Jesuh cu Khrihfabu lu a si. (Efesa 5:23) Tuchan ah Jesuh nih vancung in “zumhawk a tlakmi le a fimmi sal” kha hmangin a zultu pawl kha lam a hruai hna. (Matthai 24:45 rel.) Jesuh nih a thimmi mah “sal” pawl cu nawlngeihnak cheukhat an ngei ko nain Khrih nawl kha an ngaih i Khrih unau pawl caah rian an ṭuan. Mah sal cu ahote dah an si? Annih nih zeitindah an kan zohkhenh?

1. “Zumhawk a tlakmi le a fimmi sal” cu ahodah an si?

Jehovah nih a miphun pawl lamhruai awkah pa pakhat asiloah phu hmete pakhat kha a hman tawn hna. (Malakhi 2:7; Hebru 1:1) Jesuh a thih hnuah Jerusalem ah a ummi lamkaltu pawl le Khrihfa upa pawl nih lam an hruai hna. (Lamkaltu 15:2) Cu bantukin tuchan zongah Jehovah Tehte Hna i Uktu Bu tiah auhmi Khrihfa upa phu hmete nih lam an hruai ve hna. Annih nih thlarau rawl kha an kan pek i phungchim rianṭuannak ah lam an kan hruai. Mah phu cu Jesuh nih rian a pekmi hna “zumhawk a tlak i a fimmi sal” an si. (Matthai 24:45a) Uktu Bu chungtel dihlak cu thlarau in chiti thuhmi an si i vawlei an nunnak a dih tikah Khrih he vancung Pennak ah uktu an ṭuanṭi lai.

2. Zumhawk a tlakmi sal nih zei bantuk thlarau rawl dah an kan pek?

Jesuh nih zumhawk a tlakmi sal nih ‘a sal hawi [zumtu khat unau] kha a caan hmaan tein rawl an pek hna’ lai tiah a ti. (Matthai 24:45b) Kan eimi rawl nih kan pum a ṭhawnter i kan ngan a damter bantukin Baibal lamhruainak a simi thlarau rawl zong nih Jehovah cungah zumhfek tein um awk le Jesuh nih a kan pekmi rian ṭuan khawh awkah kan herhmi thazaang a kan pek. (1 Timote 4:6) Thlarau rawl kha pumhnak, peng civui, pengkomh civui, Baibal hrambunhmi cauk le video hna in kan hmuh. Mah nih Pathian duhnak hngalhthiam awk le amah he kan i pehtlaihnak fehter awkah a kan bawmh.

 TAM DEUH IN HLATHLAI

3. Jehovah miphun pawl cu dirh an si

Jesuh lamhruainak tangah Uktu Bu nih Jehovah Tehte Hna i rian kha an dirh. Hmasa Khrihfa hna zong cu bantukin dirh an si ve. VIDEO kha piah.

1 Korin 14:33, 40 rel law mah biahalnak hi i ruah u:

• Jehovah nih a Tehte pawl cu dirh si hna seh ti a duh kha mah Baibal caang nih zeitindah a langhter?

4. Zumhawk a tlakmi sal nih phungchimnak rian kha an dirh

Hmasa Khrihfa hna caah phungchim cu a biapi tukmi rian a rak si. Lamkaltu 8:14, 25 rel law mah biahalnak hna hi i ruah u:

• Hmasa Khrihfa hna kha phungchim rianṭuannak ah aho nih dah lam a hruai hna?

• Lamkaltu pawl lamhruainak kha Peter le Johan nih zeitindah an lehrulh?

Phungchim rian cu Uktu Bu nih an dirhmi a biapi bikmi rian a si. VIDEO kha piah.

 Jesuh nih phungchim a biapitnak kong kha a hleiin a chim. Marka 13:10 rel law mah biahalnak hna hi i ruah u:

• Uktu Bu caah phungchimnak rian cu zeicah a biapit tuk?

• Vawleicung pumpi ah mah rianṭuannak dirh awkah “zumhawk a tlakmi le a fimmi sal” kha zeicah kan herh hna?

5. Zumhawk a tlakmi sal nih lam an kan hruai

Uktu Bu nih vawleicung pumpi ah a ummi Khrihfa hna kha lam an hruai hna. Zeitindah bia an khiah i lam an hruai hna? Hmasa Khrihfa hna i uktu bu nih cutin zeitindah an rak tuah timi kong kha ruat. Lamkaltu 15:1, 2 rel law mah biahalnak hna hi i ruah u:

• Hmasa Khrihfa cheukhat cu zei kong ah dah bia an rak i al?

• Mah kong tawnghtham awkah Paul, Barnabas le unau cheukhat cu aho sinah dah an kal?

Lamkaltu 15:12-18, 23-29 rel law mah biahalnak hi i ruah u:

• Hmasa uktu bu nih biakhiahnak an tuah hlanah Pathian lamhruainak hmuh awkah zeidah an tuah?—Caang 12, 15 le 28 ah zoh.

Lamkaltu 15:30, 31 le 16:4, 5 rel law mah biahalnak hna hi i ruah u:

• Hmasa Khrihfa hna nih uktu bu lamhruainak kha zeitindah an lehrulh?

• Nawl an ngaih caah Jehovah nih zeitindah thluachuah a pek hna?

2 Timote 3:16 le Jeim 1:5 rel law mah biahalnak hi i ruah u:

• Tuchan ah tah Uktu Bu nih biakhiahnak an tuah hlanah khoika ah dah lamhruainak an kawl?

 A TAWINAK

Uktu Bu cu Khrih nih rian a pekmi “zumhawk a tlakmi le a fimmi sal” an si. Annih nih vawleicung pumpi ah a ummi Khrihfa hna kha lam an hruai hna i thlarau rawl an pek hna.

I Ruahṭi Ṭhannak

• “Zumhawk a tlakmi le a fimmi sal” cu aho nih dah rian a pek hna?

• Uktu Bu nih zeitindah an kan zohkhenh?

• Uktu Bu cu “zumhawk a tlakmi le a fimmi sal” an si tiah na zum maw?