Pathian hawi si na duh ahcun Pathian lungtongmi biaknak kha na zulh awk a si. Jesuh nih “hmaan tein a biami pawl nih” Pathian kha “biatak” in an biak lai tiah a ti. (Johan 4:23, 24, NW) Pathian biak awk ah lam hmaan pakhat lawng a um. (Efesa 4:4-6) A hmaanmi biaknak nih zungzal nunnak ah a hruai i a hmaan lomi biaknak nih rawhralnak ah a phan ter.​—Matthai 7:13, 14.

An tuahsernak zohnak thawngin a hmaanmi biaknak kha hngalh khawh a si. Jehovah cu miṭha a si caah amah kha hmaan tein a biami pawl zong miṭha an si awk a si. A ṭhami theithu kung nih theithu ṭha a chuahter bantuk in a hmaanmi biaknak nih miṭha a chuahter.​​—Matthai 7:​15-20.

Jehovah hawi pawl nih Baibal kha an upat ngai. Baibal cu Pathian sin in a ra mi a si ti kha an hngalh. Cu chung i chimmi bia nih an nuncan lam hruai awk, an harnak tei khawh awk le Pathian kong cawng ding i bawmh awk ah nawl an pek. (2 Timote 3:16) An chim bangin tuah awk ah an i zuam.

 Jehovah hawi pawl cu pakhat le pakhat cungah dawtnak an langhter. Jesuh cu Pathian kong cawnpiaknak, a zaw mi pawl damternak thawngin mi cung i a dawtnak kha a langhter. A hmaanmi biaknak a zulh mi nih cun midang cungah dawtnak an langhter ve. Jesuh bantukin, a si fakmi asilole miphun aa lo lomi pawl kha an zohchuk hna lo. Jesuh nih pakhat le pakhat cungah dawtnak nan langhternak thawngin ka zultu nan si kha an hngalh lai tiah a ti.​—Johan 13:35.

Pathian hawi pawl nih Pathian min Jehovah kha an hmaizah. Pakhatkhat nih na min hman a duh lo ahcun, na hawi kom a si hnga maw? A si lai lo! Hawi pakhat kan ngeih ahcun, a min kha kan hman lai i kan hawi pa i a ṭhatnak kong kha midang kan chimh hna hnga. Cucaah Pathian hawi si a duhmi nih amah min kha hman le a kong kha midang sinah a chim awk a si. Jehovah nih cutin tuahter a kan duh.​—Matthai 6:9; Rom 10:13, 14.

Pathian hawi pawl cu Jesuh bantukin Pathian Pennak kong kha midang sinah an cawn piak. Pathian Pennak cu vawlei kha paradis ah a canter lai mi vancung cozah a si. Pathian hawi pawl nih Pathian Pennak kong kha midang sinah an chim.​—Matthai 24:14.

Jehovah Hngaltu pawl nih Pathian hawi si awk ah an i zuam. Annih cu Baibal kha an upat i pakhat le pakhat an i daw. Pathian min kha an hman lengah hmaizahnak zong an pek i Pathian Pennak kong kha midang sinah an cawn piak hna. Nihin vawlei ah Jehovah Hngaltu pawl nih a hmaanmi biaknak kha an zulh.