1, 2. Jehovah Pathian kha zeicah na dawt?

 PATHIAN na daw maw? A sinah naa pumpek cang a si ahcun na dawt tinak a si. Pathian kha a ṭha bikmi Hawikom in na hmuh men ko lai. Asinain nangmah nih na dawt hlan hmanhin Jehovah nih aan dawt cang. “Kannih nih Pathian kan dawt cu Pathian nih a kan dawt hmasa caah a si” tiah Baibal nih a ti.—1 Johan 4:19.

² Jehovah nih a kan dawt a langhternak lam vialte kha ruathmanh. Kan umnak ding caah aa dawh tukmi vawlei a kan pek i nunnak i nuamhpi awkah a herhmi thil vialte zong a kan pek. (Matthai 5:43-48; Biathlam 4:11) Amah he pehtlaihnak ṭha ngeihter a kan duh i a kong kan hngalh khawh nakhnga a kan bawmh. Baibal kan relmi cu Jehovah bia kan ngaihmi a si. Thla kan cammi cu Jehovah nih kan bia a ngaihmi a si. (Salm 65:1) A thiang thlarau in lam a kan hruai i thazaang a kan pek. (Luka 11:13) Sualnak le thihnak in kan luat khawh nakhnga a dawt tukmi a Fapa hmanh kha vawlei ah a rak thlah.—Johan 3:16; Rom 5:8 rel.

3. Jehovah he a ṭhami pehtlaihnak kha zeitindah kan kilven khawh?

³ Naa lawmhnak le na ngaihchiatnak aan hrawmmi na hawikom ṭha pakhat kong kha ruathmanh. Cu bantuk a fekmi hawikomhnak ngeih awkah cun i zuam a  hau. Kan ngeih khawhmi Hawikom lakah a ṭha bikmi, Jehovah he kan i hawikomhnak zongah cutin a si ve. Jehovah he kan i hawikomhnak cu zungzal in a hmun kho. Cucaah Baibal nih “Pathian dawtnak chungah khan um ko u” tiah a kan forh. (Judas 21) Cutin zeitindah kan tuah khawh? Baibal nih hitin a ti: “Pathian kan dawt ti cu a nawl kan zul tinak a si ko. Cun a nawlbia cu kan caah a har tuk lo.”—1 Johan 5:3.

4, 5. (a) “Pathian kan dawt” ti cu zei sullam dah a si? (b) Jehovah kha zeitindah na hun dawt khawh?

⁴ Baibal nih “Pathian kan dawt” tiah a ti tikah zeidah a chim duhmi a si? Mah cu Pathian nih a kan dawtnak kha si loin kanmah nih Pathian kan dawtnak kha a chim duhmi a si. Pathian cungah dawtnak na hun ngeih hmasa bik lio caan kha naa cinken ti maw?

⁵ Jehovah nih vawlei thar ah zungzal in nunter a ka duh ti na hun hngalh hmasa bik lioah zeitindah na um ti kha ruathmanh. Zungzal nunnak kan hmuh khawh nakhnga a tuahmi thil vialte le vawlei ah a Fapa a thlahnak thawngin a kan pekmi a sunglawi tukmi laksawng kong hna na hun hngalh. (Matthai 20:28; Johan 8:29; Rom 5:12, 18) Jehovah nih zeitluk in dah aan dawt ti kha na hngalh tikah mah nih na lung aan suk lai i amah kha na hun dawt ve lai.—1 Johan 4:9, 10 rel.

6. Mi pakhat dawtnak ah zeidah aa tel? Pathian na dawtnak nih zei tuah awkah dah aan forh?

⁶ Asinain Pathian kan dawt timi intuarnak cu a thawknak lawng a si rih. Tahchunhnak ah, mi pakhat kha kan dawt tikah “kaan dawt tuk” timi bia  chim lawngin a za lo. Dawtnak nih amah a lung a lawmhtermi thil tuahter a kan duh. Cu bantukin Jehovah na dawtnak nih a lung a lawmhtermi lam in nun awkah aan forh ve ko lai. Jehovah na dawtnak a feh deuhdeuh tikah a sinah i pumpe in tipil in na duh ko lai. Cutin na tuahnak thawngin Jehovah biak zungzal awkah bia naa kam. (Rom 14:7, 8 rel.) Mah na biakam ningin zeitindah na tuah khawh?

7. Jehovah kha kan dawt ahcun zeidah kan tuah lai? A nawlbia cheukhat cu zei hna dah an si?

⁷ Jehovah kan dawt ti cu “a nawl kan zul tinak a si ko.” Jehovah nih zeitindah nunter a kan duh ti kha Baibal in kan hngalh. Tahchunhnak ah, zu rit, fir, lihchim, nu le pa sualnak, amah nakin midang asiloah thil dang biapi deuh ah chiah cu a palh ti kha a kan cawnpiak.—1 Korin 5:11; 6:18; 10:14; Efesa 4:28; Kolose 3:9.

8, 9. Cuset khaset timi Baibal nawlbia a um lomi thil sining ah Jehovah duhnak kha zeitindah kan hngalh khawh? Tahchunhnak pe.

⁸ Asinain Jehovah lungton awkah a nawlbia zulh lawngin a za lo. Jehovah nih thil sining kip he aa tlaiin nawlbia a kan pe lo. Cucaah cuset khaset tuah ding timi Baibal nawlbia a um lo caan hna a um ko lai. Mah tikah a ṭhami biakhiahnak zeitindah kan tuah khawh? (Efesa 5:17) Baibal ah phunglam pawl kan hmuh khawh, mah cu Jehovah hmuhning a kan cawnpiakmi a hrampi biatak kha a si. Baibal kan rel tikah Jehovah kha a um taktakmi in kan hun hngalh lai. Jehovah nih a duhmi le a huatmi thil hna telin a ruahning zong kan hngalh lai.—Salm 97:10 rel; Phungthlukbia 6:16-19; A Donghnak I Fianternak 1 ah zoh.

 ⁹ Tahchunhnak ah, kan zohmi TV asiloah Internet he aa tlaiin zeitindah biakhiahnak kan tuah khawh? Zei bantuk dah zoh ding ti kha a dikthliar in Jehovah nih a kan chim lo. Asinain a ṭhami biakhiahnak tuah khawh awkah a bawmmi phunglam hna a kan pek. Tuchan i nuamhsaihnak tam deuh cu puarhrannak le ziaza rawhralnak in a khat. Jehovah nih “zaang-ennak a duhmi hna kha a thinlung dihlak in a huat hna” i ‘nu le pa sualnak a tuahmi kha bia a ceih hna lai’ tiah Baibal nih a ti. (Salm 11:5; Hebru 13:4) Mah phunglam hna nih a ṭhami biakhiahnak tuah awkah zeitindah a kan bawmh khawh? Jehovah nih a huatmi thil le ziaza rawhralnak in a hmuhmi thil hna kan hngalh tikah mah kha kan hrial awk a si.

10, 11. Zeicah Jehovah nawl kan ngaih?

¹⁰ Zeicah Jehovah nawl kan ngaih? Dantatnak asiloah a ṭhalomi biakhiahnak ruangah a chuakmi buaibainak hna hrial khawhnak ca men ah a si lo. (Galati 6:7) Jehovah kan dawt caah a nawl kan ngaihmi a si. A pa lunglawmhter a duhmi ngakchia bantukin kannih zong vancung kan Pa, Jehovah lunglawmhter kan duh ve. Jehovah lung kan lawmhter timi hngalhnak nakin a ṭha deuhmi zeihmanh a um lo.—Salm 5:12; Phungthlukbia 12:2; A Donghnak I Fianternak 2 ah zoh.

¹¹ Jehovah nawl kha a fawi tik asiloah a dang thim ding a um lo tik lawngah kan ngaihmi a si lo. Cun a nawlbia le a phunglam hna kha a thim in kan i thim lo. (Deuteronomi 12:32) Mah canah “Na nawlbia cu ka duh hna caah na nawlbia zulh cu ka caah a nuam” tiah a chimmi salm caṭialtu bantukin lungthin dihlak in a nawl kan zulh. (Salm 119:47; Rom 6:17) Jehovah nih a fialmi vialte a tuahnak thawngin Jehovah a  dawtnak a langhtermi Noah bantuk si kan duh. Noah nih “Pathian nih a fialmi vialte cu a tuah dih” tiah Baibal nih a ti. (Genesis 6:22) Jehovah kha nangmah kong he aa tlaiin cutin chimter na duh ve maw?

12. Jehovah kha zeitindah a lung kan lawmhter khawh?

¹² A nawl kan ngaih tikah Jehovah cu zeitindah a um? A lung kan ‘lawmhter’ tiah Baibal nih a ti. (Phungthlukbia 11:20; 27:11) Nawlngaihnak kan langhter tikah van le vawlei Sertu cu aa lawm. Asinain cutin tuah awkah a kan hnek bal lo. Mah canah zalong tein thimnak nawl a kan pek. Mah cu a ṭhami asiloah a ṭhalomi tuah awkah zalong tein thimnak nawl kan ngei tinak a si. Jehovah nih a ṭha bikmi nunnak kan ngeih khawh nakhnga a ṭhami biakhiahnak tuahter a kan duh. Cutin tuah khawh awkah amah kan dawtnak nih forh hna seh ti a duh.—Deuteronomi 30:15, 16, 19, 20; A Donghnak I Fianternak 3 ah zoh.

13, 14. Pathian nawlbia cu zulh awkah a har tuk lo ti kha zeitindah kan hngalh? Tahchunhnak pe.

¹³ Jehovah nawlbia cu zulh awkah a har tuk asiloah kan zalonnak a hnorsuan tiah kan ruah ah tah zeitin? “A nawlbia cu kan caah a har tuk lo” tiah Baibal nih fiang tein a ti. (1 Johan 5:3) “A har” tiah lehmi Greek biafang cu “a rit” timi sullam a ngei. A dang Baibal ah mah biafang kha aa tlak lomi uknak asiloah midang uk awk le harnak pek awkah aa zuammi hna kong langhternak caah a hman tawn. (Matthai 23:4; Lamkaltu 20:29, 30) A dang Baibal lehnak (New English Translation) nih hitin a ti: “A nawlbia cu kan caah a ritmi a si lo.” Jehovah nawlbia cu “a rit” lo, phundang  cun zulh awkah a har tukmi a si lo. Jehovah nih a kan halmi cu a zungzal in a tlarimi a si.

¹⁴ Tahchunhnak ah, inn aa ṭhialmi na hawikom pakhat kha ka bawmh tiah na mitthlam ah cuanter hmanh. A thilri vialte kha kuang chungah a sanh hna. Kuang cheukhat cu an zaang i cawi awkah a fawi, asinain cheukhat cu an rih tuk caah mi pahnih in cawi a hau. Na hawipa nih a rit tukmi kuang hna kha nangmah tein cawi awkah aan fial lai maw? Aan fial hrimhrim lai lo. Zeicah? Na pum naa hrawh lai le naa khawn lai kha a duh lo caah a si. Mah hawikom bantukin Jehovah nih zulh awkah a har tukmi nawlbia hna kha zeitikhmanh ah a kan pe lai lo. (Deuteronomi 30:11-14) Jehovah nih kan sining kha a hngalhthiam. “Zei in dah ser kan si kha a hngalh i leidip men kan si kha a philh lo.”—Salm 103:14.

15. Jehovah nawlbia cu kanmah ṭhatnak caah a si tiah zeicah kan zumh khawh?

¹⁵ Moses nih Israel mi kha Jehovah nawlbia cu nan “ca ṭhatnak caah a si zungzal” i nan zulh ahcun nunnak nan hmuh lai tiah a ti hna. (Deuteronomi 5:28-33; 6:24) Tuchan zongah cutin a si ve. Jehovah pekmi nawlbia vialte cu kanmah ṭhatnak caah a si. (Isaiah 48:17 rel.) Kan Pa, Jehovah nih kan caah a ṭha bikmi kha a hngalh zungzal. (Rom 11:33) Baibal nih “Pathian cu dawtnak a si” tiah a ti. (1 Johan 4:8) Mah cu Jehovah chimmi le tuahmi vialte cu dawtnak forhfialnak thawngin a si tinak a si.

16. Mitlinglo kan si lengah hi chan ṭhalo ah kan nung ko nain Pathian nawl kan ngai kho ti kha zeitindah kan hngalh?

¹⁶ Pathian nawlngaih cu a zungzal in cun a fawi lai lo. Zeicahtiah Satan ukmi hi vawlei ṭhalo ah kan  nun caah a si. Mi nih ṭhatlonak an tuah nakhnga an cungah huham ngeih dingin Satan cu aa zuam. (1 Johan 5:19) Mah lengah Pathian nawlbia a kan buarter khomi, a tlinglomi kan ruahnak le kan duhnak zong doh a hau. (Rom 7:21-25) Asinain Jehovah kan dawtnak nih a hmaanmi thil tuah awkah thazaang a kan ngeihter khawh. A nawlngaih awkah kan i zuammi kha Pathian nih a hmuh tikah a thiang thlarau hmangin a kan bawmh. (1 Samuel 15:22, 23; Lamkaltu 5:32) Thiang thlarau nih Pathian nawlngaih awkah a fawitermi ziaza ṭha hna ngeih awkah a kan bawmh.—Galati 5:22, 23.

17, 18. (a) Hi cauk in zei kong dah kan hngalh hna lai? (b) A hnu ṭhen ah zei kong dah kan i ruah lai?

¹⁷ Hi cauk nih zeitindah Jehovah duhmi lam in kan nun khawh ti kha a kan hngalhter lai. Pathian phunglam le ziazalei phunglam kha kan nunnak ah zeitindah kan hman lai ti zong kan hngalh lai. Jehovah nih a nawl zulh awkah zeitikhmanh ah a kan hnek bal lo ti kha i cinken. Nawlngaihnak lam kha kan i thim ahcun atu ah thluachuah kan hmuh lai lengah hmailei zongah a ṭha tukmi ruahchannak kan ngei lai. A biapi bikmi cu a nawl kan ngaihmi nih zeitluk in dah Pathian kan dawt ti kha a langhter lai.—A Donghnak I Fianternak 4 ah zoh.

¹⁸ A hmaan le hmaanlo hngalh awkah Jehovah nih chiaṭha thleidannak lungthin a kan pek. Kan chiaṭha thleidannak lungthin kan cawnpiak ahcun mah nih ‘a nawl zulh’ awkah a kan bawmh lai. Cu a si ah chiaṭha thleidannak lungthin timi cu zeidah a si i zeitindah kan cawnpiak khawh? Mah kong kha a hnu ṭhen ah zoh hna u sih.