Jehovah nih a kan ser lioah a ṭha tukmi laksawng a simi biachim khawhnak kha a kan pek. A caah mah laksawng kan hman ning cu a biapi maw? A biapi tuk. (Jeim 1:26 rel.) Cucaah mah biachim khawhnak laksawng kha Jehovah lung a lawmhtermi lam in zeitindah kan hman khawh?

1. Biachim khawhnak laksawng kha zeitindah kan hman awk a si?

Baibal nih “pakhat le pakhat thazaang i pe u law i bawm u” tiah a kan ti. (1 Thesalon 5:11) Thazaang pek a herhmi cheukhat kha na hngal hna maw? An tha a um deuh nakhnga zeidah na tuah khawh? Na caah a biapimi an si ti kha chim hna. An ṭhatnak kong zong kha na chimh khawh hna. Mi pakhatkhat thazaang a pe dingmi Baibal caang pakhat kha na ruat kho maw? Naa thim khawhmi Baibal caang tampi a um. Na chim ning nih midang kha thazaang tampi a pek khawh hna ti zong philhhlah. Cucaah zaangfahnak le nemnak he biachim awkah i zuam zungzal.—Phungthlukbia 15:1.

2. Zei bantuk biachim dah kan hrial awk a si?

Baibal nih hitin a ti: “Bia nan i ruah tikah mi ca ṭhatlonak bia hmang hlah u.” (Efesa 4:29 rel.) A chim duhmi cu mi pakhat lung fahter awkah a ṭhalomi bia asiloah zaangfahnak aa tel lomi bia hna kha kan chim awk a si lo tinak a si. Mi kong ceih le midang thang a chiattermi biachim zong kha kan hrial awk a si.—Phungthlukbia 16:28 rel.

3. Thazaang a pemi biachim awkah zeinihdah a kan bawmh lai?

Kan chimmi bia nih kan lung chungah a um taktakmi asiloah kan ruahmi kong kha a langhter tawn. (Luka 6:45) Cucaah a dingmi, a thiangmi, duh a nungmi le thangṭhat awk a tlakmi kong hna ruah awkah kan i zuam a hau. (Filipi 4:8) Cutin tuah awkah nuamhsaihnak le hawikom kha fimkhur tein kan i thim a hau. (Phungthlukbia 13:20) Mah nih bia kan chim hlanah a caan pe in ruah awkah a kan bawmh lai. Na chimmi bia ruangah midang zeitindah an um lai ti kha ruat. Baibal nih hitin a ti: “Ruat set loin chimmi bia nih cun nam chunh bangin mi a chunh, sihmanhsehlaw mifim bia nih cun hma kha a damter.”—Phungthlukbia 12:18.

 TAM DEUH IN HLATHLAI

4. Bia na chim tikah i ralring

A caan ah kan dihlak in a hnuah kan i ngaihchih ṭhan dingmi bia kha kan chim tawn. (Jeim 3:2) Galati 5:22, 23 rel law mah biahalnak hi i ruah u:

• Na biachim naa ralrin khawh nakhnga mah Baibal caang chung i zei sining hna ngeih awkah dah thla na cam khawh? Mah sining hna nih zeitindah aan bawmh khawh?

1 Korin 15:33 rel law mah biahalnak hi i ruah u:

• Naa thimmi na hawile le nuamhsaihnak cu na biachim ning cungah zeitindah huham an ngeih khawh?

Phungchimtu 3:1, 7 rel law mah biahalnak hi i ruah u:

• Zeitik caan ah dah dai tein um asiloah thil sining zoh in biachim cu a ṭhat?

 5. Midang ṭhatnak kong kha chim

6. Na chungkhar sin i bia na chim tikah nem tein chim

 A TAWINAK

Kan chimmi bia nih midang kha a bawmh khawh hna asiloah an lung a fahter khawh hna. Cucaah kan chimmi kong he aa tlaiin zeidah ka chim lai, zeitikah dah ka chim lai i zeitindah ka chim lai ti kha ṭha tein kan ruah a hau.

I Ruahṭi Ṭhannak

• Midang thazaang pek awkah zeitindah bia na chim khawh?

• Zei bantuk bia phun dah hrial na duh?

• Zaangfahnak bia le midang thazaang a pemi bia chim peng awkah zeinihdah a kan bawmh khawh?