan lomi kong kha kan chim lai lo. A dingfelmi hna nih cun midang thil kha an fir lo asiloah an hleng hna lo. (Phungthlukbia 24:28 le Efesa 4:28 rel.) Cun an pek awk a simi ngunkhuai dihlak zong kha an pek. (Rom 13:5-7) Mah lam le a dang lam in “zumhawktlak tein” kan um kha kan langhter.—Titas 2:10.
3. Dingfel tein um a ṭhathnemhnak cu zeidah a si?
A dingfelmi pakhat in minṭhatnak kan hmuh tikah midang nih an kan zumh. Dawtnak a ngeimi chungkhar bantukin kan Khrihfabu ah himnak a um tiah an ruah nakhnga mikip kha kan bawmh hna. A thiangmi chiaṭha thleidannak lungthin zong kan ngei. Cun kan dinfelnak nih ‘kan Khamhtu Pathian kha a thang a ṭhatter’ khawh i midang zong kha Jehovah biak a duhter khawh hna.—Titas 2:10.
TAM DEUH IN HLATHLAI
Dingfel tein kan um tikah Jehovah cu zeitindah a um i mah in zeitindah ṭhathnemhnak kan hmuh timi kong le na nunnak ah zei bantuk thil sining paohah zeitindah dingfel tein na um khawh timi kong kha hlathlai.
4. Dinfelnak nih Jehovah lung a lawmhter
Salm 44:21 le Malakhi 3:16 rel law mah biahalnak hna hi i ruah u:
-
Jehovah sinin thil cheukhat thuh khawh a si tiah kan ruah awk a si lo tiah zeicah na ruah?
-
Biatak chim dingin a har tik hmanhah cutin tuah dingin kan i thim ahcun Jehovah cu zeitindah a um lai tiah na ruah?
Ngakchia nih biatak an chim tikah an nu le an pa lung kha an lawmhter. Biatak kan chim tikah Jehovah lung kha kan lawmhter
5. Zeitik caan paohah dingfel tein tuah
Mi tampi nih dingfel tein um cu a zungzal in cun a si kho lo tiah an ruah. Asinain zeitik caan paohah zeicah dingfel tein kan um zungzal awk a si timi kong kha hlathlai. VIDEO kha piah.
Titas 2:10 rel law zumhawktlak le dingfel tein um khawh ning kong kha i ruah u . . .
-
kan chungkhar ah.
-
rianṭuannak asiloah sianginn ah.
-
a dang thil sining ah.
6. Dinfelnak nih a kan ṭhathnemh
Dinfelnak nih buaibainak cheukhat a chuahter khawh men. Asinain a hnu ahcun mah cu a ṭha bikmi phunglam a si zungzal. Salm 34:12-16 rel law mah biahalnak hi i ruah u:
-
Dinfelnak nih na nunnak kha zeitindah a ṭhatter khawh deuh?
-
A dingfelmi va le nupi nih an innchungkhar kha an fehter
-
A dingfelmi rianṭuantu hna nih an bawile i zumhnak kha an hmuh
-
A dingfelmi rammi hna cu cozah nawlngeitu pawl sinin minṭhatnak an hmu
MI CHEUKHAT CHIMMI: “Cheukhat lihbia cu thil hmete a si ko i a biapi tuk lo.”
-
Jehovah nih lih vialte kha a huat tiah zeicah na zumh?
A TAWINAK
Jehovah nih a hawile cu an chimmi le an tuahmi thilkip ah a dingfelmi si hna seh ti a duh.
I Ruahṭi Ṭhannak
-
Dingfel tein um khawhnak lam cheukhat cu zei hna dah an si?
-
Jehovah sinin thil cheukhat thuh khawh a si tiah kan ruah awk a si lo tiah zeicah na ruah?
-
Zeitik caan paohah zeicah dingfel tein um na duh?
HLATHLAI CHAP
Nulepa nih an fale kha a dingfelmi si awkah zeitindah an cawnpiak khawh hna?
Kan biakam ningin tuah cu zeicah a ṭhat?
Ningcang loin an hman hmanhah ngunkhuai kha kan pek awk a si maw, a si lo timi kong kha hlathlai.
A dingfel lomi pa pakhat cu a nunnak i thlen awk le dingfel tein um awkah zeinihdah a forh?
“Jehovah cu Zaangfah le Ngaihthiam a Hmangmi a Si kha Ka Hngalh” (2015, July 1, Vennak Innsang)
Mah Kong Hna Zong Hi Na Duh Khawh Men
ATU LE ATU AN HALMI BIAHALNAK
Jehovah Tehte Hna Tuahmi Baibal Cawnnak Program Cu Zeidah A Si?
Jehovah Tehte Hna nih man loin an tuahmi Baibal kong i ruahceihṭinak program ah zei bantuk Baibal lehnak paoh kha na hman khawh. Na chungkhar dihlak asiloah na hawile ahopaoh nangmah he cawn dingin na sawm khawh hna.
