Hawi si len awkah amah he biachim a herh. A bia na ngai piak ahcun amah zong nih an ngai piak ve lai. Na hawi pa a ṭhatnak kong zong kha midang sinah na chim. Pathian he hawi si cu cubantuk cun a si ve. Mah kong he aa tlai in Baibal nih zeitindah a chim ti kha ruat hmanh:

Thlacamnak in Jehovah he hmaan tein biachim. “Thlacam zungzal u.”​—Rom 12:12.

Pathian Bia, Baibal kha rel. “Ca Thiang hi a dihlak in Pathian thaw chuah hnawh mi a si i biatak cawnpiaknak caah le palhnak cawnpiaknak alnak caah le palh mi remhnak caah le dingte in nunnak ding cawnpiaknak caah a ṭhahnem mi a si.”​—2 Timote 3:16.

Pathian kong midang kha cawnpiak. “Va kal u law miphun vialte kha ka zultu ah va ser hna u . . . kan fial mi vialte hna hi an zulh nak hnga va cawnpiak hna u.”​—Matthai 28:19, 20.

 Pathian hawi pawl he i kom. “Mifim mi hna sinah i chok ve lengmang law na fim lai.”​—Phungthlukbia 13:20.

Kingdom Hall i pumhnak ah i pum. “Pakhat le pakhat kan i dawt khawh nak hnga le thil ṭha kan i tuah piak khawh nak hnga, . . . i forh chin u sih.”​—Hebru 10:24, 25.

Pennak rian kha bawmh. “Cucaah nanmahle nan lungthin nan i thleh ning cioin rak tho u, nan thawh tikah i ngaihchih bu le hnekchom in si hlah seh, lunglawmte in a tho mikha Pathian nih a dawt hna.”​—2 Korin 9:7.