Hawi sinak cu dawtnak cungah aa hngat. Jehovah kong na hngalh chinchin ahcun na dawtnak zong a ngan chinchin ve lai. Pathian na dawtnak a ṭhangchin bantukin a rian na ṭuan duhnak zong a ṭhangchin lai. Mah nih cun Jesuh zultu pakhat si awk ah an forh lai. (Matthai 28:19) Jehovah Hngaltu hna i a nuammi chungkhar he i komhnak thawngin Pathian he i hawi komhnak kha a zungzal na ngei khawh. Zeidah na tuah awk a si?

Pathian nawlbia ngainak thawngin na dawtnak kha langhter. “Pathian kan dawt ti cu a nawl kan zul ti nak a si ko. Cun a nawlbia cu kan caah a har tuk lo.”​—1 Johan 5:3.

Na cawnmi kha tuah. Mah khakha a langhtermi tuanbia pakhat Jesuh nih a rak chim. A fimmi pa pakhat nih lung cungah inn a sak. Mihrutpa pakhat nihcun thetse cungah a inn kha a sak. Thlichia nganpi a tlung tikah lungcung i sak mi inn cu a pur lo i thetse cung i sak mi inn cu a rawk cikcek. Jesuh cawnpiaknak kha a thei i a tuah mi pawl cu lungcung i inn a sa mi fimmi pa bantuk an si. Sihmanhsehlaw a cawnpiaknak a theih nain a tuah lomi pawl cu thetse cung i a sa mi mihrut pa bantuk a si. A zei pa he dah lawh na duh?​—Matthai 7:24-27.

 Pumpeknak. A chim duhmi cu Jehovah duhnak kha a zungzal in na tuah duh ti amah sinah thlacam in chimnak a si. Pathian duhnak tuahnak nih nang cu Jesuh zultu pakhat na si kha a langhter.​—Matthai 11:29.

Tipil innak. “Tho law tipilnak ing ko, amah min na auhnak thawngin na sualnak vialte kha i thenh ko.”​—Lamkaltu 22:16.

Pathian rian kha tling tein ṭuan. “Zei thil nan tuah paoh ah, minung caah si loin Bawipa caah ka ṭuan ti lungput ngei in, nan lungthin dihlak in ṭuan u.”​—Kolose 3:23.