A hmaanmi Khrihfa hna nih Jehovah an biaknak ah ahohmanh asiloah zei thil hmanh i dawnhkhanhter lo awkah biakhiahnak an tuah. Nang zong cutin na tuah ve lai ti cu a fiang ko. Jehovah nih na zumhfehnak kha a sunsak. (1 Chanrelnak 28:9 rel.) Zei bantuk thil sining ah dah Pathian cungah zumhfek tein um cu a har khawh? Zumhfek tein um awkah zeinihdah aan bawmh khawh?

1. Mi nih Jehovah cung i kan zumhfehnak kha zeitindah an hneksak khawh?

Mi cheukhat nih Jehovah kan biakmi ngolter awkah an i zuam lai. Cu bantuk thil kha ahote nih dah an tuah lai? Biatak a kaltakmi cheukhat nih kan zumhnak a rawh nakhnga Pathian bupi kong he aa tlaiin lihbia an chim. Annih cu zumhpialmi tiah auh an si. Biaknaklei hruaitu cheukhat zong nih ralring tein a um lomi hna nih biatak kha an kaltak nakhnga kan kong he aa tlaiin a hmaan lomi thawngpang hna kha an thlah. Ralchanhtu hna he bia i al, an cauk rel, an website ah luh asiloah an video hna zoh cu kan caah ṭih a nung tukmi a si. Zumhfek tein Jehovah a biami hna lampialter awkah aa zuammi hna kong he aa tlaiin Jesuh nih hitin a ti: “Annih cu nan hna i hnawh hna hlah u. Hruaitu mitcaw an si ko; mitcaw nih mitcaw kha a hruai ahcun an pahnih in khor ah an tla tawn.”—Matthai 15:14.

Kan hngalhmi pakhat nih Jehovah Tehte si ka duh ti lo tiah a ti ahcun zeitin? Kan hawi pakhat nih cutin a ti ahcun kan ngaih a chia tuk ko lai. Anih nih amah le Jehovah karah thimnak tuah dingin a kan hnek men lai. Zei dang vialte nakin Jehovah cungah zumhfek tein um awkah biakhiahnak kan tuah awk a si. (Matthai 10:37) Cucaah cu bantuk mi hna he i kom hlah u timi Jehovah nawlbia kha kan ngaih.—1 Korin 5:11 rel.

2. Zei bantuk pumpak biakhiahnak nih dah Jehovah cung i kan zumhfehnak kha a hneksak khawh?

Jehovah kan dawtnak nih a hmaan lomi biaknak he i pehtlaih lo awkah a kan forh. Cucaah kan rian, kan i telnak phu le kan tuahmi zei thil paohah a hmaan lomi biaknak he kan i pehtlaih awk a si lo. Jehovah nih hitin ralrin a kan pek: “Ka mi hna [a Liannganmi Babilon in] chuak tuah u.”—Biathlam 18:2, 4.

 TAM DEUH IN HLATHLAI

3. A hmaan lomi cawnpiaktu pawl kha i ralring hna

Jehovah bupi kong he aa tlaiin a hmaan lomi kong kan theih tikah zeitindah kan lehrulh awk a si? Phungthlukbia 14:15 rel law mah biahalnak hi i ruah u:

• Kan theihmi paoh zumh lo awkah zeicah kan i ralrin awk a si?

2 Johan 10 rel law mah biahalnak hna hi i ruah u:

• Zumhpialmi hna kha zeitindah kan pehtlaih hna awk a si?

• Zumhpialmi hna he direct in kan i pehtlaih lo hmanhah an cawnpiaknak he zeitindah kan hun i pehtlaih khawh?

• Amah kong asiloah a bupi kong he aa tlaiin a hmaan loin an chimmi kong kha kan ngaih ahcun Jehovah cu zeitindah a um lai tiah na ruah?

4. Unau pakhat nih sualnak a tuah tikah Pathian cungah zumhfek tein um peng

Khrihfabu ah mi pakhatkhat nih sualnak ngan a tuah ti kha kan hngalh ahcun zei rian dah kan ngeih? Pathian nih hlanlio Israel mi pawl a pekmi hna Nawlbia ah aa telmi phunglam pakhat kong kha ruathmanh. Levitikas 5:1 rel.

Mah Baibal caang ningin mi pakhatkhat nih sualnak ngan a tuah ti kha kan hngalh ahcun Khrihfa upa pawl sinah kan chimh hna awk a si. Asinain cutin kan tuah hlanah sualnak a tuahtu kha amah tein Khrihfa upa pawl sinah a sualnak phuan dingin kan forh ahcun zaangfahnak kan langhtermi a si lai. A phuan duh lo ahcun Jehovah cungah zumhfek tein um awkah kan hngalhmi kong kha Khrihfa upa pawl sinah kan chimh hna ding a si. Cutin kan tuahmi nih . . .

• Jehovah Pathian cungah a fekmi dawtnak kan ngei ti kha zeitindah a langhter?

• sualnak a tuahtu cungah a fekmi dawtnak kan ngei ti kha zeitindah a langhter?

• Khrihfabu unau pawl cungah a fekmi dawtnak kan ngei ti kha zeitindah a langhter?

 5. A Liannganmi Babilon in chuak u

 A TAWINAK

Jehovah cungah zumhfek tein um khawh peng awkah a cungah zumhfek tein a um lomi hna he i hawikomh kha kan hrial a hau. Cun a hmaan lomi biaknak he kan i pehtlaih lo zong a hau.

I Ruahṭi Ṭhannak

• Zumhpialmi hna cawnpiaknak kha zeicah kan zoh, kan rel asiloah kan ngaih awk a si lo?

• Jehovah Tehte si a duh ti lomi hna kha zeitindah kan pehtlaih hna awk a si?

• A hmaan lomi biaknak in chuak u timi ralrin peknak kha zeitindah kan ngaih khawh?