Paradis cu atu kan umnak vawlei he aa lo lai lo. Vawlei cungah harnak le ngaihchiatnak, fahnak le lungre theihnak in khat awk ah Pathian nih a rak duh bal lo. Hmailei caan ah vawlei kha paradis ah a ser ter lai. Paradis cu zei he dah aa lawh hnga? Baibal chim mi kha zohmanh u sih:

Mi ṭha pawl. Paradis cu Pathian hawi le pawl umnak inn a si lai. Annih cu pakhat le pakhat caah ṭhatnak an tuah. Pathian dinnak lam ningin an nung lai.​—Phungthlukbia 2:21.

Rawl a tam lai. Paradis ah mangṭam a um ti lai lo. Baibal nih “ram chungah rawl tampi in [a] um [lai]” tiah a ti.​—Salm 72:16.

Inn ṭhaṭha le a nuam mi rian. Vawlei Paradis ah chungkhar vialte nih inn an ngei cio lai. Mi vialte nih a hmaanmi lunglawmhnak a pek mi rian an ṭuan lai.​​—Isaiah 65:​21-23.

 Vawlei pumpi daihnak. Raldohnak le raldohnak ah thihnak a um ti lai lo. Pathian Bia nih hitin a ti: “[Pathian] nih ral cu a daih ter.”​—Salm 46:8, 9.

Ngandamnak. Baibal nih hitin bia a kam: “[Paradis] ah ‘ka zaw’ tiah an zai ti lai lo.” (Isaiah 33:24) Cun kebei asilole mit caw asilole hnachet mi asilole holh kho lonak a um ti lai lo.​—Isaiah 35:5, 6.

Fahnak, ngaihchiatnak le thihnak donghnak. Pathian Bia nih hitin a ti: “Thihnak a um ti lai lo, ngaihchiatnak le ṭahnak le fahnak zong a um ti lai lo. Thil hlun vialte cu an lo dih cang.”​—Biathlam 21:4.

Mi ṭhalo an um ti lai lo. Jehovah nih hitin bia a kam: “Mi ṭhalo hna cu ram chung khan hlonh an si lai i mi rawi hmang mi hna cu ram chung cun phawi an si lai.”​—Phungthlukbia 2:22.

Pakhat le pakhat dawtnak le upatnak an ngei lai. Dinlonak, hremnak, hakkaunak le huatnak a um ti lai lo. Mi hna cu lungrual tein an um lai i Pathian dinnak ning in an nung lai.​—Isaiah 26:9.