Jesuh Kri cu Jehovah Fapa a si i amah he aa kom bikmi le a dawt bikmi a si. Vawlei ah minung pakhat in a nun hlanah a ṭhawngmi thlarau mi pakhat in vancung ah a rak um. (Johan 17:5) Cuhnuah vawlei ah a ra i Pathian kong biatak kha a cawnpiak. (Johan 18:37) Nawl ngaimi minung pawl kha sualnak le thihnak in khamh awk ah a minung nunnak kha a pek. (Rom 6:23) Atu ah Jesuh cu vawlei kha Paradis ah a can ter lai mi vancung cozah, Pathian Pennak i Siangpahrang a si.​—Biathlam 19:16.

Vancung mi pawl cu Pathian hawi an si. Vancung mi pawl cu minung bantukin vawlei ah an nunnak thawkmi a si lo. Pathian nih vawlei a ser hlanah vancung ah a rak ser hna. (Job 38:4-7) Vancung mi nuai tampi an um. (Daniel 7:10) Pathian i vancung a hawi pawl cu Jehovah kong biatak kha minung nih cawng hna seh ti an duh.​—Biathlam 14:6, 7.

Vawlei cung ah zong Pathian hawi pawl an um; annih cu amah tehte (hngaltu) hna tiin a auh hna. Biaceihnak zung i tehte pakhat nih mi pakhatkhat kong asilole thil pakhatkhat kong a theihmi kha a chim. Jehovah Hngaltu pawl cu Jehovah le a timhnak he aa tlaimi an theihmi kha midang sinah an chim. (Isaiah 43:10) Vancung mi hna bantukin Jehovah kong biatak cawnnak ah an in bawmh duh. Nang zong Pathian hawi na si awk an duh.