CAWN DINGMI 57
Sualnak Ngan Na Tuah Sual Ahcun Zeitin?
Jehovah kha lungtak tein na dawt i a lung a fahter dingmi thil tuah kha na hrial ko nain a caan ah cun palhnak na tuah khawh men. Cun sualnak ngan hmanh na tuah khawh men. (1 Korin 6:9, 10) Sualnak ngan na tuah sual ahcun Jehovah nih aan dawt peng i lungtak tein ngaihthiam le bawmh aan duh ti kha philhhlah.
1. Jehovah ngaihthiamnak hmuh awkah zeidah kan tuah awk a si?
Jehovah a dawmi hna cu sualnak ngan an tuah sual tikah an ngaih a chia tuk. Asinain mah Jehovah biakam ruangah a miphun pawl cu hnemhnak an hmu: “Nan sualnak cu a sen in sen hna hmanh sehlaw hawhra bantukin an thiang hna lai.” (Isaiah 1:18) Cucaah lungtak tein kan i ngaihchih ahcun Jehovah nih a kan ngaihthiam lai. Zeitindah kan i ngaihchih lai? Kan rak tuahmi thil ruangah kan ngaih a chia tuk, a ṭhalomi thil kha kan tuah ti lo i Jehovah sinah ngaihthiam kan hal. Cun sualnak a kan tuahtertu a ṭhalomi ruahnak asiloah ziaza hna thlen awk le Jehovah i a thiangmi a phunglam ningin nun awkah kan i zuam.—Isaiah 55:6, 7 rel.
2. Sualnak kan tuah tikah Jehovah nih Khrihfa upa pawl hmangin zeitindah a kan bawmh?
Sualnak ngan kan tuah sual ahcun Jehovah nih “Khrihfa upa kha au hna u” tiah a kan ti. (Jeim 5:14, 15 rel.) Khrihfa upa hna nih Jehovah le a tuu pawl kha an dawt hna. Annih nih Jehovah he kan i pehtlaihnak a ṭhat ṭhan nakhnga an kan bawmh khawh.—Galati 6:1.
Sualnak ngan kan tuah sual tikah Khrihfa upa pawl nih zeitindah an kan bawmh? Khrihfa upa pahnih asiloah pathum nih Baibal ruahnak cheuhnak hmangin an kan chimhhrinh lai. Cun sualnak kan tuah ṭhan ti lo nakhnga zulhawk a tlakmi ruahnak an kan cheuh lai i tha an kan pek lai. Cun ṭih a nungmi a tuahsernak in Khrihfabu kilven awkah Khrihfa upa pawl nih sualnak ngan a tuah i aa ngaichih duh lomi kha buchung in an chuah lai.
TAM DEUH IN HLATHLAI
Sualnak ngan kan tuah sual ahcun Jehovah nih a kan bawmh ning cungah kan i lawmhnak zeitindah kan langhter khawh timi kong kha hlathlai.
3. Sualnak phuannak nih Jehovah he a ṭhami pehtlaihnak a kan ngeihter ṭhan
Sualnak kan tuah tik paohah Jehovah kha a lung kan fahter caah kan sualnak kha a sinah kan phuan a hau. Salm 32:1-5 rel law mah biahalnak hi i ruah u:
-
Sualnak kha thuh awkah i zuam nakin Jehovah sinah phuan cu zeicah a ṭhat deuh?
Kan sualnak kha Jehovah sinah kan phuan lengah Khrihfa upa sinah bawmhnak kan hal hna tikah kan lung a nuam deuh. VIDEO kha piah, cun a tanglei biahalnak hi i ruah u.
-
Mah video ah Khrihfa upa pawl nih Canon kha Jehovah sinah kir ṭhan dingin zeitindah an bawmh?
Khrihfa upa pawl sinah a hmaan ning tein le a sining tein kan chimh hna a hau. Annih cu kanmah bawmh awkah timhcia an si. Jeim 5:16 rel law mah biahalnak hi i ruah u:
-
A hmaan ning tein kan chim tikah Khrihfa upa pawl caah kanmah bawmh kha zeicah a fawi deuh?
Na sualnak kha phuang, Khrihfa upa pawl kha a hmaan ning tein chim hna law dawtnak aa telmi Jehovah bawmhnak kha cohlang
4. Jehovah nih sualnak ngan a tuahmi hna cung ah zaangfahnak a langhter
Sualnak ngan a tuahmi pakhat nih Jehovah phunglam kha a zulh duh lo ahcun Khrihfabu chungin chuah a si lai. Amah he naih tuk in kan i kom lai lo. 1 Korin 5:6, 11 rel law mah biahalnak hi i ruah u:
-
Thilnu nih chang nawnmi a thawhter khawh bantukin aa ngaichih lomi sualnak a tuahmi hna he naih tein i komhnak nih Khrihfabu kha zeitindah a hnorsuan khawh?
Sualnak a tuahmi mitling lomi hna cungah Jehovah a zaangfahnak kha i zohchunh in Khrihfa upa hna nih buchung in chuahmi hna kha an bawmh hna. Buchung in chuahmi tampi cu Khrihfabu ah an kir ṭhan. Zeicah? Buchung chuah cu lung a fak ko nain mah nih an tuahmi sualnak cu a ṭhalomi a si ti kha a hngalhter hna caah a si.—Salm 141:5.
Jehovah nih sualnak a tuahtu a pehtlaih hna ning in amah cu a tlarimi le dawt zaangfahnak a ngeimi a si kha zeitindah a langhter?
5. Kan i ngaihchih tikah Jehovah nih a kan ngaihthiam
Mi pakhat aa ngaichih tikah Jehovah cu zeitindah a um timi kong hngalhthiam awkah Jesuh nih tahchunhnak pakhat hmangin a fianter. Luka 15:1-7 rel law mah biahalnak hi i ruah u:
-
Mah tahchunhnak nih Jehovah kong zeidah aan cawnpiak?
Ezekiel 33:11 rel law mah biahalnak hi i ruah u:
-
Ngaihchihnak ah zei a biapimi kong dah aa tel?
Tuukhal bantukin Jehovah cu a miphun cungah zawnruahnak taktak a ngei
MI CHEUKHAT CHIMMI: “Ka sualnak kha Khrihfa upa sinah ka phuan ahcun buchung chuah ka si lai ti ka phang.”
-
Cutin a ruatmi pakhat kha zeitindah na chimh lai?
A TAWINAK
Sualnak ngan kan tuah sual hmanhah kan i ngaihchih taktak i mah a ṭhalomi thil kha kan tuah ti lo ahcun Jehovah nih a kan ngaihthiam lai.
I Ruahṭi Ṭhannak
-
Jehovah sinah kan sualnak phuan cu zeicah a ṭhat?
-
Kan sualnak ngaihthiam kan si nakhnga zeidah kan tuah a hau?
-
Sualnak ngan kan tuah sual ahcun Khrihfa upa pawl sinah zeicah bawmhnak kan hal hna awk a si?
HLATHLAI CHAP
Isaiah 1:18 ah a langhtermi Jehovah zaangfahnak a hmumi pa pakhat kong kha hlathlai.
Khrihfa upa pawl nih sualnak ngan a tuahtu hna kha zeitindah an bawmh hna?
“Sualnak a Tuahtu Cung ah Dawtnak le Zaangfahnak Langhter Khawh Ning” (2024, August, Vennak Innsang)
Aa ngaichih lomi sualnak a tuahtu hna cungah dawtnak le zaangfahnak langhter khawh ning kha ruathmanh.
“Khrihfabu Chung in Chuah A Simi Hna caah Bawmhnak” (2024, August, Vennak Innsang)
“Jehovah Sinah Ka Kir Ṭhan A Hau” timi capar ah biatak a kaltakmi pa pakhat Jehovah sinah a kir ṭhan ning kong kha hlathlai.
Mah Kong Hna Zong Hi Na Duh Khawh Men
ATU LE ATU AN HALMI BIAHALNAK
Jehovah Tehte Hna Tuahmi Baibal Cawnnak Program Cu Zeidah A Si?
Jehovah Tehte Hna nih man loin an tuahmi Baibal kong i ruahceihṭinak program ah zei bantuk Baibal lehnak paoh kha na hman khawh. Na chungkhar dihlak asiloah na hawile ahopaoh nangmah he cawn dingin na sawm khawh hna.
