Vawleicung pumpi ah zu kong he aa tlaiin mi tampi cu hmuh ning a phunphun an ngei. Mi cheukhat nih an hawile he an i ton caan lawngah zu din dingin an i thim. Mi cheukhat tu nih cun zeitikhmanh ah din lo dingin an i thim. Asinain mi cheukhat nih cun an rit tiang an din. Zu kong he aa tlaiin Baibal hmuhnak cu zeidah a si?

1. Zu din cu a palh maw?

Baibal nih zu din cu a palh tiah a ti lo. Pathian pekmi laksawng lakah “lung a lawmhtertu dingah mitsur hang” zong aa tel. (Salm 104:14, 15) Baibal ah langhtermi zumhfekmi nu le pa cheukhat zong zu an rak ding.—1 Timote 5:23.

2. Baibal nih zu a dingmi hna kha zei ruahnak dah a cheuh hna?

Jehovah nih zu tam tuk din le rit kha a duh lo. (Galati 5:21) Baibal nih hitin a ti: “Zuri hna he i kom hlah.” (Phungthlukbia 23:20) Cucaah kanmahte lawngin kan din hmanhah khua ṭha tein ruat kho lo tiangin din lo awk, kan biachim le kan tuahsernak i uk khawh lo tiangin din lo awk asiloah kan ngandamnak a hnorsuan tiangin din lo awkah kan i zuam ding a si. Zeitlukin dah kan din lai ti kha kan i uk khawh lo ahcun din loin um ah a ṭha deuh.

3. Zu dinnak kong he aa tlaiin midang biakhiahnak kan upat kha zeitindah kan langhter khawh?

Zu kan ding lai maw, ding lai lo timi kong he aa tlaiin pakhat cio nih biakhiahnak kan tuah a hau. A zafang in din awkah aa thimmi pakhat kha bia kan ceih awk a si lo i zu din a duh lomi pakhat zong kha din dingin kan hnek awk a si lo. (Rom 14:10) Zu kan dinmi nih midang caah harnak a chuahter ahcun din lo ah a ṭha. (Rom 14:21 rel.) “Kanmah ca ṭha ding lawng kha kan zoh awk a si lo, midang ca ṭha dingtu kha kan zoh awk deuh a si.”—1 Korin 10:23, 24 rel.

 TAM DEUH IN HLATHLAI

4. Ka ding lai maw, ding lai lo ti kha bia khiak

Jesuh nih zu din kha zeitindah a hmuh? A phi hngalh awkah hmasa bik a rak tuahmi khuaruahhar thil kong hi ruathmanh. Johan 2:1-11 rel law mah biahalnak hna hi i ruah u:

• Mah khuaruahhar thil a tuahmi ah zu le zu a dingmi hna kha Jesuh nih zeitindah a hmuh hna?

• Jesuh nih zu din kha a thlauh lo caah Khrihfa hna nih zu a dingmi kha zeitindah an hmuh hna awk a si?

Asinain Khrihfa pakhat nih zu din khawh a si ko tiin zeitik caan poahah din khawh a si tinak cu a si lo. Phungthlukbia 22:3 rel law a tanglei thil sining ah zu na ding lai maw, ding lai lo timi kong kha i ruah u:

• Mawṭaw na mawngh tik asiloah seh thilri hmangin rian na ṭuan tik.

• Fa na pawi tik.

• Zu din lo dingin siibawi nih ruahnak an cheuh tik.

• Zeitlukin dah ka din lai ti na hngalh lo tik.

• Upadi nih zu din a awnh lo tik.

• Zeitlukin dah ka din awk a si ti a hngalh lo caah zu aa phiatmi pakhat he nan umṭi tik.

Ṭhitum puai asiloah a dang puai hna ah zu na dangh hna awk a si maw? Biakhiahnak tuah awkah zeinihdah aan bawmh khawh timi kong hngalh awkah, VIDEO kha piah.

Rom 13:13 le 1 Korin 10:31, 32 rel. Cun mah Baibal caang pakhat cio nan rel dih hnuah mah biahalnak hi i ruah u:

• Mah Baibal phunglam nih Jehovah lung a lawmhtermi biakhiahnak tuah awkah zeitindah aan bawmh khawh?

 5. Zeitlukin dah ka din lai ti kha bia khiak

Zu din awkah naa thim ahcun mah hi i cinken: Jehovah nih zu din kha a thlauh lo nain tam tuk din kha cu a duh lo. Zeicah? Hosea 4:11, 18 rel law mah biahalnak hi i ruah u:

• Mi pakhat nih zu tam tuk a din ahcun zeidah a cang kho?

Zu tam tuk din lo awkah zeitindah kan hrial khawh? Kan i toidor asiloah ri kan ngeihmi kha kan hngalh a hau. Phungthlukbia 11:2 rel law mah biahalnak hi i ruah u:

• Zeitlukin dah ka din lai timi kong he aa tlaiin rikhiah cu zeicah a ṭhat?

6. Zu tam tuk din lo awkah i sum khawh ning

 A TAWINAK

Jehovah nih zu kha kan i nuamh nakhnga caah a kan pek ko nain zu tam tuk din le zu rit kha cu a duh lo.

I Ruahṭi Ṭhannak

• Zu kong he aa tlaiin Baibal hmuhnak cu zeidah a si?

• Zu tam tuk din ṭih a nunnak cu zei hna dah an si?

• Zu dinnak kong he aa tlaiin midang biakhiahnak kan upat kha zeitindah kan langhter khawh?