Hawi ser awk ah i zuam awk a si; hawi si len awk ah i zuam awk a si. Pathian hawi si awk le hawi si len awk ah naa zuam caah thluachuah tampi na hmuh lai. Jesuh nih amah a zummi pawl kha hitin a ti: “Biatak nih cun an luat ter hna lai.” (Johan 8:32) A chimduh mi cu zeidah a si?

Luatnak kha atu ah na hmuh khawh. Satan nih a karhter mi a hmaan lomi cawnpiaknak le lih bia hna i na luat khawh. Jehovah a hngal lomi minung nawi tampi i ruahchannak ngeih lonak chungin na luat khawh. (Rom 8:22) Pathian hawi pawl cu ‘thihnak ṭihnak’ chung hmanhin an luat.​—Hebru 2:14, 15.

Pathian vawlei thar ah luatnak na hmuh khawh. Hmailei caan ah khuaruahhar luatnak hmuh a si lai! Vawlei Paradis ah raldohnak, zawtnak le sualnak in an luat lai. Sifah retheinak le rawl ṭamnak in luatnak. Tarnak le thihnak in luatnak. Ṭihnak, hremnak le dinlonak in luatnak. Pathian kong he aa tlaiin Baibal nih hitin a ti: “Zaa lak in a pek hna i an dihlak in an herh mi kha tlingte in an hmuh.”​—Salm 145:16.

 Pathian hawi pawl cu zungzal in an nung lai. Zungzal nunnak cu Pathian he hawi kom ser awk ah aa zuam mi vialte pek hnga mi a man a sungmi laksawng a si. (Rom 6:23) Donghnak ngei lo nunnak cu na caah zei sullam dah a ngeih lai ti kha ruat hmanh!

Thil tampi tuah awk caan a phan te lai. Awdawh tumnak thilri ​pakhat khat tum thiam khawh na duh men lai. Asilole a zuk suai khawh awk asilole lehtama pakhat si awk ah cawn na duh men lai. Saram asilole thingkung kong na cawn duh men lai. Asilole khual tlawn in ram dang le miphun dang hna hmuh na duh men lai. Zungzal nunnak ngeihnak thawngin cu thil vialte cu na tuah khawh lai!

Mi vialte he hawi kom ser awk ah a caan a um te lai. Zungzal nunnak thawngin Pathian hawi ah a cangmi midang tampi kha na hngalh khawh. An pahrang hna le an sining ṭha hna kha na hngalh khawh i annih zong na hawi le an si lai. Annih kha na dawt hna lai i annih zong nih an in dawt ve lai. (1 Korin 13:8) Donghnak ngeih lo nunnak ngeinak nih vawlei cung i a ummi vialte he hawi kom canternak caan a pek lai! A ṭha bikmi cu Jehovah he na hawikom sinak cu kum za tampi a luan bantukin a fek chinchin lai. Pathian hawi si zungzal ko!