1, 2. (a) Pastor pa nih Baibal Siangngakchia hna i an rianṭuanning kong a hal tikah Unaupa Russell nih zeitindah a leh? (b) Hi ṭhen ah zei kong dah kan i ruah hna lai?

 VOIKHAT cu Reformed Church i an pastor nih Baibal Siangngakchia hna i an rianṭuanning kong kha Unaupa Charles T. Russell a hal.

 Unaupa Russell nih “Kannih cu thawhlawm kan kholh bal lo” tiah a ti.

 Pastor pa nih “A si ah cun zeitindah tangka nan hmuh?” tiah a hal.

 Russell nih hitin a leh: “Biatak kaan chimh ahcun na zum kho theng lai lo. Kan i pumhnak ah mi an rat tikah thawhlawm kholh a simi kha an hmu lo. Asinain tangka a dihnak a ummi tu cu an hmuh. Cucaah ‘hika ah tangka a dihnak a um . . . Mah caah zeitindah thawhlawm ka pek khawh ve lai?’ tiah anmahle anmah an i hal.”

 Mah tikah pastor pa nih Unaupa Russell kha zumh lo nawn in a zoh.

 Russell nih hitin a ti chap: “Biatak kaan chimhmi a si. Mi nih ‘zeitindah thawhlawm tlawmpal ka pek khawh lai?’ tiah an ka hal tawn. Mi pakhat cu thluachuah a hmuh i tangka a ngeih ahcun mah kha Bawipa caah hman a duh. Tangka a ngeih lo ahcun thawhlawm pek awkah kan hnek lo.” a

² Unaupa Russell nih “biatak” a chimmi a si. Pathian miphun nih a hmaanmi biaknak bawmhnak caah lungtho tein thawhlawm an peknak hi a saupi cang. Hi ṭhen ah mah kong Baibal tuanbia cheukhat le chanthar tuanbia kan i ruah hna lai. Tuchan ah Pennak rianṭuannak caah tangka kan hmuhning kong kan i ruah lioah pakhat cio nih ‘Pennak ka bawmh kha zeitindah ka langhter khawh?’ tiah kan i hal awk a si.

3, 4. (a) Jehovah nih amah a biami hna cungah zei zumhnak dah a ngeih? (b) Israel mi hna nih puan biakinn saknak an bawmh kha zeitindah an langhter?

³ Jehovah nih amah a biami hna kha a zumh hna. Caanṭha ka pek hna ahcun lungtho tein thawhlawm an peknak thawngin an i pumpeknak an langhter lai ti kha Jehovah nih a hngalh. Israel mi hna tuanbia pahnih kha i ruah hna u sih.

 ⁴ Israel mi kha Izipt ram in a chuahpi hna hnuah Jehovah nih biaknak caah ṭhial khawhmi thlam asiloah puan biakinn sak awkah a fial hna. Saknak caah le a chung thilri caah a dihmi tampi a um lai. Cucaah “tuah a duhmi nih cun hi thawhlawm hi nan pek lai” tiah Jehovah nih Moses hmangin a chimnak thawngin mi kha mah saknak caah bawmhnak caanṭha a pek hna. (Ex. 35:5) “Rian har phun zakip kha rumro in an hnek” hnanak Izipt ram in naite lawngah a luatmi Israel mi hna nih zeitindah an lehrulh? (Ex. 1:14) Mah rian kha lungtho tein an bawmh i sui, ngun le a dang thil mansung hna kha siang ngaiin an pek, mah lak i tam deuh cu an bawile a rak simi Izipt mi hna sinin an hmuhmi a si men lai. (Ex. 12:35, 36) Israel mi hna nih a herhmi lengin an pek caah “rak tho ti hlah u” tiah Moses nih a thlauh hna.—Ex. 36:4-7.

5. David nih biakinn saknak caah thawhlawm peknak caanṭha a pek hna tikah Israel mi hna nih zeitindah an lehrulh?

⁵ Kum 475 hrawng a rauh hnuah David nih biakinn saknak caah ‘amah ca i khonmi’ thilri kha thawhlawm a pek, mah biakinn cu vawleicung i a hmaanmi biaknak caah sakmi inn lakah a hmasa bik a hmunmi inn a si. Mah hnuah David nih Israel mi hna zong kha thawhlawm peknak caanṭha a pek hna i “ahodah BAWIPA sinah amahle amah i pechan in lungtho tein a tho lai?” tiah a ti hna. Mah tikah mi nih “lung ṭengnge lo tein siang tein BAWIPA kha an pek.” (1 Chan. 29:3-9) David nih an pekmi thawhlawm i a hrampi kha a hngalh caah Jehovah sin a thlacamnak ah hitin a ti: “Zeizong vialte cu nangmah sinin a rami an si i nangmah ta lila kha kannih nih nangmah kan in pekmi hi a si ko.”—1 Chan. 29:14.

6. Tuchan ah Pennak rianṭuannak caah zeicah tangka a herh, zei biahalnak dah a chuak?

⁶ Moses le David nih Pathian miphun kha thawhlawm pek awkah an hnek hna lo. Mi nih anmah lungtho te tuin an pek. Tuchan ah tah zeitin? Pathian Pennak nih a ṭuanmi rian caah tangka a herh ti kha ṭha tein kan hngalh. Baibal le Baibal hrambunhmi cauk chuahnak le kuatnak, pumhnak inn le zung ṭengnge inn saknak le remhnak, cun leiser ral a tongmi unau pawl bawmhnak caah tangka tampi a dih. Cucaah a biapimi mah biahalnak hi a chuak: A herhmi tangka kha zeitindah kan hmuh? Siangpahrang zultu hna cu thawhlawm pek awkah hnek an hau maw?

7, 8. Jehovah miphun nih tangka hmuh awkah zeicah mi an nawl hna lo asiloah an hal hna lo?

⁷ Unaupa Russell le a hawile nih tangka hmuhnak caah Khrihfaram church hna nih an tuah tawnmi thil kha tuah an duh lo. Vennak Innsang a ukhnihnak i “‘Zion Vennak Innsang’ Hi Na Duh Maw?” timi capar ah Russell nih hitin a chim: “‘Zion Vennak Innsang’ kha JEHOVAH nih a bawmh tiah kan zumh, cutin a si chung paoh cu bawmhnak hmuh  awkah mi a nawl hna lai lo i a hal bal hna lai lo. ‘Ngun cu keimah ta a si i sui cu keimah ta a si’ tiah a titu nih a herhmi tangka a kan bawmh ti lo ahcun mah cauk chuah hi kan ngol awk a si cang ti kha kan hngalh lai.” (Hag. 2:7-9) Atu ah Vennak Innsang an chuahnak hi kum 130 leng a si cang i mah cauk a chuahtu bupi cu a ṭhawng peng rih ko.

⁸ Jehovah miphun nih mi kha tangka an hal bal hna lo. Thawhlawm an kholh lo i tangka halnak ca zong an kua bal lo. Tangka hmuhnak caah video phel an chuah lo, cun fund kawlnak caah tiin ṭiket zong an zuar lo. Vennak Innsang nih hlanliopi ah a rak chimmi mah bia hi an zulh: “A dang church nih an tuah tawn bantukin Bawipa caah tangka hal cu aa tlakmi a si tiah kan ruat bal lo . . . Kan Bawipa min kha hmangin lam a phunphun in tangka hal cu Bawipa nih a cohlang lo i a fih tiah kan ruah, cun a petu le mah in ṭuanmi rian zong kha thluachuah a pe lo tiah kan ruah.” b

9, 10. Lungtho tein thawhlawm kan peknak a ruang pakhat cu zeidah a si?

⁹ Tuchan ah Pennak rammi a simi kannih cu thawhlawm pek awkah hnek kan hau lo. Mah canah kan tangka le a dang kan ngeihmi thilri kha Pennak rian bawmhnak caah lunglawm te tuin kan pek. Zeicah cutin lungtho tein pek kan duh? A ruang pathum hi zohhmanh.

¹⁰ Pakhatnak ah, Jehovah kan dawt ca le “a duhmi” kha tuah kan duh caah lungtho tein thawhlawm kan pekmi a si. (1 Johan 3:22) Jehovah nih lungtho tein a pemi kha a dawt hna. Thawhlawm peknak he aa tlaiin lamkaltu Paul nih a chimmi hi ruathmanh. (2 Korin 9:7 rel.) A hmaanmi Khrihfa hna nih i ngaihchih buin asiloah hnekchom in thawhlawm an pekmi a si lo. Pek awkah ‘an lungthin an i thleh’ ca tu ah an pekmi a si. c Chimduhmi cu zeidah a herh ti le mah kha zeitindah ka pek khawh timi ṭha tein an ruah hnuah an pek tinak a si. Cu bantukin a petu hna kha Jehovah nih a sunsak hna, zeicahtiah “lunglawm tein a thomi kha Pathian nih a dawt hna.” A dang Baibal lehnak nih mah cacang kha “Pek a duhmi hna kha Pathian nih a dawt hna” tiah a leh.

11. Jehovah kha a ṭha bikmi laksawng pek awkah zeinihdah a kan forh?

¹¹ Pahnihnak ah, thawhlawm peknak thawngin Jehovah nih a kan pekmi thluachuah tampi caah kan i lawmh kha kan langhter. Moses Nawlbia ah a ummi lungthin a checkhlaitu phunglam hi ruathmanh. (Deuteronomi 16:16, 17 rel.) Israel mi pa hna cu kum fatin tuahmi puai pathum ah an kal tikah ‘Pathian nih thluachuah a pek hnaning cio in’ laksawng an i put a hau. Cucaah Israel mi pa hna nih puai an kal hlanah Pathian nih a pekmi hna thluachuah kha ruat in an lungthin an i check a hau, cun an i put khawhmi a ṭha bikmi laksawng kha bia an khiah a hau. Kannih zong lam tampi in Jehovah nih thluachuah a kan pekmi kong kan ruah  tikah a ṭha bikmi laksawng pek awkah a kan forh ve. Thilri chawva telin lungthin dihlak in kan pekmi laksawng nih Jehovah nih a kan pekmi thluachuah zeitlukin dah kan sunsak ti kha a langhter.—2 Kor. 8:12-15.

12, 13. Lungtho tein thawhlawm kan pekmi nih Siangpahrang kan dawt kha zeitindah a langhter, pakhat cio nih thawhlawm zeizat dah kan pek awk a si?

¹² Pathumnak ah, lungtho tein thawhlawm kan peknak thawngin Siangpahrang Jesuh Khrih kan dawt kha kan langhter. Zeitin in dah? Jesuh nih vawleicung a nunnak a dongh lai zan ah a zultu hna sin a chimmi bia hi ruathmanh. (Johan 14:23 rel.) “A ka dawmi paoh nih cun ka bia kha an ngaih lai” tiah a chim. Jesuh “bia” ah vawleicung pumpi ah Pennak kong thawngṭha chim ding timi nawlbia aa tel. (Matt. 24:14; 28:19, 20) Pennak kong chimnak rian kauhter awkah kan caan, kan thazaang le kan thilri kha a si khawh chungin kan hmannak thawngin Jesuh “bia” kha kan ngaih. Cuticun Messiah Siangpahrang kan dawt kha kan langhter.

¹³ Zumhfekmi Pennak rammi kan si bantukin thawhlawm peknak thawngin Pennak kha kan lungthin dihlak in  bawmh kan duh. Pakhat cio nih thawhlawm zeizat dah kan pek awk a si? Mah cu pumpak biakhiahnak a si. Kan dihlak in thawhlawm kan pek tikah kan si khawh chungin kan pek. Jehovah Tehte tam deuh cu a si a fakmi kan si. (Matt. 19:23, 24; Jeim 2:5) Asinain pek duhnak lungthin he thawhlawm tlawmte kan pekmi hmanh kha Jehovah le a Fapa nih an sunsak ti kan hngalh caah kan hna a ngam.—Mar. 12:41-44.

14. Kum tampi chungah Jehovah Tehte Hna nih cauk kha zeitindah mi an pek hna?

¹⁴ Kum tampi chungah Jehovah Tehte Hna nih Baibal hrambunhmi cauk mi an pek hna tikah cauk man an rak hal hna. Asinain a si a fakmi hna hmanh nih cauk an rel khawh nakhnga a man kha a tlawm khawh chung tlawm in an hal hna. Inn-ngeitu nih cauk kha a duh nain a man pek awk a ngeih lo ahcun thawngthanhtu hna nih cauk kha lungtho tein an pek hna. An lungduhnak cu lungthin ṭha a ngeimi hna nih mah cauk kha rel hna sehlaw ṭhatnak hmu hna seh ti a si.

15, 16. (a) 1990 in Uktu Bu nih cauk mi kan pek hnaning kha zeitindah an hun thlen? (b) Zeitindah mah lungtho tein thawhlawm pek khawh a si? (“ Thawhlawm Hmanning” timi rinli kulh zong zoh.)

¹⁵ 1990 in Uktu Bu nih cauk mi kan pek hnaning kha an hun thlen. Mah kum thawkin United States ah cauk mi an pek hna tikah a man an hal ti hna lo, an sian tawk in thawhlawm tu pek khawh a si. Mah ram i Khrihfabu dihlak kha hitin ca an kuat hna: “Mekazin le cauk hna kha thawngthanhtu le rel a duhmi midang pek tikah a man hal asiloah man pek awkah forh a si ti lai lo. . . . Kan ṭuanmi fimcawnnak rian ca i a dihmi caah thawhlawm pek a duhmi ahopaoh nih an pek khawh, asinain thawhlawm an pek zong, pek lo zongah cauk kha an i lak khawh ko.” Mah thlennak nih kan ṭuanmi rian cu lungtho tein kan ṭuanmi a si ti le ‘Pathian bia a zuartu kan si lo’ ti kha a langhter. (2 Kor. 2:17, NW) A hnuah mah lungtho tein thawhlawm peknak timhtuahnak kha vawleicung pumpi i zung ṭengnge hna zong nih an hun zulh ve.

¹⁶ Zeitindah mah lungtho tein thawhlawm pek khawh a si? Jehovah Tehte Hna Biakinn ah thawhlawm kuang hna kha aa tlakmi hmun ah chiah a si. Mah kuang ah sanh khawh a si asiloah Jehovah Tehte Hna hmanmi phungning pakhatkhat ah dairek in kuat khawh a si. Kum fatin Vennak Innsang capar pakhat ah zeitindah thawhlawm pek khawh a si timi kong fianter a si.

17-19. Thawhlawm kha (a) vawleicung pumpi rianṭuannak, (b) vawleicung pumpi Biakinn saknak le (c) mahle Khrihfabu herhmi caah zeitindah hman a si kha fianter.

¹⁷ Vawleicung pumpi rianṭuannak. Thawhlawm kha vawleicung pumpi phungchim rianṭuannak i a dihmi caah hman a si. Mah ah vawleicung pumpi i pek dingmi cauk chuahnak, zung ṭengnge inn saknak le remhnak le tinṭan a  phunphun caah a dihmi aa tel. Mah lengah thawhlawm kha missionary, khualtlawng rianṭuantu le special hmaikal pawl ca zongah hman a si. Leiser ral a tongmi unau pawl bawmhnak ca zongah hman a si. d

¹⁸ Vawleicung pumpi Biakinn saknak. Biakinn sak asiloah remh a herhmi Khrihfabu bawmhnak caah thawhlawm kha hman a si. Vawleicung pumpi i Khrihfabu hna nih thawhlawm tampi an pek tikah mah kha a dang Khrihfabu bawmhnak caah an hman khawh ṭhan. e

¹⁹ Mahle Khrihfabu herhmi. Thawhlawm kha Khrihfabu i a herhmi le Biakinn zohkhenhnak caah hman a si. Khrihfa upa nih thawhlawm cheukhat kha vawleicung pumpi rianṭuannak ca i hman awkah zung ṭengnge i kuat dingin bia an khiah men lai. Cutin a si ahcun Khrihfa upa hna nih Khrihfabu hnatlaknak an hal hna a hau. An hna a tlak ahcun bia an khiahmi thawhlawm kha an kuat lai. Khrihfabu tangka tlaitu unaupa nih thla fatin tangka cazin a tuah lai i Khrihfabu ah a relpiak hna lai.

20. Na “chawva” in zeitindah Jehovah kha na upat khawh?

²⁰ Vawleicung pumpi Pennak kong chimnak le zultu siternak rian ah aa telmi vialte kong kan ruah tikah ‘BAWIPA kha kan chawva in upat’ awkah forh kan si. (Ptb. 3:9, 10) Kan chawva ah pumsalei, lungthinlei le thlaraulei kan thilti khawhnak aa tel. Mah kha Pennak rian ṭuannak ah tling tein hman kan duh. Kan chawva ah kan thilri zong aa tel ti kha philhhlah. Kan pek khawhmi kha kan pek khawh caan ah pek awkah bia khiak hna u sih. Lungtho tein thawhlawm kan pekmi nih Jehovah thang a ṭhatter i Messiah Pennak kan ṭanpi kha a langhter.