CAWN DINGMI 37
Rian Le Tangka Kong He Aa Tlaiin Baibal Chimmi
Rian asiloah tangka kong ah lungrethei in na um bal maw? Mah cu kan herhmi zohkhenh awk le Jehovah nih hmuh awkah aa tlakmi biaknak pek awkah zuamcawhnak a si kho. Baibal nih a kan bawm khomi zulhawktlakmi ruahnak a kan cheuh.
1. Rian kong he aa tlaiin Baibal nih zeidah a chim?
Pathian nih kan rian kha i nuamhpi hna seh ti a kan duh. Baibal nih hitin a ti: “Minung nih a ṭha bik a tuah khawhmi cu a ṭuan man a hmuhmi i nuamhpi hi a si.” (Phungchimtu 3:22) Jehovah cu rian aa zuammi a si. Teima tein rian kan ṭuannak thawngin Jehovah kha kan i zohchunh tikah a lung kan lawmhter i kanmah zong kan i lawm.
Rian cu a biapimi a si. Asinain Jehovah kan biakmi nakin mah kha a biapi deuh ah kan chiah awk a si lo. (Johan 6:27) Jehovah nih amah kha pakhatnak ah kan chiah ahcun pumsalei kan herhmi kha kaan pek hna lai tiah bia a kan kamh.
2. Tangka kong he aa tlaiin a tlarimi hmuhnak timi cu zeidah a si?
Baibal nih ‘tangka nih lung hnangamnak a pek’ khawh tiah a ti ko nain tangka lawng hi a kan lawmhter khotu thil a si lo ti zongin ralrin a kan pek. (Phungchimtu 7:12) Cucaah tangka hi duh tuk hlah u, “nan ngeihmi ah khan nan lung awi ko u” tiah a kan forh. (Hebru 13:5 rel.) Kan ngeihmi ah kan i lung si ahcun tam deuh ngeih chin duhnak ruangah lungrethei in kan um lai lo. Cun a herh loin leiba zong kan ngei lai lo. (Phungthlukbia 22:7) Cun ṭih a nungmi tangka in lentecelhnak le khualrang in rum duhnak zong in kan luat kho lai.
3. Kan tangka kha zeitindah siang ngaiin kan hman khawh?
Jehovah cu a siang tukmi Pathian a si i kannih zong ‘nun a siangmi le thil ṭhenh a siangmi’ kan si tikah Jehovah kan i zohchunhmi a si. (1 Timote 6:18) Khrihfabu kan bawmhnak thawngin le bawmhnak a herhmi, a hleiin zumtukhat unau pawl kan bawmh hnanak thawngin kan tangka kha siang ngaiin kan hman khawh. Jehovah nih zeizat dah kan pek timi kha si loin kan pek hnanak a ruang kha hngalh a duh. Lungtak tein siannak kan langhter ahcun kan i nuam lai i Jehovah lung zong kan lawmhter lai.—Lamkaltu 20:35 rel.
TAM DEUH IN HLATHLAI
Rian kong he aa tlaiin a hmaanmi lungput ngeihnak le lungsi hnangamnak ngeihnak in hmuhmi ṭhathnemhnak kong kha hlathlai.
4. Rian na ṭuan ningin Jehovah kha thangṭhatnak pe
Jehovah he kan i hawikomhnak cu rian he aa tlaiin kan lungput cung ah huham a ngeih awk a si. VIDEO kha piah, cun a tanglei biahalnak hna hi i ruah u.
-
Mah video ah Jason nih a rianṭuannak ah a langhtermi lungput le tuahsernak kong he aa tlaiin zeinihdah na lung aan suk?
-
A rian kha aa tlakmi hmun ah a chiah peng khawh nakhnga zeidah a tuah?
Kolose 3:23, 24 rel law mah biahalnak hi i ruah u:
-
Rian kong he aa tlaiin kan lungput cu zeicah a biapit?
Rian cu a biapimi a si. Asinain Jehovah kan biakmi nakin mah kha a biapi deuh ah kan chiah awk a si lo
5. Lungsinak ngeihnak nih a kan ṭhathnemh
Mi tampi cu tangka tampi ngeih awkah an si khawh chungin an i zuam. Asinain Baibal nih cun cutin ruahnak a kan cheu lo. 1 Timote 6:6-8 rel law mah biahalnak hi i ruah u:
-
Baibal nih zeidah tuah dingin tha a kan pek?
Tlawmte lawng kan ngeih hmanhah kan i nuam kho ko. VIDEO kha piah, cun a tanglei biahalnak hi i ruah u.
-
Tangka tlawmte lawng an ngei ko nain an chungkhar kha zeinihdah a nuamhter hna?
Asinain tampi kan ngei cang ko nain ngeih chin lengmang kan duh ah tah zeitin? Jesuh nih mah cu zeitlukin dah ṭih a nun ti kha tahchunhnak hmangin a kan chimh. Luka 12:15-21 rel law mah biahalnak hi i ruah u:
-
Jesuh chimmi tahchunhnak in zeidah na cawn khawh? —Caang 15 zoh.
Phungthlukbia 10:22 le 1 Timote 6:10 rel law tahchunh. Cun mah biahalnak hna hi i ruah u:
-
Zeidah a biapi deuh tiah na ruah? Jehovah he i hawikomh maw asiloah tangka tampi ngeih dah? Zeicah?
-
Tangka tampi ngeih duhnak nih zei buaibainak dah a chuahter?
6. Jehovah nih kan herhmi kha a kan pek lai
Rian le tangka kong ah buaibainak nih Jehovah cung i kan zumhnak kha a hneksak khawh. Cu bantuk buaibainak kan ngeih tikah zeidah kan tuah khawh timi kong hngalh awkah, VIDEO kha piah, cun a tanglei biahalnak hna hi i ruah u.
-
Mah video ah unaupa nih zei buaibainak dah a ton?
-
Mah buaibainak kha tawnghtham khawh awkah zeidah a tuah?
Matthai 6:25-34 rel law mah biahalnak hi i ruah u:
-
Jehovah nih amah pakhatnak ah a chiami hna kha zeidah tuahpiak dingin bia a kamh hna?
MI CHEUKHAT CHIMMI: “Ka chungkhar zohkhenh awkah fakpi in rian ka ṭuan. Cucaah Khrihfabu pumhnak ah zarh fatin kaa pum kho lo.”
-
Jehovah biaknak pakhatnak ah kan chiah ahcun Jehovah nih kan herhmi kha a kan pek lai ti kha zei Baibal caang nih dah aan zumhter?
A TAWINAK
Pawcawmnak rian le tangka cu a herhmi an si, asinain mah kha Jehovah biaknak ah dawnkhantu kan siter awk a si lo.
I Ruahṭi Ṭhannak
-
Rian kong he aa tlaiin a tlarimi hmuhnak ngeih peng awkah zeinihdah aan bawmh khawh?
-
Lungsinak ngeihnak nih zeitindah aan ṭhathnemh?
-
Jehovah nih a miphun cu ka bawmh hna lai tiah bia aa kammi na zumh kha zeitindah na langhter khawh?
HLATHLAI CHAP
Baibal nih tangka cu a ṭhalomi a si tiah a chim maw, chim lo timi kong kha hlathlai.
Kan tangka kha Pathian lung a lawmhtermi lam in zeitindah kan hman khawh timi kong kha hlathlai.
“Peknak Kong he aa tlaiin Baibal nih Zeidah a Chim?” (Website capar)
Tangka in lentecelhnak cu ṭih a nung lomi a si maw?
“Tangka in Lentecelhnak he aa Tlaiin Baibal Hmuh Ning” (2015, March, I Hlau!)
Tangka in lentecelh a hmangmi le thilfir a hmangmi pa pakhat kha a nunnak thlen awkah zeinihdah a forh timi kong kha hlathlai.
Mah Kong Hna Zong Hi Na Duh Khawh Men
ATU LE ATU AN HALMI BIAHALNAK
Jehovah Tehte Hna Tuahmi Baibal Cawnnak Program Cu Zeidah A Si?
Jehovah Tehte Hna nih man loin an tuahmi Baibal kong i ruahceihṭinak program ah zei bantuk Baibal lehnak paoh kha na hman khawh. Na chungkhar dihlak asiloah na hawile ahopaoh nangmah he cawn dingin na sawm khawh hna.
