Jehovah nih Paradis kha miṭhalo pawl a hrawhter lai lo. Cukaah Pathian hawi pawl lawng an um lai. Miṭhalo pawl cu zeiahdah an cang lai? A lehnak kha hngalh awk ah a hmaanmi Noah tuanbia kha ruat hmanh. Noah cu hlan lio kum thawng tampi lio ah a rak nung. Amah cu Jehovah duhnak tuah awk ah aa zuam zungzalmi miṭha pakhat a si. Sihmanhsehlaw vawlei cung i midang pawl cu a ṭhalomi thil an tuah. Cucaah Jehovah nih mi ṭhalo vialte kha buanchukcho in ka hrawh lai tiah Noah kha a chimh. Buanchukcho a tlung tikah Noah le a chungkhar an thihnak hnga lo lawng ser awkah a chimh.​—Genesis 6:9-18.

Noah le a chungkhar cu lawng an ser. Noah nih Buanchukcho a tlung lainak kong minung hna ralring a pek ko nain an ngai lo. Ṭhatlonak kha an tuah len ko. Lawng a ser dih hnu ah Noah nih saram hna kha lawng chungah a khumh hna i amah le a chungkhar zong an lut ve. Cutikah Jehovah nih thlichia nganpi a tlunter. Ni 40 le zan 40 chung ruah a sur. Vawlei pumpi kha ti nih a khuh dih.​—Genesis 7:7-12.

 Mi ṭhalo pawl an nunnak an sung nain Noah le a chung khar cu khamh an si. Jehovah nih Buanchukcho chungin ṭhatlonak thianhmi vawlei ah him tein a phan ter hna. (Genesis 7:22, 23) A hmaanmi thil a tuah duh lomi pawl kha Jehovah nih a hrawh lai nak caan a phan ṭhan lai tiah Baibal nih a ti. Mi ṭha pawl cu hrawh an si lai lo. Annih cu vawlei Paradis ah zungzal an nung lai.​—2 Piter 2:5, 6, 9.

Nihin mi tampi nih thil ṭhalo an tuah. Vawlei cu harnak in a khat ko. Jehovah nih ralrin pek awk ah amah a Hngaltu pawl kha atu le atu a thlah len ko nain, a tamdeuh nih Jehovah bia kha an ngai duh lo. An lam in thlen an duh lo. A hmaan a hmaan lo timi Pathian chimmi kha an cohlan duh lo. Mah pawl cu zeiahdah an cang lai? Ni khatkhat ah an i thleng hnga maw? Mi tampi cu zeitikhmanh ah an i thleng lai lo. Mi ṭhalo pawl hrawh an si lai i zeitikhmanh ah an nung ṭhan ti lai lonak caan a phan cang lai.​—Salm 92:7.

Vawlei cu hrawh a si lai lo; paradis ah canter a si lai. Pathian hawi a si mi pawl cu vawlei Paradis cungah zungzal in an nung lai.​​—Salm 37:29.