CAWN DINGMI 59
Hremnak Kha Zumhfek Tein Na Inkhawh
Khrihfa dihlak cu caan khatkhat ah ralchanhnak le hremnak kan tong kho. Mah ruangah kan thin a phan awk a si maw?
1. Hremnak kan tong lai tiah zeicah kan i ruahchan?
Baibal nih hitin a ti: “Khrih Jesuh he i pehtlai i Pathian nunning in nun a duhmi paoh cu hremnak an ing ko lai.” (2 Timote 3:12) Satan vawlei he aa pehtlaih lo caah Jesuh cu hremnak a rak tong. Kannih zong vawlei he kan i pehtlaih lo caah vawlei cozah le biaknaklei phu hna nih an kan hrem tikah kan khuaruah a har awk a si lo.—Johan 15:18, 19.
2. Hremnak caah zeitindah kan i timhtuah chung khawh?
Atu in Jehovah kan i bochannak kha kan fehter a hau. Nifatin thlacam awk le Baibal rel awkah a caan pe. Khrihfabu pumhnak ah hmaan tein i pum. Mah thil hna nih na chungkharmi hremnak i telin na tonmi hremhnak paoh kha ralṭha tein inkhawh awkah thazaang aan ngeihter lai. Hremnak a tong lengmangmi lamkaltu Paul nih hitin a ti: “Bawipa cu a ka bawmtu a si; zeihmanh ka ṭih lai lo.”—Hebru 13:6.
Hmaan tein phungchimnak ah i telnak zong nih ralṭhatnak a kan ngeihter khawh. Phungchimnak nih Jehovah i bochan awk le minung ṭih lo awkah a kan bawmh. (Phungthlukbia 29:25) Atu ah ral ṭha tein phung na chim peng ahcun cozah pawl nih kan rianṭuannak an khenkham tikah phungchim peng dingin timhcia na si kho lai.—1 Thesalon 2:2.
3. Hremnak kha zumhfek tein kan inkhawh ahcun zei ṭhathnemhnak dah kan hmuh lai?
Hremnak kan ton tikah kan i nuam lo nain mah hremnak hna kha zumhfek tein kan inkhawh tikah kan zumhnak cu a fek chin. Inkhawhnak kan ngei lo tiah kan ruah tikah Jehovah nih a kan bawmh caah amah he kan i naih chin. (Jeim 1:2-4 rel.) Sifah harnak kan ton tikah Jehovah cu a lung a fak ko nain zumhfek tein kan inkhawh tikah aa lawm. Baibal nih hitin a ti: “A hmaanmi thil nan tuahmi ruangah hremnak nan in ahcun Pathian nih thluachuahnak aan pek hna lai.” (1 Peter 2:20) Zumhfek tein kan um ahcun Jehovah nih vawlei thar ah zungzal nunnak laksawng a kan pek lai. Vawlei thar ah a ummi dihlak cu Jehovah a biami an si lai i annih cu ahohmanh nih an ralchanh ti hna lai lo.—Matthai 24:13.
TAM DEUH IN HLATHLAI
Hremnak kan ton tikah Jehovah cungah zumhfek tein um khawh ning kong le zumhfek tein a ummi hna kha Jehovah nih zeitindah laksawng a pek hna lai timi kong kha hlathlai.
4. Chungkhar ralchanhnak kha zumhfek tein na inkhawh
Jehovah kan biak tikah kan chungkharmi cheukhat nih an kan ralchanh lai ti kha Jesuh nih ṭha tein a hngalh. Matthai 10:34-36 rel law mah biahalnak hi i ruah u:
-
Chungkharmi pakhat nih Jehovah biak dingin bia a khiah tikah zeidah a cang kho?
Mah kong hngalh awkah, VIDEO kha piah, cun a tanglei biahalnak hi i ruah u.
-
Na rualchan asiloah na hawikom pakhat nih Jehovah na biakmi kha ngolter awkah aa zuam ahcun zeidah na tuah lai?
Salm 27:10 le Marka 10:29, 30 rel. Baibal caang pakhat cio nan rel dih hnuah mah biahalnak hi i ruah u:
-
Na chungkhar asiloah na hawile nih an in ralchanh tikah mah Baibal biakam nih zeitindah aan bawmh khawh?
5. Hremnak na ton hmanhah Jehovah kha bia peng
Ralchanhnak lakah Jehovah biak peng khawh awkah ralṭhatnak ngeih a hau. VIDEO kha piah, cun a tanglei biahalnak hi i ruah u.
-
Mah video nih zeitindah thazaang aan ngeihter?
Lamkaltu 5:27-29 le Hebru 10:24, 25 rel. Baibal caang pakhat cio nan rel dih hnuah mah biahalnak hi i ruah u:
-
Phungchim rianṭuannak asiloah pumhnak hna kha an khenkham hmanhah Jehovah biak peng cu zeicah a biapit?
6. Jehovah nih zumhfek tein inkhawh awkah aan bawmh lai
Kumkhua le hnulei sining aa khat lomi Jehovah Tehte Hna cu hremnak an ton hmanhah Jehovah kha zumhfek tein an biak peng. Zeinihdah a bawmh hna timi kong hngalh awkah, VIDEO kha piah. Cun a tanglei biahalnak hi i ruah u.
-
Mah video ah Jehovah Tehte Hna kha inkhawhnak ngeih awkah zeinihdah a bawmh hna?
Rom 8:35, 37-39 le 2 Korin 4:7 rel. Baibal caang pakhat cio nan rel dih hnuah mah biahalnak hi i ruah u:
-
Mah Baibal caang nih zei bantuk hneksaknak poah zumhfek tein na inkhawh ti kha zeitindah aan zumhter?
Matthai 5:10-12 rel law mah biahalnak hi i ruah u:
-
Hremnak na ton hmanhah zeicah naa nuamh khawh?
Jehovah Tehte tampi nih ralchanhnak kha zumhfek tein an inkhawh. Nang zong na inkhawh ve
MI CHEUKHAT CHIMMI: “Hremnak cu ka inkhawh lai tiah ka ruat lo.”
-
Zei Baibal caang nih dah inkhawh a si ko ti kha a zumhter khawh hna?
A TAWINAK
Hremnak kan ton hmanhah zumhfek tein amah kan biakmi kha Jehovah nih a sunsak. Jehovah bawmhnak thawngin kan inkhawh.
I Ruahṭi Ṭhannak
-
Khrihfa hna nih hremnak kan tong lai ti kha zeicah an i ruahchan awk a si?
-
Hremnak na ton tikah timhcia na si nakhnga atu ah zeidah na tuah khawh?
-
Zei bantuk hneksaknak na ton hmanhah Jehovah biak peng khawh a si ti kha zeinihdah aan zumhter?
HLATHLAI CHAP
Mino unaupa pakhat khoikalei hmanhah a ṭan lo caah thongthlak a si lioah inkhawhnak ngeih dingin Jehovah nih zeitindah a bawmh timi kong kha zoh.
Ralchanhnak an tong ko nain nuva tuahkhat nih kum tampi chung Jehovah kha zeitindah an biak khawh timi kong kha hlathlai.
Hremnak zeitindah ralṭha tein inkhawh a si timi kong kha hlathlai.
“Hremnak caah Atu in I Timtuah” (2019, July, Vennak Innsang)
Chungkhar ralchanhnak kha zeitindah kan hmuh awk a si i mah kha zeitindah kan tawnghtham khawh?
“Biatak nih ‘Daihnak si Loin Vainam a Tlunter’” (2017, October, Vennak Innsang)
Mah Kong Hna Zong Hi Na Duh Khawh Men
ATU LE ATU AN HALMI BIAHALNAK
Jehovah Tehte Hna Tuahmi Baibal Cawnnak Program Cu Zeidah A Si?
Jehovah Tehte Hna nih man loin an tuahmi Baibal kong i ruahceihṭinak program ah zei bantuk Baibal lehnak paoh kha na hman khawh. Na chungkhar dihlak asiloah na hawile ahopaoh nangmah he cawn dingin na sawm khawh hna.
