Jehovah Pathian le a Bia Baibal a sunsak mi hna:

“Biatak cu nan hngalh lai i biatak nih cun aan luatter hna lai,” tiah Jesuh nih a ti. (Johan 8:32) Baibal biatak na hmuh hmasa bik lioah zeitindah na um ti kha ruathmanh. Hlenthawinak in a khatmi vawlei ah biatak kan hngalh khawhmi cu lungthawh awk taktak a si.—2 Timote 3:1.

Jehovah Pathian nih biatak hngalhter a kan duh. Cun kan minunghawi kha kan dawt hna caah mah kong kha chimh kan duh hna. Asinain Pathian biaknak ah mah lawngin a za lo. Jehovah phunglam hna kha kan upat caah Khrihfa nunning in nun awkah a si khawh chung i zuam a hau. Pathian kan dawtnak langhter khawhnak ah a biapi bikmi lam kha Jesuh nih a kan cawnpiak. Hitin a ti: “Ka Pa nawlbia kha ka ngaih i a dawtnak chungah ka um bantukte hin ka nawlbia nan ngaih ahcun kaan dawt hnanak chungah hin nan um ve lai.”—Johan 15:10.

Jesuh nih a Pa kha a dawt tuk caah a Pa nih a fialmi vialte kha a tuah dih. Kan nunning ah Jesuh kha kan i zohchunh ahcun Jehovah nih a kan dawt lai i nuamhnak taktak kan hmu lai. Jesuh nih hitin a ti: “Atu cu hi biatak hi nan hngalh cang; nan tuah taktak ahcun zeitluk in dik nan i lawmh lai!”—Johan 13:17.

Baibal biatak ningin nun awk le Pathian hawi si awkah hi cauk nih aan bawmh hna lai tiah kan i ruahchan. Pathian nan dawtnak ṭhanter awk le ‘Pathian dawtnak chungah um in zungzal nunnak’ hmuh awkah thla kan in campiak hna.—Judas 21.