CAWN DINGMI 50
Na Innchungkhar Kha Zeitindah Na Nuamhter Khawh?—Ṭhen 2
Fale cu Jehovah sinin hmuhmi laksawng an si. Jehovah nih mah laksawng kha nulepa nih ṭha tein zohkhenh hna seh ti a duh. Cucaah nulepa nih cutin an tuah khawh nakhnga a ṭhami ruahnak a cheuh hna. Cun an chungkhar a nuamh khawh nakhnga fale nih zeidah an tuah khawh timi kong he aa tlai zongin ruahnak a cheuh hna.
1. Jehovah nih nulepa kha zei ruahnak dah a cheuh hna?
Nulepa nih an fale kha daw hna sehlaw anmah he caan tampi hmangṭi hna seh ti kha Jehovah nih a duh. Cun an fale kha ṭih a nungmi thil in kilveng hna sehlaw Baibal phunglam ningin cawnpiak hna seh ti zong a duh. (Phungthlukbia 1:8) Jehovah nih pale kha hitin a ti hna: “Nan fale kha . . . Khrihfa ziaza . . . he tu ṭhanter hna u.” (Efesa 6:4 rel.) Fale an zohkhenh hna tikah a lamhruainak kha an zulh i mah rian kha midang an pek hna lo ahcun Jehovah cu aa lawm lai.
2. Jehovah nih fale kha zei ruahnak dah a cheuh hna?
Jehovah nih fale kha hitin lamhruainak a pek hna: “Nan nu le nan pa kha upat hna u.” (Kolose 3:20 rel.) Fale nih nulepa nawl an ngaih tikah Jehovah le nulepa lung kha an lawmhter. (Phungthlukbia 23:22-25) Jesuh nih a ngakchiat lioah zohchunhawk ṭha a chiah. Anih cu mitling a si ko nain a nu le a pa kha an nawl a ngaih hna i a upat hna.—Luka 2:51, 52.
3. Nan chungkhar ningin Pathian kha zeitindah nan naih khawh?
Nulepa na si ahcun nangmah bantukin na fale nih Jehovah kha daw hna seh ti na duh ko lai. Mah hmuitinh kha zeitindah na phanh khawh? Mah Baibal chimmi ningin na tuahnak thawngin a si: “Na fale kha fel tein [Jehovah bia kha] na cawnpiak hna lai i, na innchung i na ṭhut ah siseh, lam i na kal ah siseh . . . na chimh lengmang hna lai.” (Deuteronomi 6:7) “Lengmang” timi cu atu le atu cawnpiak kha a si. Na fale nih an i cinken khawh nakhnga atu le atu na chimh hna a hau. Mah Baibal caang ningin na fale kha caanṭha na hmuh fatin Jehovah kong kha na cawnpiak hna a hau. Zarh fatin chungkhar ningin Baibal hlathlai awkah a caan pek cu a ṭha tukmi a si. Fa a ngei lomi na si zongah Baibal hlathlai awkah zarh fatin a caan na peknak thawngin ṭhathnemhnak na hmu kho.
TAM DEUH IN HLATHLAI
A nuammi le a himmi chungkhar si awkah zulhawk a tlakmi ruahnak cheuhnak hna kha hlathlai.
4. Nan fale kha dawtnak he cawnpiak hna u
Fale cawnpiak cu a har kho. Baibal nih zeitindah aan bawmh khawh? Jeim 1:19, 20 rel law mah biahalnak hna hi i ruah u:
-
Nulepa nih an fale he bia an i ruah tikah zeitindah dawtnak an langhter khawh?
-
Nulepa nih an thin a hun lioah an fale kha zeicah an chimhhrinh hna awk a si lo? a
5. Nan fale kha kilveng hna u
Na fale kilven awkah fale pakhat cio nupa sinak kong chimh cu a biapi tukmi a si. Asinain mah cu a har kho men. VIDEO kha piah, cun a tanglei biahalnak hna hi i ruah u.
-
Nulepa cheukhat caah an fale sinah nupa sinak kong chim cu zeicah a har?
-
Nulepa cheukhat nih an fale kha zei ti lam in dah nupa sinak kong an chimh hna?
Baibal ah a chimchung bantukin Satan vawlei cu a ṭha lo chinchin cang. 2 Timote 3:1, 13 rel law mah biahalnak hi i ruah u:
-
Caang 13nak ah langhtermi miṭhalo cheukhat nih ngakchia pawl kha an tlaihhrem hna. Cucaah nulepa nih an fale nupa sinak kong le mah tlaihhremtu hna kut in an i kilven khawh nakhnga cawnpiak cu zeicah a biapit?
Na hngal maw?
Jehovah Tehte Hna nih an fale nupa sinak kong cawnpiak awk le tlaihhremtu hna kut in kilven awkah nulepa caah bawmtu a simi cauk tampi an chuah. Tahchunhnak ah:
-
Nan Fale Kha Huhphenh Hna U (video)
-
“Nupa Sinak Kong He aa Tlaiin Fale Cawnpiaknak” (2016, I Hlau! No. 5, [Myanmar])
6. Nan nu le nan pa kha upat hna u
Ngakchia le kumhra fai hna nih nulepa an upat hna kha an biachim ningin an langhter khawh. VIDEO kha piah, cun a tanglei biahalnak hna hi i ruah u.
-
Nulepa upat tein chawnhbiak cu zeicah a ṭhat?
-
Nulepa na upat hna kha na biachim ningin zeitindah na langhter khawh?
Phungthlukbia 1:8 rel law mah biahalnak hi i ruah u:
-
A nu le a pa nih lamhruainak an pek tikah mino pakhat nih zeitindah a lehrulh awk a si?
7. Chungkhar ningin Jehovah kha bia u
Jehovah Tehte a simi chungkhar hna nih zarh fatin i pumhṭi awkah a caan an pek. Chungkhar pumhnak kha zeitindah an tuah? VIDEO kha piah, cun a tanglei biahalnak hna hi i ruah u.
-
Chungkhar Pumhnak kha zeitindah hmaan tein tuah khawh a si?
-
Nulepa nih chungkhar pumhnak kha aa tlakmi le a nuammi a si nakhnga zei hna dah an tuah khawh?—Mah cawn dingmi i a hmasa bik hmanthlak ah zoh.
-
Hmunkhat ah hlathlainak tuahṭi cu zeicah a har khawh?
Hlanlio Israel mi hna nih an chungkhar pawl kha Baibal kong hmaan tein an cawnpiak hna lai tiah Jehovah nih aa ruahchan. Deuteronomi 6:6, 7 rel law mah biahalnak hi i ruah u:
-
Mah phunglam hi zeitindah na zulh khawh?
Chungkhar pumhnak caah ruahnak cheuhnak
-
Khrihfabu pumhnak caah i timtuah u.
-
Nan chungkharmi nih an duh dingmi Baibal tuanbia kha rel u law i ruahṭi u.
-
Mino ngakchia na ngeih ahcun jw.org ah taarmi ngakchia caah tuahchunhnak hna timi kha download tuah asiloah print tuah.
-
Kumhra fai ngakchia na ngeih ahcun jw.org ah taarmi kumhra fai hna caah timi capar pakhat kha i ruahṭi u.
-
Nan fale he Baibal tuanbia pakhat kong kha tuahchun u.
-
JW.ORG ah taarmi video pakhat kha zoh u law i ruahṭi u.
MI CHEUKHAT CHIMMI: “Ngakchia caah Baibal cu hngalhthiam awkah a har tuk.”
-
Zeitindah na leh lai?
A TAWINAK
Nulepa nih an fale kha daw hna seh, cawnpiak hna sehlaw kilveng hna seh ti kha Jehovah nih a duh. Cun fale nih an nu le an pa kha upat hna seh, an nawl ngai hna sehlaw an chungkhar he hmunkhat ah ka biaṭi hna seh ti zong a duh.
I Ruahṭi Ṭhannak
-
Nulepa nih an fale kha zeitindah an cawnpiak khawh hna i an kilven khawh hna?
-
Fale nih an nu le an pa an upat hna kha zeitindah an langhter khawh?
-
Zarh fatin chungkhar pumhnak caah a caan peknak in hmuhmi ṭhathnemhnak cu zei hna dah an si?
HLATHLAI CHAP
Na fa kha upa a si tik caah zei hna dah na timhtuahpiak khawh?
“Ngakchia Nih Cawn An Herhmi A Kong Paruk” (2019, I Hlau! No. 2)
Kum upa an nu le an pa a zohkhenhmi hna caah zulhawk a tlakmi Baibal ruahnak cheuhnak kong kha hlathlai.
“Kum Upa a simi Nulepa Zohkhenhnak he aa tlaiin Baibal nih Zeidah a Chim?” (Website capar)
Fale zohkhenh ning a hngal lomi pa pakhat cu zeitindah pa ṭha pakhat a hung si timi kong kha hlathlai.
Jehovah Cawnpiakmi Ningin Kan Chungkhar Kha Kan Zohkhenh (5:58)
Pale nih an fapale he zeitindah an i pehtlaihnak an fehter khawh timi kong kha hlathlai.
“Pale Hna Nan Fapale He Zeitindah Naih Tein Nan Um Peng Khawh?” (Vennak Innsang capar)
a Baibal chung i ‘chimhhrinh’ timi bia nih ngakchia pakhat cawnpiak, lamhruai le a hmaan lomi a ruahnak asiloah a ziaza hna thlen awkah bawmh kha a chim duhmi a si. Mah cu volhpamh asiloah puarhrangpi in pehtlaih kha a si lo.—Phungthlukbia 19:18.
Mah Kong Hna Zong Hi Na Duh Khawh Men
ATU LE ATU AN HALMI BIAHALNAK
Jehovah Tehte Hna Tuahmi Baibal Cawnnak Program Cu Zeidah A Si?
Jehovah Tehte Hna nih man loin an tuahmi Baibal kong i ruahceihṭinak program ah zei bantuk Baibal lehnak paoh kha na hman khawh. Na chungkhar dihlak asiloah na hawile ahopaoh nangmah he cawn dingin na sawm khawh hna.
