Thih le nun cu aa ralchanmi a si. Thih cu thu ngai in i hngilh bantuk a si. (Johan 11:11-14) Mithi pawl nih an theih, an hmuh, an chim kho lo asilole zeihmanh an ruah khawh lo. (Phungchimtu 9:5, 10) Mithi pawl cu an pupa hna he um awk ah thlarau ram ah an kal tiah a hmaan lomi biaknak nih an cawn piak. Baibal nih cuticun a cawn piak lo.

Mithi pawl nih a kan bawmh khawh lo, harnak zong a kan pe kho lo. Mi hna cu mithi pawl nih an duh lai timi ruahnak in pawi le raithawinak hna an tuah tawn. Mah cucu Satan lihbia cungah aa hngat caah Pathian nih a duh lo. Mithi pawl zong nih an duh khawh lai lo, zeicahtiah nunnak an ngei lo. Mithi pawl kha ṭih awk asilole biak awk a si lo. Pathian lawnglawng kha kan biak awk a si.​—Matthai 4:10.

Mithi pawl an nung ṭhan lai. Jehovah nih a thi mi pawl kha vawlei paradis ah a thawhter ṭhan hna lai. Cu caan cu hmailei ah a si lai. (Johan 5:28, 29; Lamkaltu 24:15) Aa hngilhmi pa kha na ṭhangh khawh bantukin a thi mi pawl kha Pathian nih a ṭhangh khawh ve.​—Marka 5:22, 23, 41, 42.

Kan thi lo timi ruahnak cu Satan Khuachia nih a karhtermi lihbia a si. Mithi pawl i thlarau cu an nung i zawtnak le a dang harnak hna kha an chuahter tiah Satan le a khuachia pawl nih mi hna kha an ruahter. A caancaan ah mang hna le langhnak hna thawngin minung kha a thlen hna. Mithi he bia chim awk aa zuammi pawl kha Jehovah nih sual a phawt.​—Deuteronomi 18:10-12.