Jesuh nih a zultu pawl kha hi “vawlei ta” si lo awkah a cawnpiak hna. (Johan 15:19) Vawlei ta si lo timi ah ramkhellei le raldohnak ah khoikalei hmanhah ṭan lonak aa tel. Khoikalei hmanhah ṭan loin um cu a zungzal in cun a fawi lo. Mah ruangah nihsawhnak kan tong kho. Cu a si ah khoikalei hmanhah ṭan loin le Jehovah Pathian cungah zeitindah zumhfek tein kan um peng khawh?

1. A hmaanmi Khrihfa hna nih minung cozah kha zeitindah an hmuh?

Khrihfa hna nih cozah kha an upat. Jesuh nih “Siangpahrang ta a simi cu Siangpahrang cu va pe ko u” tiah a ti bantukin ram upadi kha kan zulh i ngunkhuai kha kan pek. (Marka 12:17) Minung cozah i uktu pawl nih Jehovah nawlpeknak thawngin an ukmi a si tiah Baibal nih a kan cawnpiak. (Rom 13:1) Cucaah minung cozah i nawlngeihnak cu ri a ngei ti kha kan hngalh. Minung buaibainak tawnghtham awkah Pathian le vancung a Pennak lawng kha kan i bochan.

2. Khoikalei hmanhah kan ṭan lo kha zeitindah kan langhter khawh?

Jesuh bantukin ramkhellei ah kan i tel lo. Mi nih Jesuh tuahmi khuaruahhar thil an hmuh tikah an siangpahrang siter awkah an rak i zuam nain Jesuh nih a rak kaltak hna. (Johan 6:15) Zeicah? A hnuah Jesuh nih “kei ka Pennak cu hi vawlei ta hi a si lo” tiah a ti. (Johan 18:36) Jesuh zultu in khoikalei hmanhah kan ṭan lo kha lam tampi in kan langhter. Tahchunhnak ah, raltuknak ah kan i tel lo. (Mikah 4:3 rel.) Alan ti bantuk miphun hmelchunhnak hna kha kan upat ko nain kan bia hna lo. (1 Johan 5:21) Cun ramkhellei party asiloah aiawhtu pawl kha kan doh hna lo i a ṭanh zong kan ṭanh hna lo. Mah lam le a dang lam in Pathian cozah a simi a Pennak cung lawngah zumhfek tein kan um ti kha kan langhter.

 TAM DEUH IN HLATHLAI

3. A hmaanmi khrihfa hna cu khoikalei hmanhah an ṭang lo

Jesuh le a zultu pawl nih kan caah zohchunhawk an chiah. Rom 13:1, 5-7 le 1 Peter 2:13, 14 rel. Cun VIDEO kha piah law a tanglei biahalnak hna hi i ruah u.

• Vawlei nawlngeitu pawl kha zeicah kan upat hna awk a si?

• An nawl kan ngaih hna ti kan langhter khawh ning lam cheukhat cu zei hna dah an si?

Raltuknak a um lioah ram cheukhat cu khoikalei hmanhah an ṭang lo nain kaphnih ningin an bawmh hna. Khoikalei hmanhah ṭan lo timi a sullam taktak cu zeidah a si? Johan 17:16 rel. Cun VIDEO kha piah law a tanglei biahalnak hi i ruah u.

• Khoikalei hmanhah ṭan lo timi cu zei sullam dah a si?

Vawlei nawlngeitu pawl nih Pathian nawlbia he aa ralchanhmi thil cheukhat tuah dingin an in hal ahcun zeitin? Lamkaltu 5:28, 29 rel. Cun VIDEO kha piah law a tanglei biahalnak hna hi i ruah u.

• Minung upadi le Pathian nawlbia aa ralchanh ahcun aho nawl dah kan ngaih awk a si?

• Khrihfa hna nih zei bantuk thil sining ah dah vawlei nawlngeitu pawl bia kha kan ngaih awk a si lo tiah na ruah?

 4. Na ruahnak le na tuahsernak ah khoikalei hmanhah ṭang hlah

1 Johan 5:21 rel. Cun VIDEO kha piah law a tanglei biahalnak hna hi i ruah u.

• Mah video ah Ayenge nih ramkhellei asiloah alan hmaiah kunnak ti bantuk miphun puai hna ah i tel lo dingin zeicah bia a khiah?

• A biakhiahnak cu a hmaanmi a si tiah na ruat maw?

A dang zei thil sining nih dah khoikalei hmanhah kan ṭan lonak kha a hneksak khawh? VIDEO kha piah, cun a tanglei biahalnak hna hi i ruah u.

• Ramkomh in tuahmi lentecelhnak ah khoikalei hmanhah ṭan loin zeitindah kan um peng khawh?

• Ramkhellei biakhiahnak ruangah kanmah theng ṭhatnak asiloah harnak kan ton hmanhah zeitindah khoikalei hmanhah ṭan loin kan um peng khawh?

• Thanhca asiloah kan hawile nih khoikalei hmanhah ṭan lo dingin um awkah zeitindah an harter khawh?

 A TAWINAK

Khrihfa hna cu ramkhellei kong he aa tlaiin an ruahnak, an biachim le an tuahsernak ah khoikalei hmanhah ṭan lo awkah an i zuam.

I Ruahṭi Ṭhannak

• Minung cozah sinah zei rian dah kan ngeih?

• Zeicah ramkhellei ah khoikalei hmanhah ṭan loin kan um peng?

• Zei thil sining nih dah khoikalei hmanhah kan ṭan lonak kha a hneksak khawh?