Baibal relnak thawngin Jehovah kong na cawn khawh. Hlan lio caan ah Pathian nih amah ruahnak kong ṭial awk ah minung a cheu kha a thim. Mah an ṭial mi kha Baibal tiah auh a si. Nihin ah Baibal relnak thawngin Pathian kong kan cawn khawh. Baibal chung ah Jehovah bia asilole thawng pang aa tel caah Pathian Bia tiah zong auh khawh a si. Jehovah cu zeitikhmanh ah lih a chim bal lo caah Baibal kha kan zumh khawh. “Pathian nih a lih a chim kho lo.” (Hebru 6:18) Pathian Bia ah biatak aa tel.​—Johan 17:17.

Baibal cu kan ca i Pathian pekmi a man a sungmi laksawng hna lak i pakhat a si. Mah cucu dawtnak a ngeimi pa pakhat nih a fale sin ah a kuatmi ca he aa lo. Mah nih cun vawlei kha nun awk a ṭha ngaimi hmun​—paradis​—ah a thlen lai ti mi Pathian biakamnak kong a chim. Hlan lio i a tuahmi thil, atu a tuah lio mi thil le zumh awk tlakmi a fale hna caah hmailei ah a tuah lai mi pawl kong kha Baibal nih a chim. Harnak hna tei khawh awk le nuamhnak hmuh awk caah zong a kan bawmh.​—2 Timote 3:16.

 Jehovah Hngalhtu pawl cu Pathian hawi an si; Baibal cawnpiaknak kha na theihthiam awk ah an in bawmh ko lai. Baibal ka cawn duh ti lawng kha chim ko hna. Mah ruangah tangka an in hal lai lo. (Matthai 10:8) Cu hlei ah Khrifa pumhnak hna ah naa pum khawh. Mah khakha Kingdom Hall tiin auh mi biaknak hmun ah an tuah. Khrihfa pumhnak hna ah naa pum ahcun Pathian hngalhnak ah khulrang in na thangcho lai.

A tuahmi thil hna chungin Pathian kong na cawn khawh. Tahchunnak ah Baibal nih hitin a ti: “Pathian nih van le vawlei [a] ser.” (Genesis 1:1) “Van” a ser tikah nika kha a tuah. Mah nihcun Pathian kong zeidah a kan chimh? Jehovah cu ṭhawnnak nganpi a ngei ti a kan chimh. Ni bantukin a ṭhawngmi thil kha amah lawng nih a tuah khawh. Lumnak le ceunak a chuahter i zeitikhmanh ah a kang lomi ni kha ser awk ah fimnak a herh caah Jehovah cu fimnak a si ti zong a kan chimh.

Jehovah a ser mi nih kanmah a kan dawt ti kha a langhter. Vawlei cung i theitlai a phunphun kha ruat hna hmanh. Jehovah nih thingthei phunkhat lawng a kan pek khawh​​—asilole phunkhat hmanh pek loin zong a tuah khawh. Cu ti si loin pungsan, a hme a ngan, azawng, thawtnak a phunphun a ngeimi thingthei hna a kan pek. Mah nih cun Jehovah cu dawtnak a ngei lengah siannak a ngeimi le zangfahnak a ngeimi a si ti a langhter.​—Salm 104:24.