1, 2. Pathian dawtnak chungah hmunh dingin zeidah kan tuah khawh?

 KAN dihlak in thazaang ṭhawng le ngandam tein um kan duh. Cucaah rawl thawmi kan ei, pum cawlcanghnak hmaan tein kan tuah i kan pum kha ṭha tein kan zohkhenh. Cutin tuahnak ah thazaang chuah a hau ko nain mah in ṭhatnak kan hmuh caah kan lung a dong lo. Asinain a dang lam zongin thazaang ṭhawn le ngandam a herh.

² Jehovah kha kan hngalh cang ko nain amah he kan i pehtlaihnak a feh chin nakhnga kan i zuam zungzal a herh. Judas nih Khrihfa pawl kha “Pathian dawtnak chungah khan um ko u” tiah a forh hna tikah zeitindah cutin um khawh a si ti zong a chimh hna. Hitin a ti: “Nannih cu a thiang bikmi nan zumhnak cungah khan fek chin lengmang in i sa chin lengmang ko u.” (Judas 20, 21) Cu a si ah zeitindah kan zumhnak cu kan fehter khawh?

3-5. (a) Jehovah phunglam he aa tlaiin Satan nih zeitindah ruahter aan duh? (b) Jehovah nawlbia le phunglam pawl kha zeitindah na hmuh?

³ Jehovah phunglam cu a ṭha bikmi a si ti kha kanmah theng nih zumh a biapi. Satan nih Pathian phunglam  cu zulh awkah a har tuk, cucaah a hmaan, hmaanlo kongah keimah tein biakhiahnak ka tuah ahcun kaa nuam deuh lai tiah ruahter aan duh. Mi nih cutin an zumh nakhnga Satan nih Eden dum in a rak i zuam. (Genesis 3:1-6) Tuchan tiang aa zuam peng rih.

⁴ Satan cu a hmaan maw? Jehovah phunglam hna cu zulh awkah a har tuk maw? A har tuk lo. Tahchunhnak ah, aa dawh tukmi pangpar dum ah lam ka leng tiah na mitthlam ah cuanter hmanh. Hmun pakhat cu haukulh sangpi in an kulhmi kha na hmuh. Mah tikah ‘Zeicah mah hau hi a um hnga?’ tiah na ruah men lai. Asinain mah lioah hau khatlei kam in chiandeih huk thawng kha na theih. Atu ah mah haukulh kha zeitindah na hmuh? Chiandeih rawl ah naa can nakhnga lo mah hau nih aan huhphenh caah naa lawm tuk lai. Jehovah phunglam hna cu mah haukulh he an i lo i Satan cu chiandeih he an i lo. Baibal nih hitin ralrin a kan pek: “Fim hring tein um u, ralring tein um u! Nan ral Khuachia cu seh awk kawl ah, chiandeih bangin a vak cuahmah ko.”—1 Peter 5:8.

⁵ Jehovah nih a ṭha bikmi nunnak ngeihter a kan duh. Satan nih a kan hlen lai kha a duh lo. Cucaah huhphenhnak le nuamhnak kan hmuh nakhnga nawlbia le phunglam pawl a kan pek. (Efesa 6:11) Jeim nih hitin a ṭial: “Mi a luattertu nawlbia tling chungah ṭha tein aa bih i cucu a ruat pengmi cu, . . . cu a tuahnak in lawmhnak a hmumi kha a si.”—Jeim 1:25.

6. Pathian phunglam hna cu a ṭha bikmi an si ti kha zeitindah kan zumh khawh?

⁶ Jehovah lamhruainak kan zulh tikah kan nunnak cu a ṭhangcho i amah he kan i hawikomhnak cu a fek chin. Tahchunhnak ah, a sinah atu le atu thlacam dingin  a kan sawmmi kan cohlannak thawngin ṭhatnak kan hmu. (Matthai 6:5-8; 1 Thesalon 5:17) Amah biak awkah hmunkhat ah i pum u, pakhat le pakhat tha i pe u timi lamhruainak kan zulh tik le phungchimnak le cawnpiaknak rian ah caantling in kan i tel tikah kan i nuam. (Matthai 28:19, 20; Galati 6:2; Hebru 10:24, 25) Mah thil hna nih kan zumhnak fehter zungzal awkah a kan bawmhning kan ruah tikah Jehovah phunglam hna cu a ṭha bikmi an si ti kha kan zumh chinchin.

7, 8. Hmailei ah kan ton khawhmi hneksaknak kong he aa tlaiin lungretheihnak kha hrial awkah zeinihdah a kan bawmh lai?

⁷ Hmailei ah ton khawhmi zumhnak hneksaknak hna cu an har tuk lai tiah kan thin a phang men lai. Cutin na ruah ahcun Jehovah chimmi mah bia hi i cinken: “Keimah cu BAWIPA nan Pathian, nan ca ṭhatnak cawnpiak aan duhtu hna le nan zulh awk hnga lam aan hmuhsaktu hna ka si. Ka nawlbia kha rak ngai u law, ti ka hei duh dah! Thluachuahnak cu nan caah, zeitikhmanh i a reu bal lomi tiva bantukin, a luan in a luang zungzal ko hnga! Ti kam a deng lengmangtu tilet bantukin teinak cu nan sinah a phan ko hnga!”—Isaiah 48:17, 18.

 ⁸ Jehovah nawl kan ngaih tikah kan hmuhmi daihnak cu zeitikhmanh ah a reu bal lomi tiva bantuk a si lai, cun kan dinnak cu tikam a deng lengmangmi tilet bantuk a si lai. Zeithil kan ton hmanhah zumhfek tein kan um kho. Baibal nih hitin bia a kan kamh: “Na thilrit cu BAWIPA sinah ṭhum ta law amah nih aan bawmh lai; miṭha cu zeitikhmanh ah a sunghter bal lai lo.”—Salm 55:22.

9, 10. Nutling pathling timi cu zei sullam dah a si?

⁹ Jehovah he nan i pehtlaihnak a feh tikah ‘nutling patling sinak leiah na ṭhangcho’ lai. (Hebru 6:1, NW) Nutling pathling timi cu zei sullam dah a si?

¹⁰ Kan kumkhua a upat ruang men ah nutling patling kan hung si lo. Nutling patling si awkah Jehovah cu kan Hawikom ṭha bik kan siter a hau i thil sining hna kha amah bantukin hmuh awkah kan i zuam a hau. (Johan 4:23) Paul nih hitin a ṭial: “An minung sining nih tuah u a ti hna ning paohin a nungmi cu minung sining nih a duhmi nih khan an lungthin cu a uk hna. Thlarau nih a chimh hna ningin a nungmi cu thlarau nih a duhmi nih khan an lungthin cu a uk hna.” (Rom 8:5) Nutling patling a simi nih cun a nunnak ah nuamhnak le thilri chawva hna kha biapi bik in a chia lo. Mah canah Jehovah biaknak kha biapi bik in a chiah i a nunnak ah a ṭhami biakhiahnak hna a tuah. (Phungthlukbia 27:11; Jeim 1:2, 3 rel.) Palhnak tuah awkah aa thlahdorh lo. A hmaanmi kha a hngalh i a hmaanmi ningin tuah awkah bia a khiah.

11, 12. (a) “Thleidan khawhnak” he aa tlaiin Paul nih zeidah a chim? (b) Khrihfa nutling patling sinak le zaang lentecelh a thiammi sinak cu zeitindah aa lawh?

¹¹ Nutling patling si awkah i zuam a hau. Lamkaltu  Paul nih hitin a ṭial: “Rawl taktak cu upa nih khan an ei khawh; annih cu chia le ṭha thleidan khawhnak a ngei [cawng, NW] cangmi an si.” (Hebru 5:14) ‘Cawn’ timi biafang nih zaang lentecelhnak cawnning kha kan lung ah a chuahter men lai.

¹² Lentecelh a thiammi pakhat kha kan hmuh tikah a thiamnak a ṭhancho nakhnga a caan pek in a cawn lai ti kha kan hngalh. Lentecelh a thiamciami in hrin a si lo. Bawhte pakhat nih a chuahka ah a kut le a ke zeitindah ka hman lai ti kha ṭha tein a hngal lo. Asinain a hnuah cun zeitindah thil ka tlaih lai ti le zeitindah lam ka kal lai ti kha a hun hngalh. Cawnnak nih zaang lentecelh a thiammi pakhat a hung siter khawh. Cu bantukin Khrihfa nutling patling si awkah a caan pek in cawn a hau.

13. Jehovah ruahning in ruah ve awkah zeinihdah a kan bawmh lai?

¹³ Zeitindah Jehovah ruahning in kan ruah khawh ve i thil sining kha Jehovah hmuhning in kan hmuh khawh ve ti kha hi cauk in kan hlathlai cang. Jehovah phunglam pawl kha sunsak awk le duh awkah kan rak cawn. Biakhiahnak kan tuah tikah hitin kan i hal kho: ‘Mah thil sining hi zei nawlbia asiloah zei Baibal phunglam he dah aa pehtlaih? Mah kha zeitindah ka zulh khawh? Jehovah nih zeidah tuahter a ka duh?’—Phungthlukbia 3:5, 6; Jeim 1:5 rel.

14. Zumhnak ṭhanter awkah zeidah kan tuah a hau?

¹⁴ Jehovah kan zumhnak kha kan ṭhanter zungzal. Ngandamnak a pemi rawl einak nih kan pum ṭhanter awkah a bawmh bantukin Jehovah kong hngalhnak nih kan zumhnak ṭhanter awkah a bawmh ve. Baibal kan hun hlathlai tikah Jehovah le a phunglam kong a hrampi biatak kha kan hun hngalh. Asinain caan a rauh deuh tikah a thuk deuhmi thil hna kan hngalhthiam a hau. Cucaah Paul nih “rawl taktak cu upa nih khan an ei  khawh” tiah a ti tikah mah kha a chim duhmi a si. Kan hngalhmi kha kan nunnak ah kan hmannak thawngin fimnak kan hmu. Baibal nih hitin a ti: “Fimnak cu a biapi bikmi a si.”—Phungthlukbia 4:5-7, NW; 1 Peter 2:2.

15. Jehovah le unau pawl dawt taktak cu zeitluk in dah a biapit?

¹⁵ Mi pakhat cu a ngan a dam i a ṭhawng men ko lai. Asinain cutin si peng awkah amahle amah ṭha tein aa zohkhenh peng a hau. Cu bantukin nutling patling a simi nih cun Jehovah he an i pehtlaihnak fehter peng awkah i zuam a hau ti kha a hngalh. Paul nih hitin ralrin a kan pek: “Nanmah le nanmah kha ṭha tein i hneksak u: zumhnak nunning khan a nungmi nan si maw? I hneksak tuah u.” (2 Korin 13:5) Asinain kan zumhnak a fehnak men in a za lo. Jehovah le unau pawl kan dawt hnanak kha ṭhanter zungzal a hau. Paul nih hitin a ti: “Hngalhnak . . . ka hei ngei ko hnga, . . . cun tlang ṭhial khawhnak zumhnak zong ka hei ngei ko hnga, sihmanhsehlaw dawtnak ka ngeih lo ahcun zeihmanh ka si lo.”—1 Korin 13:1-3.

16. Satan nih zeitindah ruahter a kan duh?

¹⁶ Satan nih zeitikhmanh ah Jehovah lung kan tong kho lai lo tiah ruahter a kan duh. Kan lungdong sehlaw kan tonmi buaibainak hna hi kan tawngtham kho lai lo tiah ruat hna seh ti a duh. Kan Khrihfa hawi cungah zumhnak ngei hna hlah sehlaw i nuam hna hlah seh ti a kan duh. (Efesa 2:2) A chiatnaklei in ruahnak nih kanmah cungah siseh, Pathian he kan i pehtlaihnak cungah siseh harnak a chuahter khawh ti kha Satan nih a hngalh. Asinain Jehovah nih a chiatnaklei in ruahnak kha doh khawh awkah a bawmmi thil pakhat a kan pek. Mah cu ruahchannak a si.

17. Ruahchannak cu zeitluk in dah a biapit?

 ¹⁷ 1 Thesalon 5:8 ah Baibal nih ruahchannak kha raldohnak ah ralkap nih a lu huhphenh awkah aa chinhmi thir luchin he a tahchunh, mah kha “khamh kan i ruahchannak” luchin tiah a ti. Jehovah biakam pawl i ruahchannak nih kan lungthin kha a huhphenh i a chiatnaklei in hmuhnak kha doh awkah a kan bawmh khawh.

18, 19. Ruahchannak nih Jesuh kha zeitindah thazaang a ngeihter?

¹⁸ Jesuh cu aa ruahchannak nih thazaang a ngeihter. Vawleicung a nunnak i hmanung bik zan ah a harmi thil sining kha pakhat hnu pakhat a ton. A hawikom pakhat nih a rawi. A dang pakhat nih ka hngal lo ti hmanhin aa pheh. A dang nih cun an kaltak i an zamtak. A miphun pawl nih an ralchanh, cun fakpi in hrem awk le thah awkah an fial hna. Cu bantuk a fak tukmi thil sining hna inkhawh awkah zeinihdah a bawmh? “Hmailei lunglawmhnak aa ruahchanmi ruangah khan  vailamcung i thih ningzahnak cu zeihmanh ah a rel lo i atu cu Pathian bawiṭhutdan orhlei kam ah khan a hung ṭhu cang.”—Hebru 12:2.

¹⁹ Jesuh nih zumhfek tein a umnak thawngin a Pa kha thangṭhatnak a hmuhter lai i Satan milihchim a si kha ka langhter khawh lai ti kha a hngalh. Mah ruahchannak nih lunglawmhnak nganpi a hmuhter. A rauhhlan ah vancung ah a Pa he kan i tong ṭhan cang lai ti zong a hngalh. Mah ruahchannak nih inkhawhnak a ngeihter. Jesuh bantukin kannih zong kan i ruahchannak ah lungthin kan pek ve awk a si. Mah nih zeithil a can hmanhah inkhawhnak ngeih dingin a kan bawmh lai.

20. A ṭhatnaklei in ruahnak ngeih awkah zeinihdah aan bawmh khawh?

²⁰ Jehovah nih zumhnak le inkhawhnak na ngeihmi kha a hmuh. (Isaiah 30:18; Malakhi 3:10 rel.) ‘Nan lungthli tum kha kaan pek hna lai’ tiah bia aa kam. (Salm 37:4) Cucaah naa ruahchannak cungah lungthin  pe zungzal. Satan nih ruahchannak na ngeihmi kha tlau sehlaw Jehovah biakam cu zeitikhmanh ah a tling lai lo tiah ruat seh ti aan duh. Asinain a chiatnaklei in ruahnak ngeih awkah zeitikhmanh ah awnh hlah. Ruahchannak na ngeihmi a zor ti na hmuh ahcun Jehovah sinah bawmhnak hal. Filipi 4:6, 7 bia hi i cinken: “Zeithil kong hmanhah lungrethei in um hlah u. Thla nan camnak ah Bawipa cu nan herhmi kha hal u law nan hal tikah lunglawm tein hal zungzal u. Cun Pathian daihnak, minung hngalhnak a lonhtu nih cun, Khrih Jesuh chungah nan lungthin le nan ruahnak cu him tein a chiah lai.”

21, 22. (a) Vawlei ca i Jehovah tinhnak cu zeidah a si? (b) Zei tuah awkah dah bia na khiah?

²¹ Lungcawlcangh awk ngai a simi hmailei ruahchannak kong kha ruah awkah a caan pe. A rauhhlan ah mikip nih Jehovah kha an biak cang lai. (Biathlam 7:9, 14) Vawlei thar nunnak kong kha ruathmanh. Kan ruah khawhmi lengin a ṭha deuh lai. Satan, a khuachia pawl le miṭhalo vialte cu an um ti lai lo. Zawtnak le thihnak zong a um ti lai lo. Mah canah nifate thazaang ṭhawngin na tho lai i nuam tein na nung lai. Mikip nih vawlei kha paradis in ser awkah hmunkhat ah rian an ṭuanṭi lai. Rawl thawthaw le a himmi hmun kha mikip nih an ngei cang lai. Mi pawl cu an puarhrang ti lai lo i pakhat le pakhat cungah dawtnak taktak an ngei cang lai. A donghnak ah vawleicung ah a ummi kip nih “Pathian fale hna luatnak a sunglawimi” kha an hmuh cang lai.—Rom 8:21.

²² Jehovah nih na Hawikom ṭha bik si a duh. Cucaah Jehovah nawl ngaih awk le nifate amah naih awkah na si khawh chungin i zuam. Kan dihlak in Pathian dawtnak chungah hmun zungzal hna u sih.—Judas 21.