Ṭhatlonak tuah awk ah Satan nih minung kha a tukforh. Pathian hawi si a duhmi pa nih Jehovah a fihmi thil hna kha a huat awk a herh. (Salm 97:10) Pathian hawi pawl nih an hrialmi thil a cheu hna cu:

Nupa sualnak hna. “Va cung in pa nan i duh lai lo, nupi cungin nu nan duh lai lo.” (Exodus 20:14) I ṭhitum hlan i nupa sinak cu palh a si.​—1 Korin 6:18.

Zu ritnak. “Zu a ri mi . . . nih cun Pathian Pennak cu an co lai lo.” (1 Korin 6:10)

Lainawngnak, nau hrawhnak. “Lai nan nawng lai lo.”​—Exodus 20:13.

Firnak. “Nan fir lai lo.”​—Exodus 20:15.

Lihchimnak. Jehovah nih “lihchim hmang mi lei” kha a huat.​—Phungthlukbia 6:17.

 Zang ennak le Uk kho lomi thin hunnak. “Zang ennak a duh mi kha a thinlung dihlak in [Jehovah nih] a huat hna.” (Salm 11:5) “Minung si-ning nih a tuah tawn mi [ah] . . . thin a hung [aa tel].”​—Galati 5:19, 20.

Phekahnak. “A hak a kau mi . . . he hin nan i kom lai lo.”​—1 Korin 5:11.

Miphun huatnak. “Nan ral kha va daw hna u law an hremtu hna kha thla va cam piak hna u.”​—Matthai 5:43, 44.

Pathian chimmi hna cu kanmah ṭhatnak caah a si. Ṭhatlonak hna hrial cu a fawi zungzal tawn lo. Jehovah le a Hngaltu hna bawmhnak in Pathian a duh lomi thil hna kha na hrial khawh.​—Isaiah 48:17; Filipi 4:13; Hebru 10:24, 25.