1, 2. (a) Judea ram i Khrihfa hna cu zei harnak dah an ton? (b) Judea ram i Khrihfa hna cu zei bantuk dawtnak in bawmhnak dah an hmuh?

 MAH hi AD 46 hrawngah a si i Judea ram ah a fak ngaimi mangṭam a tlun lioah a si. Rawl tlawmte lawng a um i a man zong van tawngin a fah caah cuka i a ummi Judah mi Khrih zultu hna nih an i cawk kho lo. Cucaah annih cu an paw a ṭaam tuk hringhran. Asinain Jehovah huhphenhnak an hmuh cang lai, a hlanah cu bantuk huhphenhnak phun kha Khrih zultu hna nih an hmu bal lo. Mah cu zeidah a si lai?

² Jerusalem le Judea ram i Judah mi Khrihfa pawl harnak an tonmi kha Siria ram, Antiok khua i Judah mi le Jentail mi Khrihfa hna nih an theih tikah bawmh awkah tangka an i kholh. Cun mah bawmhnak kha Jerusalem i Khrihfa upa pawl va pek awkah unaupa Barnabas le Saul kha an thim hna. (Lamkaltu 11:27-30; 12:25 rel.) Antiok khua i unau pawl langhtermi dawtnak ruangah Judea ram i harnak a tongmi unau pawl cu an i lawm tuk lai.

3. (a) Antiok khua i Khrihfa hna kha tuchan Pathian miphun nih zeitindah an i zohchunh hna? Tahchunhnak pe. (“ Chanthar ah a Ngan ngaimi a Voikhatnak Bawmhnak” timi rinli kulh zong zoh.) (b) Hi ṭhen ah zei biahalnak hna dah kan i ruah lai?

³ Mah cu hmun pakhat ah a ummi Khrihfa hna nih hmun dang ah a ummi Khrihfa hna kha bawmhnak an kuat hna timi Baibal ah aa ṭial hmasa bikmi a si. Tuchan ah Antiok khua i unau pawl kha kan i zohchunh hna. Hmun dang ah a ummi unau pawl cu leiser ral asiloah a dang harnak an tong ti kan theih tikah kan bawmh colh hna. a Bawmhnak rian kan ṭuanmi cu a dang Pathian rianṭuannak he zeitindah aa pehtlaih ti hngalhthiam awkah bawmhnak rian he aa tlaimi mah biahalnak pathum hi i ruah hna u sih: Bawmhnak rian kha Pathian rian in zeicah kan hmuh? Bawmhnak rian kan ṭuanmi i aa tinhnak cu zeidah a si? Mah rian nih zei ṭhatnak dah a chuahter?

4. Paul nih Korin khuami hna kha Khrihfa a simi hna rian he aa tlaiin zeidah a chimh hna?

⁴ Korin khua i a cakuat pahnihnak ah Paul nih Khrihfa a simi cu rian pahnih kan ngei tiah a ti. Paul cakuat cu chiti thuhmi Khrihfa hna caah a si ko nain tuchan ah Khrih ta a simi “tuudang” he zong aa pehtlai. (Johan 10:16) Kan rian pakhat cu ‘midang zong Pathian hawi i ser ve awk rian’ kha a si, mah cu phungchimnak le cawnpiaknak rian kha a si. (2 Kor. 5:18-20; 1 Tim. 2:3-6) A dang pakhat cu unau pawl caah kan tuahmi  rian kha a si. Paul nih ‘Pathian mi hna bawmh awkah’ tiah a ti tikah mah rian kong kha a chimduhmi a si. (2 Kor. 8:4) ‘Midang zong Pathian hawi i ser ve awk rian’ timi le ‘Pathian mi hna bawmh awkah’ timi bia ah “rian” le “bawmh” timi biafang cu Greek biafang di·a·ko·niʹa in lehmi a si. Mah cu zeicah aa thleidangmi a si?

5. Paul nih bawmhnak rian kha Pathian rian tiah a auhmi cu zeicah aa thleidangmi a si?

⁵ Rian pahnih caah Greek biafang pakhat a hmannak thawngin Paul nih bawmhnak rian kha Khrihfabu i ṭuanmi a dang rian he phu khat ah a chiah. A hmasa deuh ah hitin a ti: “Rian ṭuan hi a ning tampi a um, sihmanhsehlaw a rian kan ṭuanmi cu Bawipa ṭhiamṭhiam kha a si ko. Rian ṭuan khawhnak hi a phunphun in a um, sihmanhsehlaw . . . hi thil vialte a tuahtu hi thlarau pakhat a si.” (1 Kor. 12:4-6, 11) Paul nih Khrihfabu rian a phunphun kha Pathian kan biaknak asiloah Pathian rian he a pehtlaihter. b (Rom 12:1, 6-8) Cucaah a caan cheukhat kha ‘Pathian mi hna rian ṭuanpiak’ awkah hman cu aa tlak tiah a ruahmi a si.—Rom 15:25, 26.

6. (a) Paul nih a chim bantukin bawmhnak rian cu zeicah kan biaknak ah aa telmi a si? (b) Tuchan vawleicung pumpi ah bawmhnak rian kan ṭuanning kha fianter. (Cahmai 214 i “ Leiser Ral a Tlun Tikah” timi rinli kulh zoh.)

⁶ Bawmhnak rian cu Jehovah biaknak le a rianṭuannak ah zeicah aa telmi a si ti hngalhthiam awkah Paul nih Korin Khrihfa hna kha a bawmh hna. A chimmi hi ruathmanh: Khrihfa hna nih mi an bawmh hna cu ‘Khrih thawngṭha kha an ngaih’ caah a si. (2 Kor. 9:13) Khrihfa hna nih Khrih cawnpiaknak kha an tuahsernak in langhter an duh caah an unau kha an bawmhmi hna a si. Unau pawl cungah an langhtermi zaangfahnak cu a tak ti ah cun ‘Pathian nih tam khun in a pekmi hna a vel’ an langhternak a si tiah Paul nih a ti. (2 Kor. 9:14; 1 Pit. 4:10) Cucaah bawmhnak rian telin a herhbaumi unau pawl caah rianṭuannak kong kha 1975, December 1, Vennak Innsang nih hitin a ti: “Cu bantuk rian kha Jehovah Pathian le a Fapa Jesuh Khrih nih biapi tuk ah an chiah timi kha zeitikhmanh ah kan lung a hrin awk a si lo.” Cucaah bawmhnak rian cu Pathian rianṭuannak ah aa telmi a biapi tukmi a si.—Rom 12:1, 7; 2 Kor. 8:7; Heb. 13:16.

7, 8. Bawmhnak rian kan ṭuanmi i aa tinhnak a pakhatnak cu zeidah a si? Fianter.

⁷ Bawmhnak rian kan ṭuanmi i aa tinhnak cu zeidah a si? Paul nih Korin Khrihfabu sin a cakuat pahnihnak ah mah biahalnak a phi kha a chim. (2 Korin 9:11-15 rel.) Mah cacang hna ah Paul nih “zapi ṭhatnak ca” rian kan ṭuanmi, phundang cun bawmhnak rian kan ṭuanmi i aa tinhnak pathum kha a chim. Mah kha pakhat hnu pakhat i ruah hna u sih.

⁸ Pakhatnak, bawmhnak rian kan ṭuanmi nih Jehovah thang a ṭhatter. A cunglei ah langhtermi cacang panga ah Paul nih Jehovah Pathian kong voi zeizat dah a chim kha zohhmanh. “Pathian cu mi tampi nih an lawmh lai” tiin le “Pathian sin i chimmi lunglawmhnak bia tampi” a chuahter lai tiah a rak ti. (Caang 11, 12) Cun bawmhnak rian nih Khrihfa hna kha ‘Pathian upat’ awk le ‘Pathian nih tam khun in a pekmi hna a vel’ thangṭhat awkah a forh hna laining zong kha a langhter.  (Caang 13, 14) Paul nih bawmhnak rian kong a chimmi kha “Pathian cu lawm ko u sih” timi bia in a donghter.—Caang 15; 1 Pit. 4:11.

9. Bawmhnak rian nih zei bantuk lungput dah a thlenter khawh? Tahchunhnak pe.

⁹ Paul bantukin tuchan Pathian salle zong nih bawmhnak rian kha Jehovah thang ṭhatter khawhnak le a cawnpiaknak thomh khawhnak caanṭha in an hmuh ve. (1 Kor. 10:31; Titas 2:10, NW) Bawmhnak rian nih Jehovah le a Tehte hna cungah a hmaanlomi lungput a ngeimi cheukhat kha an lungput thlen awkah a bawmh tawn hna. Tahchunhnak ah, nu pakhat nih a innka ah “Jehovah Tehte Hna—Ra Hlah U” timi ca a taar. Cuka hmun ah hurricane thlichia a hran tikah a inn hmai i a rawkmi inn kha bawmhnak rianṭuantu hna nih an remhmi kha a hmuh. Nuam tein rian a ṭuanmi hna kha ni tam nawn a zoh hna hnuah ahote dah an si hnga ti hngalh awkah a va hlathlai. Annih cu lungtho tein aa pemi Jehovah Tehte an si ti a hngalh tikah a lung a suk tuk i “phundang in kaan rak in ruah sual hna” tiah a ti hna. Zei ṭhatnak dah a chuak? A innka ah a taarmi ca kha a phongh ṭhan.

10, 11. (a) Bawmhnak rian i aa tinhnak a pahnihnak kan tuah khawh ti kha zei tahchunhnak hna nih dah a langhter? (b) Zei cauk nih dah bawmhnak rianṭuantu hna kha a bawmh hna? (“ Bawmhnak Rianṭuantu pawl a Bawmmi Hriamnam” timi rinli kulh zoh.)

¹⁰ Pahnihnak, zumtu khat pawl i ‘an herhbaunak kha kan bawmh hna.’ (2 Kor. 9:12a) Unau pawl herhmi kha bawmh kan duh hna i an tonmi harnak kha tlawmter deuh kan duh. Zeicah? Khrihfabu chung i unau vialte cu ‘pum pakhat’ kan si i “pum chung nge pakhatkhat nih fahnak a in ahcun a dang nge vialte zong nih khan an rak inpi ve” caah a si. (1 Kor. 12:20, 26) Cucaah unau dawtnak le zawnruahnak nih tuchan i unau tampi kha harnak a tongmi unau pawl bawmh awkah an ṭuan liomi rian ngol, an thilri i lak in leiser ral a tlunnak hmun i kal colh awkah a forh hna. (Jeim 2:15, 16) Tahchunhnak ah, 2011 ah Japan ah tsunami a tlun tikah United States i zung ṭengnge nih United States i Mahle Hmun Innsaknak Kawmiṭi pawl kha ca an kuat hna. An cakuat ah Japan i Biakinn pawl sak ṭhan awkah “thiamnak a ngeimi unau tlawmpal” an kal kho lai maw tiah an hal hna. Zeitindah an lehrulh? Zarh tlawmpal chungah unau 600 leng nih Japan ah kanmah tangka tein kan kal lai i kan bawmh hna lai tiah thawng an thanh hna. “Mah thawng kan theih tikah kan khuaruah a har tuk” tiah United States i zung ṭengnge nih an ti. Japan ram i unaupa nih ramdang in a rami unaupa pakhat kha zeicah na rak kan bawmh tiah a hal tikah hitin a leh: “Japan i unau pawl cu ‘kan pum’ cheubang pei nan si cu. Harnak nan ton i nan lung a fah tikah cutin kan in tuarpi ve hna.” Bawmhnak rian a ṭuanmi hna cu mahzawn ruat lo dawtnak an ngeih caah an nunnak hmanh kha biapi ah chia loin an unau pawl kha an bawmh tawn hna. c—1 Johan 3:16.

¹¹ Jehovah Tehte a si lomi hna zong nih bawmhnak rian kan ṭuanmi an sunsak kha an langhter ve. Tahchunhnak ah, 2013 ah U.S.A., Arkansas peng ah leiser ral a tlun tikah unau pawl nih khulrang in an bawmh colhmi hna kong kha thanhca pakhat nih hitin a ti: “Jehovah Tehte Hna nih bawmhnak rian  a ṭuanmi hna kha ningcang tein an timhtuah hna. Cucaah bawmhnak rian a ṭuanmi hna nih leiser ral a tlun tikah hmualngei tein le thiam ngaiin rian an ṭuan khawh.” Lamkaltu Paul nih a chim bantukin a herhbaumi unau pawl kha ṭha tein kan “bawmh” taktak hna.

12-14. (a) Bawmhnak rian i aa tinhnak a pathumnak tuah khawh cu zeicah a biapit tuk? (b) Thlaraulei he aa tlaimi thil tuah zungzal a biapit kha unau pawl chimmi zei bia hna nih dah a langhter?

¹² Pathumnak, harnak a tongmi hna kha thlaraulei he aa tlaimi thil an tuah khawh ṭhan nakhnga kan bawmh hna. Mah cu zeicah a biapit? Bawmhnak rian nih bawmhnak a hmumi hna kha ‘Pathian sinah lunglawmhnak bia tampi chim’ awkah a forh hna lai tiah Paul nih a ti. (2 Kor. 9:12b) Harnak a tongmi hna nih Jehovah cung an i lawmhnak an langhter khawhnak a ṭha bikmi lam cu a ran khawh chung rang in thlaraulei he aa tlaimi thil tuah ṭhan kha a si. (Fil. 1:10) 1945, Vennak Innsang nih hitin a ti: “Paul nih thawhlawm kholhnak kha tha a pek . . . , zeicatiah mah nih . . . a herhbaumi Khrihfa hna kha a bawmh khawh hna caah a si. Cuticun annih zong Jehovah kong tehte khaannak rian ah zalong tein le lungtho tein an i tel kho lai.” Bawmhnak rian kan ṭuanmi i aa tinhnak cu tuchan zongah aa thleng lo. Unau pawl cu phungchimnak ah an i tel ṭhannak thawngin harnak a tongmi midang an bawmh khawh hna lengah anmah thengte thazaang an hmu.—2 Korin 1:3, 4 rel.

¹³ Bawmhnak tampi a hmumi unau pawl cu phungchimnak ah an i tel ṭhan i mah nih thazaang a ngeihter hna. Cu bantuk unau hna lakin cheukhat chimmi hi zohhmanh. Unaupa pakhat nih hitin a chim: “Phungchim kal cu kan innchungkhar caah a ṭha tukmi a si. Midang kan hnemh hna tikah kan lungretheihnak kha chikkhat kan philh.” Unaunu pakhat nih hitin a chim: “Thlaraulei thil i lungthin peknak nih ka pawngkam ah a ummi a rawkmi thil kha a ka philhter. Mah nih ka him tiah a ka ruahter.” A dang unaunu nih hitin a chim: “Kan hrial khawh lomi thil tampi a um ko nain phungchimnak nih kan i ruahchanmi kha lungthin pek awkah kan innchungkhar in a kan bawmh. Kan i ruahchanmi vawlei thar kong midang kan chimh hna tikah thil vialte a thar in ser ṭhan a si lai timi kan zumhnak cu a fek chin.”

¹⁴ Harnak a tongmi unau pawl nih khulrang in an tuah ṭhan colh awk a simi a dang thlaraulei thil cu Khrihfabu pumhnak ah i pumh hi a si. Kum 60 dengmang a simi unaunu Kiyoko kong hi ruathmanh. Tsunami a tlun tikah aa hruk liomi thil le aa danh liomi phanat dah ti lo cu a thil vialte a sung dih, mah tikah zeitindah ka nun lai ti awk a hngal lo. Mah lioah unaunu kha Khrihfa upa pakhat nih kan mawṭaw chungah pumhnak kan tuah lai tiah a chimh. Kiyoko nih hitin a chim: “Khrihfa upa, a nupi le a dang unaunu pakhat he mawṭaw chungah kan ṭhu hna. Pumhnak cu a sawhsawh te a si ko nain khuaruahhar tuk a si, tsunami i ka tonmi thil vialte kha a ka philhter dih i ka lung a hun dai. Mah pumhnak nih Khrihfa hawikomhnak hmual a ngeihning kha a ka hngalhter.” Leiser  ral a tlun hnu i aa pumhmi pumhnak hna he aa tlaiin a dang unaunu pakhat nih “mah nih inkhawhnak ngeih awkah a ka bawmh” tiah a ti.—Rom 1:11, 12; 12:12.

15, 16. (a) Bawmhnak rian ṭuannak in Korin khua i Khrihfa hna le hmundang i Khrihfa hna cu zei ṭhatnak dah an hmuh lai? (b) Tuchan zongah bawmhnak rian in zei ṭhatnak dah kan hmuh ve?

¹⁵ Paul nih Korin Khrihfa hna sinah bawmhnak rian kong a chim lioah mah rian ṭuannak in anmah le a dang Khrihfa hna nih an hmuh laimi ṭhatnak zong a chim chih. Hitin a ti: “Pathian nih tam khun in aan pekmi hna a vel ruangah khan [bawmhnak a hmumi Jerusalem i Judah mi Khrihfa hna nih] nan ca i thla an cam tikah nanmah ngaih buin [‘dawtnak he,’ Judson] an cam lai.” (2 Kor. 9:14) Korin khua i Khrihfa hna siannak nih Judah mi Khrihfa hna kha Korin khua ah a ummi Jentail mi hna telin unau dihlak caah thlacampiak awkah a forh hna, cun an dawt hnanak zong a fehter.

¹⁶ Bawmhnak rian nih a chuahtermi ṭhatnak kong Paul chimmi cu tuchan he zong aa pehtlai ti kha langhter in 1945, December 1, Vennak Innsang nih hitin a ti: “Pathian sin pekmi miphun chung i phu pakhat nih hmun dang ah a ummi phu kha an herhmi an pek hna tikah zeitlukin dah an lung aa rual lai khi ruathmanh u.” Cutin a si kha tuchan bawmhnak rian a ṭuanmi hna nih an hmuh. Tilian ruangah harnak a tongmi hna bawmhnak rian ah aa telmi Khrihfa upa pakhat nih “bawmhnak rian ka ṭuan caah hlan nakin unau pawl he kan i naih deuh” tiah a chim. Bawmhnak a hmuh ruangah aa lawmmi unaunu nih “unau pawl sinin bawmhnak kan hmuhmi nih vawlei Paradis nunnak cu zeidah a lawh lai ti kha a kan hngalhter” tiah a ti.—Phungthlukbia 17:17 rel.

17. (a) Isaiah 41:13 bia cu bawmhnak rian he zeitindah aa pehtlaih? (b) Bawmhnak rian nih Jehovah thang a ṭhatter i lungrualnak a fehter ti a langhtermi tahchunhnak cheukhat chim. (“ Vawleicung Pumpi i Lungtho tein aa Pemi hna nih Bawmhnak Rian An Ṭuan” timi rinli kulh zong zoh.)

 ¹⁷ Leiser ral a tlunnak hmun ah bawmhnak rian a ṭuanmi unau pawl an phanh tikah harnak a tongmi unau pawl nih mah Pathian biakam a tlin kha an hmuh: “Keimah cu BAWIPA nan Pathian ka si i ṭhawnnak kaan pek hna; ‘Nan thinphang hlah u, kaan bawmh hna lai,’ tiah keimah nih ka ti.” (Isa. 41:13) Leiser ral in a luatmi unaunu pakhat nih hitin a chim: “A rawkmi thil ka zoh tikah ruahchannak ka ngei ti lo tiah ka ruah, asinain Jehovah nih a ka bawmh. Unau pawl sinin ka hmuhmi bawmhnak kha a chim zia hmanh ka thiam lo.” Leiser ral nih thil tampi a hrawhnak hmun i Khrihfa upa pahnih nih Khrihfabu aiawh in hitin ca an ṭial: “Lihnin nih thil tampi a hrawh nain unau pawl hmangin Jehovah nih a kan bawmhmi kha kan hmuh. Bawmhnak rian kong kha a rel lawng kan rak rel bal nain atu ah cun kanmah theng nih kan hmuh cang.”

18. Bawmhnak rianṭuannak ah i tel na duh ahcun zeidah na tuah khawh? (“ Mah nih A Nunnak a Sersiam” timi rinli kulh zong zoh.)

¹⁸ Bawmhnak rian ṭuannak in hmuhmi nuamhnak kha hmuh na duh ve maw? Na duh ahcun bawmhnak rianṭuantu hna kha Biakinn saknak rian a ṭuanmi chungin an thim tawn hna ti kha i cinken. Cucaah Biakinn saknak rian ṭuan awkah form phih na duh kha nan Khrihfa upa chim. Bawmhnak rian ṭuannak ah hmuhtonnak tampi a ngeimi Khrihfa upa pakhat nih hitin a chim: “Leiser Ral a Tongmi Bawmhnak Kawmiṭi sinin sawmnak ca na hmuh hnu lawngah leiser ral a tlunnak hmun ah kal.” Cutin tuahnak thawngin bawmhnak rian cu ningcang tein ṭuan khawh a si lai.

19. Kannih cu Khrih zultu taktak kan si kha bawmhnak rian nih zeitindah a langhter?

¹⁹ Bawmhnak rian ṭuan cu “pakhat le pakhat i daw u” timi Khrih nawl kan zulh langhternak a biapimi lam a si. Cu bantuk dawtnak kan langhternak thawngin Khrih zultu taktak kan si kha kan langhter. (Johan 13:34, 35) Tuchan ah lungtho tein aa pemi rianṭuantu tampi kan ngeihmi hna cu thluachuah taktak a si, annih nih Pathian Pennak zumhfek tein a ṭanpimi hna kha an bawmh hna tikah Jehovah thang an ṭhatter.