Pathian biak kha Satan le a khauchia hna nih an duh lo. Asikhawh ahcun mi vialte Pathian sin in pial hna seh ti an duh. Cutin tuah awk ah zeitindah an i zuam? Lam pakhat cu a hmaan lomi biaknak thawngin a si. (2 Korin 11:13-15) Biaknak pakhat nih Baibal chung i biatak kha a cawnpiak lo ahcun a hmaan lo a si. A hmaan lomi biaknak cu tangka deu bantuk a si​—a taktak mi a lo nain san a tlai lo. Mah nih cun harnak tampi a chuahter khawh.

Biaknak a hmaan lomi nih zeitik hmanhah biatak Pathian Jehovah lung a tong lai lo. Jesuh vawlei cung a um lio ah, amah thah a zalhmi biaknak bu pakhat a um. An biaknak ning cu a hmaanmi ning a si tiah an ruah. Annih nih “Pathian lawnglawng pei kan Pa a si ko cu” tiah an ti. Jesuh a hna a tla maw? A tla lo! Nannih cu “Nan pa Khuachia fa kha nan si” tiah a rak ti hna. (Johan 8:41, 44) Nihin ah mi tampi nih Pathian kan biak tiah an ruah, sihmanhsehlaw a taktak ahcun Satan le a khuachia hna kha an biak a si!​—1 Korin 10:20.

 A ṭha lomi thingkung nih a ṭha lomi thei a tlai bantukin a hmaan lomi biaknak nih mi ṭhalo pawl a chuahter. Minung nih an tuah mi thil ṭha lo hna ruangah vawlei cu harnak in a khat ko. Ziaza rawhnak, i tuk velhnak, firnak, hremnak, lainawngnak le tlaihhremnak te hna a si. Ṭhatlonak a tuahmi tampi nih biaknak pakhat an ngei ko nain, an biaknak nih ṭhatnak tuah awk a forh lo. Ṭhatlonak an tuah mi kha an ngol lo ahcun Pathian hawi an si kho lo.​—Matthai 7:17, 18.

Milem hna ah thlacam awkah a hmaan lomi biaknak nih a cawnpiak. Milem hna sinah thlacam awk a si lo tiin Pathian nih a ti. Mah cucu aa dongkhang mi a si. Nangmah he zeitikhmanh ah bia a chim lomi hmanthlak men lawng a si mi he bia chim cu na duh lai maw? Mah cucu na hawi taktak a si kho hnga maw? A si kho lai lo. Jehovah nih nunnak a ngei lomi milem asilole hmanthlak ah si loin amah sinah bia chim kha a duh.​—Exodus 20:4, 5.

A hmaan lomi biaknak nih raldoh caan ah midang thah khawh a si tiah a cawn piak. Pathian hawi pawl cu pakhat le pakhat an i daw lai tiah Jesuh nih a ti. Kan dawt mi hna kha kan thah hna awk a si lo. (Johan 13:35) Mi ṭha lo pawl thah hmanh hi palh a si. Jesuh a ral pawl nih amah tlaih awk an rat lio ah, amah huhphennak caah a zultu pawl kha doh awk nawl a pek lo.​—Matthai 26:51, 52.

A hmaan lomi biaknak nih mi ṭhalo pawl cu hell mei chung ah hremnak an in lai tiah an cawn piak. Sihmanhsehlaw Baibal nih sualnak nih thihnak ah a hruai tiah a ti. (Rom 6:23) Jehovah cu dawtnak Pathian a si. Dawtnak Pathian nih minung kha zungzal in a hrem hnga maw? A hrem lai lo! Paradis ah Jehovah lung tong mi biaknak pakhat lawng a um lai. (Biathlam 15:4) Satan lihbia ah a hrambunh mi biaknak vialte cu an lo dih lai.