Na thangṭhat i na dawt mi hawi pakhat na ngeih ahcun, amah bantukin si awk ah naa zuam lai. “Bawipa [“Jehovah,” NW] cu a ding i a ṭha” tiah Baibal nih a ti. (Salm 25:8) Pathian hawi si awk ah a ṭha mi le a ding mi kan si awk a si. Baibal nih hitin a ti: “Pathian dawt mi fa nan si caah amah a nawl kha cawng u . . . dawtnak in nung u.” (Efesa 5:1, 2, NW) Cutin tuah awk lam a cheu cu:

Midang kha bawmh. “[Mi vialte cungah] ṭhatnak tuah kha i zuam u.”​—Galati 6:10.

Rian i zuam. “Fir a hmang mi kha fir ti hlah seh, amah ca i dingte in . . . rian ṭuan seh.”​—Efesa 4:28.

Pumsa lei le ziaza lei in thiang. “Pum siseh, thlarau siseh, a thurhnomh tertu paohpaoh kha i thenh u sih law Pathian ṭih bute in um u sih.”​—2 Korin 7:1.

 Na innchung mi hna kha dawtnak le upatnak in zohkhenh hna. “Nan nupi le cu nan pum nan i dawt bantuk in nan dawt hna lai i nupi le nih nan va le cu nan hmaizah hna lai. Ngakchia hna, nan nule nan pa bia ngai hna u.”​—Efesa 5:33–6:1.

Midang cungah dawtnak langhter. “Dawtnak hi Pathian sinin a ra mi a si caah pakhat le pakhat i daw u sih.”​—1 Johan 4:7.

Ram upadi hna kha ngai. “[Acozah] nawl va ngai u . . . Pek awk a si mi kha va pe hna u . . . ngunkhuai siseh . . . pe hna u.”​—Rom 13:1, 7.