1, 2. Dingfel tein um awkah kan i zuammi kha Jehovah nih a hmuh tikah zeitindah a um?

 NIKHAT cu ngakchiapa pakhat nih sianginn in inn lei a ṭin lioah lam ah tangka khatlak in a ummi phaisa bawm pakhat kha a hmuh. Zeidah a tuah lai? Aa lak khawh ko. Asinain phaisa bawm a ngeitu kha a pek ṭhan. Mah kong kha a nu nih a theih tikah a fapa caah aa uangthlar tuk.

² Nulepa tampi cu an fale an dinfel tikah an i nuam tuk. Vancung kan Pa, Jehovah cu “zumhawktlakmi Pathian” a si caah kan dinfel tikah aa nuam tuk. (Salm 31:5) A lungton le ‘a hmaanmi thil tuah’ kha kan duh. (Hebru 13:18) Dingfel tein um awkah a harter khomi thil sining pali kha i ruah hna u sih. Cun dinfelnak nih a chuahtermi ṭhatnak cheukhat zong i ruah hna u sih.

3-5. (a) Kanmahle kanmah zeitindah kan i hlen khawh? (b) Kanmahle kanmah dingfel tein i hmuh awkah zeinihdah a kan bawmh lai?

³ Midang cungah dingfel tein kan um khawh nakhnga kanmahle kanmah cungah kan dinfel hmasa a hau. Mah cu a zungzal in cun a fawi lo. Kumzabu pakhatnak i Laodisia Khrihfabu nih Pathian lung  kan tong tiah an i ruat i anmahle anmah an i hleng. (Biathlam 3:17) Kannih zong zei bantuk minung dah kan si timi kongah kanmahle kanmah kan i hleng kho ve.

⁴ Zultu Jeim nih hitin a ti: “Mi pakhatkhat nih, kei cu biaknaklei ah aa zuammi ka si, tiah aa ruat ko lai, sihmanhsehlaw a lei kha a uk khawh lo ahcun a biaknak cu pakpalawng a si i amahle amah aa hlengmi a si.” (Jeim 1:26) Thilṭha cheukhat kan tuah ahcun kan puarhran, biaeng kan chim i lihbia kan chim zongah Pathian nih zei ah a rel lai lo tiah kan ruah ahcun kanmahle kanmah kan i hlenmi a si lai. Mahle mah i hlennak kha hrial awkah zeinihdah a kan bawmh khawh?

⁵ Thlalang kan i zoh tikah a lenglei kan muisam zeidah a lawh ti kha kan hmuh khawh. Baibal kan rel tikah kan chunglei minung cu zei bantuk dah a si ti kha kan hmuh khawh. Baibal nih kan ṭhawnnak le kan derthawmnak kha hngalh awkah a kan bawmh khawh. Kan ruahning, kan tuahserning le kan biachimning hna he aa tlaiin thlen a herhmi kha hngalh awkah a kan bawmh. (Jeim 1:23-25 rel.) Asinain chambaunak zeihmanh kan ngei lo tiah kan ruah ahcun kan ṭhangcho kho lai lo. Cucaah kanmahle kanmah dingfel tein i dothlat khawh awkah Baibal hman a hau. (Ṭahnak Hla 3:40; Haggai 1:5) Kan sining taktak in i hmuh khawh awkah thlacamnak zong nih a kan bawmh khawh. Rak ka hneksak law ka chambaunak kha hngal in thlennak ka tuah khawh nakhnga ka bawm tiah Jehovah sinah thla kan cam khawh. (Salm 139:23, 24) “Zeicahtiah mi lungthin ṭhalo cu BAWIPA caah fihnung an si i miding mi cu Pathian nih a zumhmi an si” ti kha kan hngalh.—Phungthlukbia 3:32.

6. Zeicah nuleva cu pakhat le pakhat cungah an dinfel awk a si?

⁶ Dinfelnak cu innchungkhar ah a biapi tukmi a si. Nuleva nih pakhat le pakhat cungah dingfel tein an um ahcun himnak le zumhnak an ngei lai. Lam tampi in innchungkhar ah dinfel lonak a um kho. Tahchunhnak ah, innchunghawi a ngei cangmi nih midang cungah velhlei dawtnak langhter, a thurhnawmmi hmanthlak zoh le a thli tein midang he i duh ti bantuk a hun tuah khawh. Salm caṭialtu chimmi mah bia hi i cinken: “Hlen hmangmi kha ka kom hna lo i mi hrokhrol zong kha ka kom hna lo.” (Salm 26:4) Na ruahnak  hmanhin na innchunghawi cungah na dinfel lo ahcun innchungkhar ah harnak a chuak kho.

7, 8. Fale nih dinfelnak man a ngeih zia an hngalhthiam nakhnga cawnpiak awkah Baibal kha zeitindah na hman khawh?

⁷ Fale zong nih dinfelnak cu a biapi ti kha an hngalh a hau. Nulepa nih Baibal hmangin an cawnpiak khawh hna. Baibal ah a dingfel lomi, zohchunh awk ṭha a si lomi hna kong zong kan hmuh khawh. Mah ah mifir a hung simi Akhan, tangka hmuh duh ah lihbia a chimmi Gehazi le tangka a fir i a hnuah ngun tangka 30 in Jesuh a rawitu Judas Iskariot ti bantuk an i tel.—Joshua 6:17-19; 7:11-25; 2 Siangpahrang 5:14-16, 20-27; Matthai 26:14, 15; Johan 12:6.

⁸ Cun Baibal ah a dingfelmi, zohchunh awk ṭha a simi hna kong zong kan hmuh khawh. Mah ah tangka khirh ṭhan awkah a fale a fialmi Jakob, Pathian cungah a biakam ningin a tuahmi Jepthah le a fanu, a harmi thil sining hmanhah dingfel tein a ummi Jesuh ti bantuk an i tel. (Genesis 43:12; Biaceihtu 11:30-40; Johan 18:3-11) Mah kong hna nih fale kha dinfelnak man a ngeih zia hngalhthiam awkah a bawmh khawh hna.

9. Nulepa an dinfelmi nih fale kha zeitindah a bawmh khawh hna?

⁹ Nulepa nih mah a biapimi Baibal phunglam in an cawn khawh: “Nannih midang a cawnpiaktu saya hna, zeicahdah nanmah cu nan i cawnpiak kun lo? ‘Fir hlah u,’ tiah phung a chimtu hna, zeicahdah nan fir kun?” (Rom 2:21) Nulepa nih an chimmi ningin an tuah lo tikah mah kha fale nih an hmuh. Kan fale kha dinfel dingin kan cawnpiak hna nain kanmah theng kan dinfel lo ahcun an lung aa tuai lai. Nulepa nih thil hmete kong hmanhah lihbia an chimmi kha an hngalh ahcun annih zong lihbia an chim ve men lai. (Luka 16:10 rel.)  Phundang cun nulepa an dinfelmi kha an hmuh ahcun anmah theng fa an hun ngeih tikah zumhawktlakmi nulepa si ve awkah a bawmh hna lai.—Phungthlukbia 22:6; Efesa 6:4.

10. Khrihfa unau pawl he bia kan i ruahnak ah zeitindah a dingfelmi kan si khawh?

¹⁰ Khrihfa unau cung zongah kan dinfel a hau. Biaruahnak cu kongceihnak le thangchiatnak lei hmanhah fawi tein aa thleng kho. A hmaan maw, hmaanlo ti kan hngalh lomi kong kha kan chim ṭhan ahcun lihbia a karhtermi kan si kho. Cucaah ‘bia i sum’ cu a ṭha deuh tukmi a si. (Phungthlukbia 10:19) Dinfelnak timi cu kan ruahmi, kan hngalhmi asiloah kan theihmi dihlak kha chim a hau tinak a si lo. Kan chimmi kong cu a hmaanmi a si hmanhah chim awkah aa tlak lomi a si kho. Cun kanmah he aa pehtlai lomi asiloah zawnruahnak ngeih lo bantuk a si kho. (1 Thesalon 4:11) Mi cheukhat nih puarhrangpi in bia chim kha “dinfel a si” tiah an ti. Asinain Jehovah miphun a simi nih cun kan biachimnak ah nemnak le zaangfahnak langhter zungzal kan duh.—Kolose 4:6 rel.

11, 12. (a) Sualnak a tuahmi nih a dinfel lo ahcun thil sining cu zeitindah a chiat chin khawh? (b) Zei biahalnak dah kan tuah khawh men? (c) Jehovah bupi cungah zeitindah kan dinfel khawh?

¹¹ Jehovah nih Khrihfa upa pawl kha Khrihfabu bawmh dingin rian a pek hna. Khrihfa upa pawl kha dingfel tein kan pehtlaih hna ahcun kanmah bawmh awkah an i fawih deuh lai. Zeicah? Na zaw i siibawi sin na kal tikah na intuar ning cheukhat kha chim loin na um lai maw? Na chim lo ahcun zeitindah aan bawmh khawh lai? Cu bantukin sualnak ngan kan tuah ahcun  mah kong he aa tlaiin lihbia kan chim awk a si lo. Mah canah Khrihfa upa sinah kal in dingfel tein kan chim awk a si. (Salm 12:2; Lamkaltu 5:1-11) A dang thil sining pakhat hi ruathmanh: Na hawikom pakhat nih sualnak ngan a tuahmi kha na hngalh ah tah zeitin? (Levitikas 5:1) “Hawikom ṭha taktak ka si ahcun mah hi ka thuhpiak lai maw?” tiah na ruah men lai. Asiloah a palhnak aa remh nakhnga le Jehovah he an i pehtlaihnak a ṭhat ṭhan nakhnga a herhmi bawmhnak pek awkah Khrihfa upa an um ti kha na hngal maw?—Hebru 13:17; Jeim 5:14, 15.

¹² Phungchim rianṭuannak report ti bantuk kan ṭial tik zongah Jehovah bupi cungah kan dinfel a hau. Hmaikal asiloah a dang rian pakhatkhat ca i form kan phih tik zongah kan dinfel a hau.—Phungthlukbia 6:16-19 rel.

13. Khrihfa unau pawl he rian kan ṭuanṭi tikah zeitindah kan dinfel khawh?

¹³ Khrihfa unau pawl nih biaknak le chawlehnak kha thleidan thiam a hau. Tahchunhnak ah, Biakinn asiloah phungchim kalnak ah chawlehnak kan tuah lo. Cun chawlehnak kongkau ah unau sinin caanṭha kan i lak lo. Unau pawl kha rian na pek hna ahcun a caan hmaan tein le na biakam ningin rianṭuan man na pek hna lai, cun upadi ningin an hmuh awk a simi zong kha na pek hna lai. Mah ah ngandamnak aamahkhaan asiloah rian dinh caan hna zong aa tel men lai. (1 Timote 5:18; Jeim 5:1-4) Cu bantukin unau pakhat sinah rian na ṭuan ahcun a hleiin pehtlaih ding kha i ruahchan hlah. (Efesa 6:5-8) Hnatlaknak nan tuahmi a caan ningin rian na ṭuan lai i pek na simi ṭuan man he aa tlak dingin na ṭuan lai.—2 Thesalon 3:10.

14. Unau pawl nih chawlehnak rian an ṭuanṭi tikah zeidah an tuah hmasa awk a si?

 ¹⁴ Unau pakhatkhat he chawlehnak rian kan ṭuanṭi ah tah zeitin? Mah rian caah tangka tampi pek asiloah tangka cawi ti bantuk hna aa tel kho men. Cu bantuk thil sining caah hman awk a tlakmi Baibal phunglam a um: Cabiahren ah a dikthliar in i ṭial kha a si. Profet Jeremiah nih lo a cawk tikah tehte hna hmaiah hnatlaknak cabiahren pahnih a ṭial i minsen a thutter hna. Cun mah kha hmailei i cherhchanhnak caah ṭha tein a fim. (Jeremiah 32:9-12; Genesis 23:16-20 zongah zoh.) Unau cheukhat nih cabiahren tuah cu unau zumh lo he aa lo tiah an ruah. Asinain hnatlaknak cabiahren tuahnak nih i theihsualnak, lungsilonak le lung i khahlonak hna um lo awkah a bawmh khawh. Chawlehnak tuah tik hmanhah Khrihfabu daihnak cu zei bantuk chawlehnak rian nakhmanh in a biapi deuh ti kha philhhlah.—1 Korin 6:1-8; A Donghnak I Fianternak 30 ah zoh.

15. Chawlehnak ah dinfel lonak kha Jehovah nih zeitindah a hmuh?

¹⁵ Jehovah Tehte a si lomi hna telin aho cung paohah kan dinfel awk a si. A dingfelmi si cu Jehovah caah a biapi tuk. “Cuai deu a hmangmi cu BAWIPA nih a huat hna, sihmanhsehlaw tahnak a hmaanmi cu a lawmhmi a si.” (Phungthlukbia 11:1; 20:10, 23) Baibal chan ah thil an i cawk tik le an i zuarh tikah cuaithlainak kha an hman tawn. Asinain chawlettu cheukhat nih thil a cawmi hna hlen awkah cuailung phunhnih le a hmaan lomi cuaithlainak kha an hman. Baibal chan bantukin tuchan chawlehnak zongah dinfel lonak kha hmuh khawh a si. Jehovah nih dinfel  lonak kha hlanah a rak huat bantukin tuchan zongah a huat.

16, 17. Zei bantuk dinfel lonak phun dah kan hrial awk a si?

¹⁶ Rian sok tik, cozah lei ca hna i form phih tik le camipuai phit tik ti bantuk hmun kip ah dinfel lo dingin lemsoi kan si kho. Mi tampi nih lihbia chim, biaperh asiloah a hmaan loin a phi pek cu a palh lo tiah an ruah. Mah ruangah kan khuaruah a har lo. Baibal nih ni hmanung bik caan ah mi cu ‘anmah zawn lawng aa ruatmi, a hak a kaumi, . . . ṭhatnak a huami’ an si lai tiah a chimchung.—2 Timote 3:1-5.

¹⁷ Tuchan vawlei ah a dingfel lomi hna cu a hlawh a tlingmi an lo men lai. (Salm 73:1-8) Khrihfa pakhat cu a dinfel ruangah rian in phuahnak, tangka hlennak le rianṭuannak ah puarhrang ngaiin pehtlaihnak hna hmanh a tong kho men. Asinain dinfelnak caah mahca ṭhatnak hlawt cu a phu tuk. Zeicah?

18. Minṭha cu zeicah a sunlawi tuk?

¹⁸ A dingfelmi, zumhawktlakmi le bochan awktlakmi tiin minṭha hmuh cu a sunglawi tukmi a si. Asinain hi vawlei ah cu bantuk mi hmuh cu a har cang. Cu bantuk minṭha hmuh awkah kan dihlak in caanṭha kan ngei. (Mikah 7:2) Na dinfel ruangah mi cheukhat nih an in nihsawh lai i mihrut ti hmanhin an in ti men lai. Asinain cheukhat nih cun na dinfelnak kha an sunsak lai i mah ruangah an in zumh lai. Vawleicung pumpi ah Jehovah Tehte Hna cu a dingfelmi in hngalh an si. Rianngeitu cheukhat nih Jehovah Tehte Hna cu an dingfel ti kha an hngalh caah rian pek an duh hna. A dang rianṭuantu hna cu an dinfel lo ruangah rian  phuah an si lioah Jehovah Tehte Hna cu rian phuah an si tawn lo.

19. Dinfelnak cu Jehovah he nan i pehtlaihnak ah zeitindah huham a ngeih?

¹⁹ Zeitik caan paohah dinfelnak nih a thiangmi chiaṭha thleidannak lungthin le lungdaihnak aan hmuhter lai. Hitin a ṭialtu Paul he kan i lo lai: “Kan chiaṭha thleidannak lungthin kha a thiang ko.” (Hebru 13:18) A biapi bikmi cu dawtnak a ngeimi kan Pa, Jehovah nih zeitik caan paohah dinfel dingin naa zuammi kha a hmuh lai i a sunsak lai.—Salm 15:1, 2; Phungthlukbia 22:1 rel.