Kan nun caah kan tuah khawhmi le kan i nuamhpi khawhmi thil ṭha tampi a um. Harnak kan ton hmanhah cheukhat thil sining ah cun kan i nuam kho ko. Nunnak laksawng kan sunsak kha zeitindah kan langhter khawh? Cutin kan tuah awk a sinak a biapi bikmi a ruang cu zeidah a si?

1. Nunnak kha zeicah kan sunsak awk a si?

Nunnak cu kan dawtmi kan Pa, Jehovah sinin kan hmuhmi laksawng a si caah a si. Amah nih nunnak vialte kha a ser caah anih cu “nunnak vialte hram” a si. (Salm 36:9) “Minung kha nunnak le thaw le zeizong vialte a petu a si.” (Lamkaltu 17:25, 28) Jehovah nih kan nun peng khawh nakhnga kan herhmi kha a kan pek. Cun nunnak kha i nuamhpi khawh ding zongin a kan tuahpiak.—Lamkaltu 14:17 rel.

2. Nunnak laksawng kan sunsak kha Jehovah cungah zeitindah kan langhter khawh?

Na nu pawchung na um lioin Jehovah nih aan zohkhenh. Baibal chungah Pathian a biami hna lakah pakhat a simi David nih Pathian kha hitin a ti: “Ka chuah hlan in na rak ka hmuh diam cang.” (Salm 139:16) Jehovah nih na nunnak kha a sunsak tuk. (Matthai 10:29-31 rel.) Mi zei poah nih mi pakhat kha a thah asiloah amahle amah kha aa thah ahcun mah nih Pathian kha a lung a fahter lai. a (Exodus 20:13) Cun a herh loin kan nunnak caah ṭih a nungmi thil kha kan tuah asiloah midang nunnak kilven awkah a hlankan in timhtuahnak hna kan ngeih lo ahcun mah zong nih Jehovah lung kha a fahter lai. Kan nunnak kha biapi ah kan chiah i midang nunnak kha kan upat ahcun a ṭha tukmi nunnak laksawng kan sunsak kha kan langhtermi a si.

 TAM DEUH IN HLATHLAI

3. Na ngandamnak kha i zohkhenh

Jehovah sinah na duhnak kha a zungzal in kan tuah lai tiah bia kan i kam caah a rianṭuannak ah kan nunnak dihlak kha kan hman. Mah cu kan pum kha Pathian sinah raithawinak in kan pekchanhmi bantuk a si. Rom 12:1, 2 rel law mah biahalnak hna hi i ruah u:

• Na ngandamnak i zohkhenh awkah zeinihdah aan forh awk a si?

• Cutin na tuah khawhnak lam cheukhat cu zei hna dah an si?

 5. A chuak rih lomi ngakchia nunnak kha upat

Jehovah nih a chuak rih lomi ngakchia a nunnak le a ṭhan ning kong hngalh a duhnak kong kha David nih biazai phun in a langhter. Salm 139:13-17 rel law mah biahalnak hi i ruah u:

• Jehovah hmuhnak ah mi pakhat nunnak cu pawi a si lio asiloah hrin a si hnuah aa thawk maw?

Jehovah nih hlanlio Israel mi kha fa a pawimi nu le a chuak rih lomi an fale pawl kha kilven awkah nawlbia a pek hna. Exodus 21:22, 23 rel law mah biahalnak hna hi i ruah u:

• Jehovah nih a chuak rih lomi naute ruahlopi in a that sualmi pakhat kha zeitindah a hmuh?

• Mi pakhat nih timh ciammam tein a thahmi a si ahcun Jehovah cu zeitindah a um lai? b

• Pathian hmuhning kong he aa tlaiin zeitindah na ruah?

VIDEO kha piah.

Nunnak a sunsakmi nu pakhat hmanh nih kaa thim khawhmi cu nauhrawh ding lawng a si tiah a ruah men lai. Isaiah 41:10 rel law mah biahalnak hna hi i ruah u:

• Nu pakhat cu nauhrawh dingin hnek a si ahcun aho sinah dah bawmhnak a hal awk a si? Zeicah?

 A TAWINAK

Baibal nih Jehovah pekmi nunnak laksawng kha sunsak awk, upat awk le kilven awkah a kan cawnpiak. Mah ah kanmah nunnak le midang nunnak zong aa tel.

I Ruahṭi Ṭhannak

• Jehovah caah minung nunnak cu zeicah a sunlawi?

• Mi pakhat nih midang kha timh ciammam tein a thah ahcun Jehovah cu zeitindah a um?

• Nunnak laksawng caah zeicah naa lawmh?