Pathian ral a biapi bik cu Satan a si. Amah cu Jehovah a ralchan mi thlarau mi pakhat a si. Satan nih Pathian kha a ralchan peng i minung cungah harnak nganpi a chuah ter. Satan cu miṭhalo a si. Amah cu lihchimtu le lainawngtu a si.​—Johan 8:44.

Thlarau minung dang hna cu Pathian ralchannak ah Satan he an i kom. Annih cu Baibal nih khuachia tiah a auh. Khuachia pawl cu Satan bantukin minung ral hna an si. Minung harnak pek kha an duh. (Matthai 9:32, 33; 12:22) Jehovah nih Satan le a khuachia pawl kha zungzal in a hrawh lai. Minung harnak pek awk ah an caah caan tawite lawng a tang.​—Biathlam 12:12.

Nang cu Pathian hawi si na duh ahcun, Satan nih tuahter an duhmi hna kha na tuah awk a si lo. Satan le khuachia pawl nih Jehovah kha an huat. Annih cu Pathian ral an si i nangmah zong Pathian ral siseh ti an duh. Satan asilole Jehovah​—aho lungton maw na duh ti kha na thim awk a si. Zungzal nunnak na duh ahcun, Pathian duhnak tuah kha na thim awk a si. Satan nih minung thlen awk ah lam tampi a ngei. Mi tampi kha Satan nih a thlen khawh hna.​—Biathlam 12:9.