Satan nih eih thiamnak tuah seh ti an duh. Mi tampi cu harnak cung in huhphennak hmuh awk ah an pupa hna le thlarau hna sinah thawinak an pek. Thlarau ram i ṭhawnnak hna kha an ṭih caah cutin an tuah cu a si. Eih thiamnak kut hrolh asilole kutkhih hna kha an i hruk. Khuaruahhar ṭhawnnak aa tel tiah an ruahmi “si hna” kha an din asilole an pum ah an i thuh. A cheu nih a kan huhphen khawh tiin an zumhmi thil hna kha an inn ah asilole vawlei tangah an thuh. A dang pawl nihcun chawletnak, sianginn camipawi, asilole nungak tlangval i helhnak ah a ṭhahnem tiin an zumh caah eih thiamnak “si” kha an hman.

Jehovah kha na hawi si ter cu Satan ral in a ṭha bikmi huhphennak a si. Jehovah le a vancung mi hna cu Satan le a khuachia hna nakin an ṭhawng deuh saumau. (Jeim 2:19; Biathlam 12:9) Jehovah cu amah a hawi pawl​—a cungah zumh awk tlak in a ummi pawl caah a ṭhawnnak langhter a duh.​—2 Chanrelnak 16:9.

Pathian Bia nih “Eih siseh nan tuah lai lo” tiah a ti. Jehovah nih eih thiamnak le khuavang ngeihnak kha sual a phawt, zeicahtiah cubantuk tuahsernak nih mi pakhat kha Satan Khuachia ṭhawnnak tangah a tlakter khawh caah a si.​—Levitikas 19:26.