Pathian nih amah hawi si seh ti an duh. Universe ah a lianngan bik mi Pa he hawi kom khawh a si ti kha na ruat bal maw? Hlan lio i a rak nungmi Abramham cu Pathian hawi tiah auh a si. (Jeim 2:23) Baibal nih a chimmi midang pawl zong Pathian hawi an si ve i thluachuahnak tampi an hmuh. Nihin ah vawlei hmun kip i minung hna cu Pathian hawi an si cang. Nang zong Pathian hawi na si khawh ve.

Pathian hawi si cu minung hawi a zeipaoh nak in a ṭha deuh. Pathian nih zumh awk tlakmi a hawi pawl kha zeitik hmanh ah an lung a rawhter hna lo. (Salm 18:25) Pathian hawi si cu chawva nak in a ṭha deuh. A rummi pa pakhat a thih tikah a tangka cu midang sin ah a phan. Sihmanhsehlaw Pathian he hawikom a si mi nih aho hmanh nih lak khawh lomi thil mansung an ngei.​—Matthai 6:19.

Mi cheu nih Pathian kong na cawnnak in an in ngolter men lai. Na hawi le le na innchung khar hmanh nih cutin an tuah men lai. (Matthai 10:​36, 37) Midang nih an in nihsawh asilole an in tlerh ahcun ‘Aho lung ton dah ka duh​​—⁠minung maw, asilole Pathian dah’ tiah biahalnak i tuah. Mah hihi ruat hmanh: Pakhatkhat nih rawl ei hlah tiah a ti ahcun a bia na ngai lai maw? Na ngai hrimhrim lai lo! Nun awk ah rawl a herh. Sihmanhsehlaw Pathian nih nangmah kha zungzal an nunter khawh! Cucaah Pathian he hawi kom si awk ca i na cawnnak kha ngol awk ah aho hmanh nawl pe hlah.​—Johan 17:3.