Atu vawlei i a cangmi ṭhatlonak hna nih Paradis a nai cang ti a langhter. Baibal nih Paradis a phan lai te ah ṭih a nungmi caan kan hmuh lai tiah a ti. Cubantuk caan ah atu ah kan nung! Atang lei thil hna cu Baibal nih a cang lai tiah a ti mi hna an si:

Ral pi hna. “Ram khat le ram khat an i do lai.” (Matthai 24:7) Cu chimchung bia cu a hung tling. 1914 thawk in vawlei ralpi pahnih le raldohnak a hmemi tampi a hung cang. Cukaah minung nuai tampi an thi.

Zawtnak a karh. “Hmun kip ah . . . zawtnak a tlung lai.” (Luka 21:11) A rak tling taktak maw? A rak tling. Khensar, lung zawtnak, t.b zawtnak, raifanh, AIDS le a dang zawtnak hna nih minung nuai tampi kha a thah cang hna.

Rawl zatlonak. Vawlei pumpuluk ah rawl a za khim in a ei kho lomi tampi an um. Minung nuai tampi cu kum fate rawl ṭam ruangah an thi. Mah cucu Paradis a ra cang lai timi hmelchunhnak dang pakhat a si. Baibal nih hitin a ti: “Mangṭam a tlung lai.”​​—Marka 13:8.

 Lihnin. “A kenkip ah . . . lihnin a tlung lai.” (Matthai 24:7) Cuti zong cun kanmah chan ah a si taktak. 1914 kum thawkin lihnin ruangah minung nuai khat leng an thi

Miṭhalo pawl. Mi hna cu “tangka duhmi” le “mah le mah aa daw mi” an si lai. Annih cu “Pathian nakin nuamhnak a duh deuh” mi an si lai. Ngakchia pawl cu “nu le pa nawl a ngailomi” an si lai. (2 Timote 3:​1-5, NW) Nihin ah cubantuk mi hna tampi an um ti kha na hna a tla a si lo maw? Pathian kha an upat lo i Pathian kong cawn a duhmi pawl kha harnak an pek hna.

Sualnak. “Ṭhatlonak kha a karh tuk lai.” (Matthai 24:12) A luan cia mi kum hna nakin an sual deuh ti kha na hna a tla men lai. Hmunkip i mi paoh nih thilchuhnak, hlennak, asilole harnak an ton khawh.

Hi thil vialte nih Pathian Pennak a nai cang ti a langhter. Baibal nih hitin a ti: “Hi thil hna an hung um kha nan hmuh tikah Pathian Pennak cu a nai cang ti kha nan hngalh lai.” (Luka 21:31) Pathian Pennak cu zeidah a si? Vawlei ah Paradis a chuahter lai mi Pathian vancung cozah a si. Pathian Pennak nih minung cozah kha a thlen lai.​​—Daniel 2:44.