CAWN DINGMI 44
Puai Vialte Nih Pathian Lung A Lawmhter Maw?
Jehovah nih nunnak kha i nuamhpi hna sehlaw a caan ah puai zong tuah hna seh ti a kan duh. Asinain puai vialte nih a lung a lawmhter maw? Mah kong he aa tlaiin Jehovah kan dawt kha zeitindah kan langhter khawh?
1. Puai tampi nih zeicah Jehovah lung a lawmhter lo?
Puai tampi cu Baibal cungah hram aa bunh lo i Khrihfa a si lomi hna sinin aa thawkmi an si ti kha na hngalh tikah na khuaruah a har men lai. Cu bantuk puai hna cu a hmaan lomi biaknak he aa pehtlaimi an si. Mah cu khuachia thiamnak he aa pehtlaimi asiloah thlarau cu a thi kho lo timi cawnpiaknak cungah hram aa bunhmi zong a si kho men. Cheukhat puai hna cu zumhnak hrut asiloah vanṭhatnak zumhnak hna cungah hram aa bunhmi an si. (Isaiah 65:11) Jehovah nih amah a biami hna kha hitin ralrin a pek hna: “An sin cun nan i ṭhen hrimhrim lai. A thiang lomi kha zeihmanh tawng hlah u.”—2 Korin 6:17. a
2. Mi nih an sunsak tukmi puai kha Jehovah nih zeitindah a hmuh?
Jehovah nih ‘minung kha i bochan’ hna lo awkah ralrin a kan pek. (Jeremiah 17:5 rel.) Cheukhat puai hna nih uktu asiloah ralkap pawl kha upatnak an pek hna. Cun miphun puai asiloah zalonnak an hmuh ni puai hna zong a um. (1 Johan 5:21) Ramkhellei asiloah zatlang nun a hlorhmi puai hna zong a um. Mi pakhat asiloah phu pakhat a hleihluat tuk in upatnak pekmi puai le Pathian tinhnak he aa tlak lomi ruahnak tha a pemi puai hna ah kan i tel ahcun Jehovah cu zeitindah a um lai?
3. Zei ziaza hna nih dah puai kha cohlan lomi a siter khawh?
Baibal nih “zu ritnak te hna, zu hmun i nuamhnak te hna [le] bawilamnak te hna” kha a kan thlauh. (1 Peter 4:3) Cheukhat puai hna ah mi cu anmahle anmah an i uk kho lo i an ziaza a rawkral. Jehovah hawikom si peng awkah cu bantuk a ṭhalomi ziaza hna kha lam hlatpi in kan hrial a hau.
TAM DEUH IN HLATHLAI
Puai kong he aa tlaiin a ṭhami biakhiahnak tuahnak thawngin zeitindah Jehovah lung na lawmhter khawh timi kong kha hlathlai.
4. Jehovah thang a ṭhatter lomi puai hna kha hrial
Efesa 5:10 rel law mah biahalnak hna hi i ruah u:
-
Puai pakhat kan tuah awk a si maw, si lo timi kong he aa tlaiin biakhiahnak kan tuah tikah zeidah kan ruah awk a si?
-
Na umnak hmun ah zei puai hna dah a laar?
-
Mah puai hna nih Jehovah lung a lawmhter lai tiah na ruat maw?
Tahchunhnak ah, chuah ni puai kong he aa tlaiin Pathian nih zeitindah a hmuh ti kha na ruat bal maw? Baibal ah Jehovah a biami hna nih chuah ni puai an tuah timi kong a langhter bal lo. Asinain amah a bia lomi pahnih nih chuah ni puai an tuahnak kong tu cu a langhter. Genesis 40:20-22 le Matthai 14:6-10 rel. Cun mah biahalnak hna hi i ruah u:
-
Mah chuah ni puai pahnih ah aa lawhnak zeidah a um?
-
Mah Baibal tuanbia ningin Jehovah nih chuah ni puai tuah kha zeitindah a hmuh lai tiah na ruah?
Asinain ‘chuah ni puai asiloah Baibal he aa tlak lomi puai ah kaa tel le tel lo cu Jehovah caah a biapi taktak maw?’ tiah na ruah men lai. Exodus 32:1-8 rel. Cun VIDEO kha piah law a tanglei biahalnak hna hi i ruah u.
-
Jehovah nih zeidah a cohlan ti kha zeicah kan hngalh a herh?
-
Cutin hngalh awkah zeitindah kan tuah khawh?
Pathian lung a lawmhter lomi puai hngalh khawh ning
-
Baibal he aa tlak lomi cawnpiaknak cungah hram aa bunhmi a si maw? Mah kong hngalh awkah puai aa thawknak kong kha hlathlai.
-
Mah puai nih minung, phu asiloah miphun hmelchunhnak kha a hleihluat tuk in thangṭhatnak a pe maw? Zeizong vialte nakin Jehovah kha thangṭhatnak kan pek i vawleicung buaibainak hna tawnghthampiak awkah amah lawng kha kan i bochan.
-
Mah phunglam le tuahsernak hna cu Baibal phunglam he aa tlak maw? Ziazalei ah thiang tein kan um peng a hau.
5. Na zumhnak kha midang nih an upat nakhnga bawm hna
Midang nih Jehovah lung a lawmhter lomi puai ah i tel dingin an in hnek tikah al awkah a har kho men. Cucaah na biakhiahnak kong kha lungsau te le fimkhur tein chim hna. Cutin tuah khawh ning kong hngalh awkah, VIDEO kha piah.
Matthai 7:12 rel law mah biahalnak hna hi i ruah u:
-
Mah Baibal caang ningin zumlotu na chungkhar pawl kha puai ah nan i tel awk a si lo tiah na ti hna awk a si maw?
-
Anmah he puai ah naa tel lo hmanhah na chungkhar pawl nih na dawt hna i na sunsak hna ti kha an zumh nakhnga zeidah na tuah khawh?
6. Jehovah nih i nuam hna seh ti a kan duh
Jehovah nih kan chungkhar le kan hawile he nuam tein caan hmangṭi hna seh ti a kan duh. Phungchimtu 8:15 rel law mah biahalnak hi i ruah u:
-
Jehovah nih i nuam hna seh ti a kan duh ti kha mah Baibal caang nih zeitindah a langhter?
Jehovah nih a miphun pawl kha i nuam hna sehlaw caanṭha hmangṭi hna seh ti a duh. Mah kha ramkomh civui hna ah kan hmuh khawh. Mah kong zoh awkah, VIDEO kha piah.
Galati 6:10 rel law mah biahalnak hna hi i ruah u:
-
Mi caah “ṭhatnak tuah” awkah a laar ngaimi puai hna kha kan tuah a hau maw?
-
Zeinihdah aan lawmhter deuh: Pek a hauh caah na pekmi nih maw asiloah lungtho tein na pekmi nih dah?
-
Jehovah Tehte tampi nih a caan ah an fale caah a sunglawimi thil kha an timhtuahpiak hna i laksawng zong an pek hna. Fa a ngeimi na si ahcun na fale caah zei a ṭha tukmi thil cheukhat dah na timhtuahpiak khawh hna?
MI CHEUKHAT CHIMMI: “Puai hna an i thawknak cu a biapi lo. Chungkhar le hawikom pawl he nuam tein caan hmanṭi kha a biapimi a si.”
-
Zeitindah na leh lai?
A TAWINAK
Jehovah nih kan chungkhar le kan hawile pawl he nuam tein caan hmangṭi hna seh ti a kan duh. Cun a lung a lawmhter lomi puai hna zong kha hrial hna seh ti a kan duh.
I Ruahṭi Ṭhannak
-
Jehovah lung a lawmhter lomi puai ah i tel le i tel lonak kong he aa tlaiin biakhiahnak tuah awkah zei bia dah kan i hal khawh?
-
Puai kong he aa tlaiin kan biakhiahnak kha kan chungkhar le kan hawile nih an hngalhthiam nakhnga zeitindah kan bawmh khawh hna?
-
Jehovah nih nuam tein um hna seh ti a kan duh ti kha zeitindah na hngalh khawh?
HLATHLAI CHAP
Khrihfa hna nih an tuah lomi puai cheukhat kong kha hlathlai.
“Jehovah Tehte Hna Nih Puai Cheukhat Kha Zeicah An Tuah Lo?” (Website capar)
Chuah ni puai nih Pathian lung a lawmhter lo ti kan zumhnak a ruang pali kha hlathlai.
“Jehovah Tehte Hna Nih Zeicah Chuah Ni Puai An Tuah Lo?” (Website capar)
Jehovah a dawmi ngakchia pakhat nih sianginn khar chung ah Pathian lung zeitindah a lawmhter khawh ti kha hlathlai.
Khrihfa mi nuai thong tampi cu Christmas puai an tuah lo. An biakhiahnak kong he aa tlaiin zeitindah an ruah?
“Christmas Puai Nakin A Ṭha Deuhmi Thil Kha An Hmuh” (Vennak Innsang capar)
a Midang nih puai an tuah caan ah zeidah ka tuah lai timi kong hngalh awkah A Donghnak I Fianternak 5 ah zoh.
Mah Kong Hna Zong Hi Na Duh Khawh Men
ATU LE ATU AN HALMI BIAHALNAK
Jehovah Tehte Hna Tuahmi Baibal Cawnnak Program Cu Zeidah A Si?
Jehovah Tehte Hna nih man loin an tuahmi Baibal kong i ruahceihṭinak program ah zei bantuk Baibal lehnak paoh kha na hman khawh. Na chungkhar dihlak asiloah na hawile ahopaoh nangmah he cawn dingin na sawm khawh hna.
