BIAKINN chung na luh tikah na khuaruah a har tuk. Mah Biakinn cu naa uanthlarpi zungzalmi a si. A luancia kum tlawmpal lio i mah inn nan rak sak lioah naa nuamh tukmi kha naa cinken rih men lai. Atu ah nan Biakinn cu harnak a tongmi hna bawmhnak hmun ah chikkhat hman a si caah naa uanthlarpi chinchin. Nai ah nan hmunhma ah thlichia a hran ruangah ti a lian i thil tampi a rawk. Cucaah Zung Ṭengnge Kawmiṭi nih harnak a tongmi hna kha rawl, hnipuan, ti thiang le a dang a herhmi bawmh awkah an timhtuah colh. Bawmhnak thilri hna kha Biakinn chungah ningcang tein an chiah. Unau pawl cu artlang tein an dir i an herhmi kha an i lak. Tam deuh cu an i lawmh tuk caah an mitthli a tla.

Jesuh nih a zultu pawl i a lang ngaimi an hmelchunh cu pakhat le pakhat an i dawtmi hi a si lai tiah a ti. (Johan 13:34, 35) Hi dal ah Jehovah Tehte Hna i innsaknak rian le harnak a tongmi hna bawmhnak rian nih Khrihfa dawtnak a langhterning kha kan i ruah lai. Cu bantuk dawtnak nih Jesuh ukmi Pennak tangah kan um ti kha fiang tein a langhter.