1.  A Liannganmi Babilon thleidan khawh ning

2.  Messiah Cu Zeitikah Dah A Rat Lai?

3.  Thi Aa Telmi Siithlopnak

4.  Nuleva A Dang Tein Umnak

5.  Puai Hna

6.  Chawnh Khawhmi Zawtnak

7.  Rian Le Upadi Lei Kongkau

 1. A Liannganmi Babilon thleidan khawh ning

“A Liannganmi Babilon” nih a hmaan lomi biaknak vialte a aiawh ti kha zeitindah kan hngalh khawh? (Biathlam 17:5) Mah kong hna hi ruathmanh:

• Vawleicung pumpi ah nawl a ngei. A Liannganmi Babilon cu “miphun hna le ram hna” cungah a ṭhu tiah a ti. Anih cu “vawleicung siangpahrang hna a uktu” a si.—Biathlam 17:15, 18.

• Ramkhellei asiloah chawlehnaklei ah nawl a ngei kho lo. “Vawleicung siangpahrang hna” le “chaw a rak dawr tawnmi” hna cu hrawh a sinak in an luat.—Biathlam 18:9, 15.

• Pathian kha a hmaan lomi lam in a aiawh. Tangka asiloah mithmai ṭha a hmuh khawh nakhnga cozah pawl he naih tein rian a ṭuanṭi caah anih cu hlawhhlangnu tiah auh a si. (Biathlam 17:1, 2) Anih nih miphun kip kha a hlen hna. Cun mi tampi an thihmi ca zongah rian a ngei.—Biathlam 18:23, 24.

Cawn dingmi 13 a kong 6 ah kir ding

 2. Messiah Cu Zeitikah Dah A Rat Lai?

Baibal ah Messiah a rat hlan tiang zarh 69 a rau lai tiah a ti.—Daniel 9:25 rel.

• Zarh 69 cu zeitikah dah aa thawk? Mangki Bawi Nehemiah cu khua kha ‘hmasa a sining ah khan siter ṭhan awk le sak ṭhan awkah’ BC 455 ah Jerusalem ah a phan.—Daniel 9:25; Nehemiah 2:1, 5-8.

• Zarh 69 cu zei can dah a rauh? Cheukhat Baibal chimchungbia ah nikhat nih kumkhat kha a aiawh. (Nambar 14:34; Ezekiel 4:6) Cun zarhkhat cio nih kum sarih kha a aiawh. Cucaah mah chimchungbia i zarh 69 cu kum 483 (zarh 69 x ni 7) a si.

• Zarh 69 cu zeitikah dah a dongh? BC 455 in kan rel ahcun kum 483 cu AD 29 a ah a dong. Mah kum cu Jesuh tipil a ing i Messiah a hung si kum kha a si.—Luka 3:1, 2, 21, 22.

Cawn dingmi 15 a kong 5 ah kir ding

 3. Thi Aa Telmi Siithlopnak

Mizaw pakhat i a thi kha siithlopnak caah hman khawh ning lam a um. Asinain mah lakah cheukhat cu Khrihfa hna caah cohlan khawh a si lo. Tahchunhnak ah, cheukhat nih an thi kha an hlut. Asiloah khuaihlainak tuah tikah hman dingin an thi kha an khon. Asinain Khrihfa hna nih cun cutin an tuah lai lo.—Deuteronomi 15:23.

A dang siithlop ning tu cu cohlan khawh a si men lai. Mah ah thi check, hemodialysis (thi thianhnak seh), kal ṭawl, seh in lung le cuap ṭawl aa tel. Khrihfa pakhat cio nih kan thi kha khuaihlainak caah, zawtnak checknak caah asiloah thlopnak caah zeitindah kan hman lai ti kha biakhiahnak kan tuah a hau. Siibawi pakhat cio nih mah thlopning an hman ning cu aa dang cio kho men. Cucaah Khrihfa pakhat nih cun khuaihlainak ca, zawtnak checknak ca asiloah thlopnak caah tiin a cohlan hlanah a thi zeitindah hman a si lai ti kha ṭha tein a hngalh hmasa a hau. A tanglei biahalnak hna hi ruat:

• Ka thi cheukhat kha ka pum lengah luanter in chikkhat chung rian a ṭuan ti lo ahcun zeitin? Mah kha ka pum chung thi a si ko i ‘vawlei ah thlet’ a hau lai lo tiah ka chiaṭha thleidannak lungthin nih a awnh maw?—Deuteronomi 12:23, 24.

• Kaa thlop lioah ka thi cheukhat kha a lengah chuah in thianter, cun ka pum chungah rawn ṭhan a si ahcun zeitin? Mah nih Baibal in cawnpiakmi ka chiaṭha thleidannak lungthin kha a hnorsuang lai maw? Asiloah mah siithlop ning kha ka cohlang lai maw?

Cawn dingmi 39 a kong 3 ah kir ding

 4. Nuleva A Dang Tein Umnak

Baibal nih nuleva cu a dang tein um hna hlah seh tiah a ti. Cun a dang tein a ummi nuva hna cu a dang innchunghawi an ngeih awk a si lo ti zong in a ti. (1 Korin 7:10, 11) Asinain mah thil sining ruangah Khrihfa cheukhat nih a dang tein um awkah khua an ruah khawh men.

• A chungkhar a zohkhenh duh hna lo: Va pakhat nih a innchungkhar caah tangka le ei din ngeih lo tiangin pumsalei in a zohkhenh duh lomi hna kha a si.—1 Timote 5:8.

•   Fakpi in a velh hna: A innchunghawi ngandamnak asiloah a nunnak caah ṭihnung tiangin velh kha a si.—Galati 5:19-21.

• Jehovah he an i pehtlaihnak ah a khenkham tuk hna: Innchunghawi pakhatkhat nih Jehovah biak lo awkah an tuahmi kha a si.—Lamkaltu 5:29.

Cawn dingmi 42 a kong 3 ah kir ding

 5. Puai Hna

Khrihfa hna cu Jehovah lung a lawmhter lomi puai hna ah an i tel lo. Asinain Khrihfa pakhat cio nih midang nih puai an tuah tikah zeidah ka tuah lai timi kong he aa tlaiin biakhiahnak tuah awkah Baibal in cawnpiakmi an chiaṭha thleidannak lungthin kha an hman a hau. Tahchunhnak cheukhat hi ruathmanh.

• Mi pakhatkhat nih puai hmanmi bia in aan chawnhbiak. Mah tikah a sawhsawh tein “Kaa lawm” tiah na ti khawh. Puai kong he aa tlaiin tam deuh in hngalh a duh ahcun puai na tuah lonak a ruang kha na chim khawh.

• Jehovah Tehte a si lomi na innchunghawi nih dinh caan ah a rualchan pawl he rawl i hrawmṭi dingin aan sawm. Na chiaṭha thleidannak nih kal dingin a awnh ahcun na innchunghawi kha rawl hrawmnak i nan kal hlanah Khrihfa phungphai he aa ralkahmi aa tel ahcun kaa tel kho lai lo tiah na chimh khawh.

• Na rian bawi nih biaknaklei puai tuah caan ah laksawng aan pek. Mah tikah laksawng kha na al awk a si maw? Al a hau lo. Na rian bawi nih mah laksawng kha puai he aa tlaimi in a hmu maw asiloah rian ṭha tein na ṭuan caah aa lawmhnak langhternak sawhsawh in dah a hmuh?

• Mi pakhat nih biaknaklei puai tuah caan ah laksawng aan pek. Hitin a ti men lai: “Puai na tuah lo ti cu ka hngalh ko nain laksawng pek kaan duh i a si.” Anih nih dawtnak langhter a duh caah a si men lai. Asinain na zumhnak hneksak a duhmi a si maw asiloah mah puai ah telter aan duhmi dah a si ti kha na ruah a hau. Na ruah dih hnuah laksawng ka cohlang lai maw, cohlang lai lo ti cu nangmah cungah aa hngat. Kan biakhiahnak kip ah a thiangmi chiaṭha thleidannak lungthin ngeih kan duh i Jehovah cungah zumhfek tein um kan duh.—Lamkaltu 23:1.

Cawn dingmi 44 a kong 1 ah kir ding

 6. Chawnh Khawhmi Zawtnak

Mi pawl kha kan dawt hna caah zawtnak chawnh hna lo dingin kan i ralring. Chawnh khawhmi zawtnak kan ngei asiloah zawtnak kan i chawn i midang zong kan chawnh khawh hna tiah kan ruah ahcun kan i ralring chinchin. Mah Baibal nawlbia hi kan zulh: “Na minung hawi kha nangmah bangin va daw hna.”—Rom 13:8-10.

Zawtnak aa chawnmi pakhat nih midang cungah cu bantuk dawtnak kha zeitindah a langhter khawh? Zawtnak aa chawnmi pakhat nih kuh asiloah hnamh ti bantuk dawtnak langhter kha a tuah hmasa awk a si lo. Mi cheukhat nih an chungkhar pawl kha kilven an duh hna caah an inn ah len an sawm lo ahcun a thin a hun awk a si lo. Cun tipil a in hlanah tipil a ing ve dingmi midang kilven awkah an timhtuah khawh nakhnga a zawtnak kong kha Khrihfa upa phu i khuakhangtu sinah a chimh awk a si. Chawnhkhawhmi zawtnak a ngeimi pakhat nih mi pakhat a helh hlanah a thi kha aa check hmasa awk a si. Cutin a tuahnak thawngin ‘midang duhning kha hmuh thiam aa zuam i amah duhnak lawng a ruat lo’ ti kha a langhtermi a si.—Filipi 2:4.

Cawn dingmi 56 a kong 2 ah kir ding

 7. Rian Le Upadi Lei Kongkau

Unau dang he hnatlaknak kan ngeih cang hmanhah tangka le rian kong he aa tlaiin kan hnatlaknak dihlak kha ca in kan ṭialnak thawngin buaibainak tampi kan kilven khawh. (Jeremiah 32:9-12) Asinain Khrihfa hna nih tangka asiloah a dang kong he aa tlaiin a caan ah pakhat le pakhat an ruahnak aa khat men lai lo. Cucaah aa khat lomi an ruahnak kong kha anmah pahnih lawngin khulrang tein le dai tein an tawnghtham colh awk a si.

Asinain hlennak asiloah thangchiatnak ti bantuk a biapimi kongkau he aa tlaiin zeitindah kan tawnghtham awk a si? (Matthai 18:15-17 rel.) Jesuh nih kan tuah awk a simi a kong pathum a kan chimh:

1. Thil sining kha nanmah tein tawnghtham awkah i zuam u.—Caang 15 zoh.

2. Na hlawh a tlin lo ahcun Khrihfabu chung i nutling, patling a simi unau pakhat asiloah pahnih kha bawmhnak hal hna.—Caang 16 zoh.

3. Na tawnghtham khawh lo hnu lawngah Khrihfa upa pawl kha chim hna.—Caang 17 zoh.

Thil sining tam deuh ah unau pawl kha biaceihnak zungah kan chuahpi hna awk a si lo. Zeicahtiah mah nih Jehovah le Khrihfabu kha a hnorsuan khawh hna caah a si. (1 Korin 6:1-8) Asinain thil sining cheukhat cu upadi ningin tuah a hau kho men. Mah cu i maknak, fale zohkhenhnak, makmi nupi pek dingmi, aamahkhaan in liamh dingmi, bank kharnak asiloah rovuih ca ti bantuk kongkau hna an si. Khrihfa pakhat nih cu bantuk kong ah upadi lei in tawnghtham awkah a si khawh chungin aa zuammi cu Baibal ruahnak cheuhnak a ralchanhmi a si lo.

Khrihfa pakhat nih tlaihhremnak, ngakchia ningcang loin tuaitamnak, kutthlaknak, firnak, thahnak ti bantuk zaangennak kong he aa tlaiin nawlngeitu hna sinah report a tuahmi cu Baibal ruahnak cheuhnak a ralchanhmi a si lo.

Cawn dingmi 56 a kong 3 ah kir ding