1, 2. Vawlei Thar Lehnak nih Pathian min kha zeitindah a hlorh?

 1947, December 2, Nihnih ni, a kik ngaimi zing ah New York, Brooklyn Bethel i chiti thuhmi unaupa phu hmete nih rian nganpi pakhat kha ṭuan hram an thawk. Mah rian cu a har ngaimi a si nain mah hnu kum 12 tiang lungdong loin an ṭuan. Saupi a rauh hnu, 1960, March 13, Zarhpi ni ah Baibal thar an lehmi i hmanung bik cacang kha an liim. Thla thum a rauh hnu, 1960, June 18 ah Unaupa Nathan Knorr nih England, Manchester i tuahmi civui ah Vawlei Thar Lehnak Baibal i hmanung bik volume kha a rak chuah tikah aa pummi cu an lung a tho tuk. Aa pummi hna i an intuarnak kha phungchimtu nih mah bia in a langhter: ‘Nihin hi vawleicung pumpi i Jehovah Tehte Hna caah lunglawmh awk ni taktak a si.’ Mah Baibal thar i aa thleidannak pakhat cu Pathian min a hman lengmangmi hi a si, mah cu a hleiin lunglawmh awk a si.

² Baibal lehnak tampi ah Pathian min an telh lo. Asinain Jehovah i chiti thuhmi salle nih Pathian min hloh ding timi Satan tinhnak kha an doh. Mah ni ah an chuahmi Vawlei Thar Lehnak i biahmaiṭhi ah hitin aa ṭial: “Mah Baibal aa thleidan biknak cu Pathian min kha amahle hmun ah telh ṭhan a simi hi a si.” Vawlei Thar Lehnak ah Pathian min, Jehovah hi voi 7,000 leng a um. Mah Baibal lehnak nih vancung kan Pa, Jehovah a min kha a hlorh taktak.

3. (a) Unau pawl nih Pathian min sullam he aa tlaiin zeidah an hun hngalh? (b) Exodus 3:13, 14 kha zeitindah kan hngalhthiam awk a si? (“ Pathian Min Sullam” timi rinli kulh zoh.)

³ A hmasa deuh ah Baibal Siangngakchia hna nih Pathian min cu “Keimah cu keimah ka si ko” timi sullam a ngei tiah an rak ruah. (Ex. 3:14) Cucaah 1926, January 1, Vennak Innsang nih hitin a ti: “Jehovah timi min nih hramthawknak zong a um lomi, donghnak zong a um lomi a sinak kha a langhter.” Asinain Vawlei Thar Lehnak Baibal a lettu hna nih an rian an thawk tikah Jehovah min nih a um taktakmi a si lawng si loin a hleiin tinhnak a ngeimi le aa tinhnak a tlintermi Pathian a si zong a langhter ti kha hngalh awkah Jehovah nih a bawmh hna. Jehovah timi min cu “A Hung Siter” timi sullam a ngeih  kha an hun hngalh. Jehovah nih van le vawlei le thleidan khawhnak a ngeimi thilnung kha a ummi a hung siter hna, cun a duhnak le aa tinhnak zong a tlinter thluahmah. Pathian min hlorh cu zeicah a biapit tuk, mah hlorhnak ah zeitindah kan i tel khawh ve?

4, 5. (a) “Na min thiang cu upat si ko seh” tiah thla kan cam tikah zeidah kan halmi a si? (b) Pathian nih zeitin in le zeitikah dah a min a thianter lai?

⁴ Jehovah nih a min kha hlorh siseh ti a duh. A biapi bikmi aa tinhnak cu a min thianter kha a si, cutin a si kha Jesuh nih zohchunhawk thlacamnak ah a hal hmasa bikmi “Na min thiang cu upat si ko seh” timi bia ah a lang. (Matt. 6:9) Cutin thla kan cam tikah zeidah kan halmi a si?

⁵ Hi cauk i Ṭhen 1nak ah kan rak i ruah cang bantukin “Na min thiang cu upat si ko seh” timi nawlnak cu Jesuh zohchunhawk thlacamnak chung i Jehovah tinhnak he aa pehtlaimi nawlnak pathum lakah pakhat a si. A dang pahnih cu “Na Pennak cu rung tlung ko seh” timi le ‘na duhnak tuah si ko seh’ timi an si. (Matt. 6:10) Jehovah kha a Pennak tlunter awk le a duhnak tlinter awkah kan hal bantukin a min thianter awk zongah kan hal. Phundang cun, Eden dum ah dohnak a rak chuah ri in a min thangchiat a simi vialte thianter awkah Jehovah kha kan halmi a si. Cu bantuk thlacamnak kha Jehovah nih zeitindah a leh lai? Hitin a chim: “Miphun hna sin i nan thurhhnawmhter cangmi a liannganmi ka min cu ka thianter lai.” (Ezek. 36:23; 38:23) Armageddon ah Jehovah nih ṭhatlonak vialte a hrawh tikah a min kha sermi thil vialte hmaiah a thianter lai.

6. Pathian min thianternak ah zeitindah kan i tel khawh?

⁶ Hlanliopi in Jehovah nih a salle kha a min thianternak ah a telter ve hna. Pathian min kha thianter chin awkah kanmah nih kan tuah kho lo. Zeicahtiah a min cu tling hirhiar tein a thiang cangmi a si. Cu a si ah zeitindah kan thianter khawh? Jehovah nih hitin a ti: “A Lianngan Bik BAWIPA keimah hi a thiangmi ka si kha philh hlah.” Cun a miphun kha hitin a ti hna: “Keimah cu Israel Pathian thiang ka si kha nan hngalh lai. Nan ka upat lai i nan ka ṭihzah lai.” (Isa. 8:13; 29:23) Cucaah Pathian min kha a dang min he kan thleidan i a sang deuh ti kan philhlonak in, mah min nih a aiawhmi kha kan upatnak in le midang zong nih mah min kha a thiangmi in an hmuh ve nakhnga kan bawmh hnanak in kan thianter khawh. A hleiin Jehovah kha kan Uktu in kan cohlan i lungtak in a nawl kan ngaihnak thawngin a min kan upat kha kan langhter khawh.—Ptb. 3:1; Biat. 4:11.

7, 8. (a) Pathian miphun cu a min putu an si khawh nakhnga zeicah a caan pek a hauh? (b) Atu zei kong dah kan i ruah lai?

⁷ Chanthar Pathian salle nih 1870 hnuin Pathian min kha an cauk hna ah an rak hman cang. Tahchunhnak ah, 1879, August, Zion Vennak Innsang le mah kum ah chuahmi Va Ngei  lai Ngaknu Hla timi hla cauk ah Jehovah min aa tel. Asinain a miphun kha a thiangmi a min in zapi hmaiah i auhnak nawl a pek hna hlanah mah tinvo sung hmuh awkah an tlinh a herhmi a um tiah Jehovah nih hmuh dawh a si. Mah a hmasa Baibal Siangngakchia hna kha a min putu si awkah Jehovah nih zeitindah a timhtuah hna?

⁸ Kum 1800 hnu le 1900 thawklei kong ruah ṭhan tikah Jehovah nih a min he aa tlaiin a biapimi biatak hngalhthiam chin awkah a miphun zeitindah a bawmh hna ti kha kan hmuh khawh. Mah biatak lak in pathum kha i ruah hna u sih.

9, 10. (a) A hmasa Vennak Innsang hna nih Jesuh kong kha zeicah a bikin an langhter? (b) 1919 thawkin zei thlennak dah a um, mah nih zei ṭhatnak dah a chuahter? (“ Vennak Innsang nih Pathian Min a Hlorhning” timi rinli kulh zong zoh.)

⁹ Pakhatnak, Jehovah salle cu Pathian min a biapitnak he aa tlaiin a hmaanmi hmuhnak an hun ngei. Zumhfekmi a hmasa Baibal Siangngakchia hna nih tlanhnak man timhtuahnak cu Baibal i a biapi bikmi cawnpiaknak a si tiah an rak hmuh. Mah ruangah Vennak Innsang nih Jesuh kong kha a bikin a langhter tawnmi a si. Tahchunhnak ah, mah mekazin an chuah in a kum khatnak chungah Jesuh min kha Jehovah min nakin voihra tam deuh in an langhter. A hmasa Baibal Siangngakchia hna nih Jesuh kha “a hleihluat tukin biapi ah an chiah” tiah 1976, March 15, Vennak Innsang nih a ti. Asinain a hnuah Baibal nih Pathian min kha biapi ah a chiah ti hngalh awkah Jehovah nih a bawmh hna. Mah tikah Baibal Siangngakchia hna nih zeidah an tuah? Mah Vennak Innsang capar ṭhiamṭhiam nih a hleiin 1919 thawkin “Messiah i vancung a Pa, Jehovah kha upatnak tam deuh in an hun pek” tiah a ti. 1920 in 1929 tiangah Vennak Innsang ah Pathian min kha voi 6,500 leng an telh.

¹⁰ Jehovah min kha aa tlak ningin biapi ah an chiahnak thawngin unau pawl nih Pathian min an duh kha an langhter. Hlanlio i Moses bantukin Jehovah ‘min kha thanh’ hram an hun thawk. (Deut. 32:3; Salm 34:3) Baibal biakam ningin Jehovah nih a min an duhmi kha a hmuh i mithmai ṭha a pek hna.—Salm 119:132; Heb. 6:10.

11, 12. (a) 1919 hnu tlawmpal ah kan cauk pawl cu zeiti lam in dah aa thlen? (b) Jehovah nih a salle kha zeidah an lungthin a pekter hna, zeicah?

¹¹ Pahnihnak, a hmaanmi Khrihfa hna nih Pathian pekmi rian kha an hun hngalh. 1919 hnu tlawmpal ah hruaitu a simi chiti thuhmi unaupa hna nih Isaiah chimchungbia kha an hun hlathlai. Mah hnuah kan cauk pawl nih phungchim rian kong kha a bikin a hun langhter. Mah cu ‘a caan hmaan tein pekmi rawl’ a si tiah zeicah kan ti khawh?—Matt. 24:45.

¹² 1919 hlanah, Vennak Innsang nih mah Isaiah bia hi a dikthliar in a fianter bal lo: “‘Ka tehte cu nanmah hi nan si,’ tiah Bawipa nih a ti; ‘ka sal si awkah ka thimmi phun cu nanmah hi nan si.’” (Isaiah 43:10-12 rel.) Asinain 1919 hnu tlawmpal ah kan cauk pawl nih mah Baibal bia kha biapi in a hun langhter i Jehovah pekmi rian a simi, a kong tehte khaannak rian ṭuan awkah chiti thuhmi dihlak kha a forh  hna. 1925 in 1931 kar lawngah Isaiah dal 43 kha Vennak Innsang cauk uk 57 ah a fianter, cun mah cauk pakhat cio nih Isaiah bia kha a hmaanmi Khrihfa hna he an pehtlaihter. Cucaah mah kum hna chungah Jehovah nih a salle kha an ṭuan awk a simi rian ah an lungthin a pekter hna ti cu a fiang ko. Zeicah? Cuticun an i tlak le tlak lo “hneksak hmasa an si lai.” (1 Tim. 3:10) Pathian min putu an si hlanah Baibal Siangngakchia hna nih Jehovah hmaiah a tehte an si taktak kha an rianṭuannak in an langhter hmasa a hau.—Luka 24:47, 48.

13. Baibal nih tawnghtham awkah a biapi bikmi kong kha zeitindah a langhter?

¹³ Pathumnak, Jehovah miphun nih Pathian min thianter a biapitnak kong kha an hun hngalhthiam. 1920 hnuah Pathian min thianternak hi tawnghtham awkah a biapi bikmi a si ti kha an hun hngalh. Mah cu a biapi tukmi biatak a si kha Pathian Bia nih zeitindah a langhter? Tahchunhnak pahnih hi ruathmanh. Pathian nih Izipt ram in Israel mi a chuahter hnanak a ruang lakah a biapi bikmi cu zeidah a si? “Ka minthannak nih vawleicung kha a cul dih” nakhnga a si tiah Jehovah nih a ti. (Ex. 9:16) Israel mi nih an ralchanh tikah zeicah Jehovah nih an cungah zaangfahnak a langhter? Jehovah nih hitin a chim ṭhan: “Israel mi hna an umnak miphun hna lakah khan, ka min cu thurhnawmh a si kun ai lai ri tiah ka min upat in rian kha ka ṭuan ṭhan.” (Ezek. 20:8-10) Mah Baibal cang le a dang cacang hna in Baibal Siangngakchia hna nih zeidah an hngalh?

14. (a) 1930 a phanh lai ah Pathian miphun nih zeidah an hun hngalh? (b) Baibal Siangngakchia hna nih biatak an hngalhthiam chinmi cu phungchim rianṭuannak ah zei huham dah a ngeih? (“ Phungchim Awk A Sinak A Ruang Ṭha” timi rinli kulh zong zoh.)

¹⁴ 1930 a phanh lai ah Pathian miphun nih a luancia kum 2,700 hrawngah Isaiah nih a rak chimmi bia a sullam kha an hun hngalh. Jehovah he aa tlaiin hitin a chim: “BAWIPA nih khan a mi cu a hruai hna i a min cu thangṭhatnak a hmu.” (Isa. 63:14) Baibal Siangngakchia hna nih a biapi bikmi cu kanmah khamhnak hmuh lai kha si loin Pathian min thianter kha a si ti an hun hngalh. (Isa. 37:20; Ezek. 38:23) 1929 ah Chimchungbia timi cauk nih mah biatak kha hitin a tawinak in a chim: “Jehovah min hi sermi thil vialte hmaiah a biapi bikmi a si.” Mah hngalhthiamning thlennak nih Jehovah kong tehte khaan awk le a min thangchiat a simi thianter awkah Pathian salle kha a forh hna.

15. (a) 1930 hnuah unau pawl nih zeidah an hngalh? (b) Zei caan dah a phan cang?

¹⁵ 1930 hnuah unau pawl nih Pathian min a biapitnak he aa tlaiin a hmaanmi hmuhnak an hun ngei i Pathian nih ṭuanter a duhmi hna rian le a min thianter a biapitnak kha an hun hngalhthiam chin. Atu cu Jehovah nih a salle kha zapi hmaiah a min putu sinak tinvo sung pek awkah a khiahmi caan a phan cang. Cutin zeitindah a hung si timi hngalh awkah hlanlio thil sining cheukhat kha i ruah hna u sih.

16. (a) Jehovah nih a min kha a biapimi zei lam in dah a hlorh? (b) Hlanlio ah Pathian min caah miphun pakhat in ahote dah thim hmasa bik an si?

¹⁶ Jehovah nih a min hlorhnak ah a hmanmi a biapimi lam  pakhat cu vawleicung ah a min putu ding miphun a ngeihmi hi a si. BC 1513 thawkin Israel mi kha Jehovah nih a miphun in a rak thim hna. (Isa. 43:12) Asinain Pathian he an tuahmi biakamnak kha an zulh lo caah AD 33 ah a hleikhunmi an i pehtlaihnak cu a rawk. Mah hnu tlawmpal ah Jehovah nih Jentail mi hna ‘lakin amah min putu dingah mi aa thim hna.’ (Lam. 15:14) Mah miphun thar ah miphun kip in a rami Khrih i chiti thuhmi a zultu pawl an i tel i annih cu ‘Pathian Israel miphun’ tiah auh an si.—Gal. 6:16, NW.

17. Satan i zei tinhnak dah a hlawh a tling ngai?

¹⁷ AD 44 hrawngah Khrih zultu pawl cu Pathian lamhruainak thawngin “Khrihfa” tiah ti an hung si. (Lam. 11:26) A hramthawk ah cun mah min cu a hmaanmi Khrihfa  hna he lawng aa pehtlaih caah a rak i thleidang tuk. (1 Pit. 4:16) Asinain Jesuh chimmi rawl kung le belh kung bianabia nih a langhter bantukin Khrihfa timi min kha Khrihfa deu dihlak he zong pehtlaihter ding timi Satan tinhnak cu a hlawh a tling ngai. Cuticun a hmaanmi Khrihfa hna cu Khrihfa deu pawl he kum tampi chung thleidan khawh an si lo. Asinain “rawlṭuan caan” a simi 1914 in thil sining cu a hun i thleng. Zeicah? Vancungmi hna nih a hmaanmi Khrihfa hna le Khrihfa deu pawl kha an hun ṭhen hna caah a si.—Matt. 13:30, 39-41.

18. Min thar kan herh ti hngalh awkah unau pawl kha zeinihdah a bawmh hna?

¹⁸ 1919 ah zumhawktlak sal rian pek a si hnuin Jehovah nih a miphun kha ṭuanter a duhmi hna rian hngalh awkah a bawmh hna. Innkhat hnu innkhat phungchimnak rian nih Khrihfa deu vialte he a thleidanter hna kha an hun hngalh. Mah hnu tlawmpal ah “Baibal Siangngakchia” timi min nih a dang biaknak he fiang tein a thleidanter khawh hna lo kha an hun hngalh. A bikin an i tinhmi cu Baibal hlathlai lawng si loin Pathian kong mi sin chim, a min upat le hlorh kha a si. Cu a si ah an ṭuanmi rian he zei min dah aa tlak bik lai? Mah biahalnak i a phi kha 1931 ah an hun hngalh.

19, 20. (a) 1931 i tuahmi civui ah lungthawh awk ngai a simi zei biakhiahnak dah a um? (b) Min thar an i lakmi kha unau pawl nih zeitindah an lehrulh?

¹⁹ 1931, July thla ah Baibal Siangngakchia 15,000 hrawng cu U.S.A., Ohio, Columbus ah tuahmi civui ah an ra. Civui program catlap i a hmailei ah aa ṭialmi cafang nganpi J le W kha an hmuh tikah ‘mah cafang nih zeidah a chimduhmi a si hnga?’ tiah an ruat i hngalh an duh tuk. Cheukhat nih ‘Hliphlau tein Um ko’ (Just Watch) ti a si tiah an ruah i a dang nih ‘Hngak ko’ (Just Wait) ti a si tiah an ruah. July 26, Zarhpi ni ah Unaupa Joseph Rutherford nih biakhiahnak an tuahmi pakhat kha a chim i hitin a ti: “Jehovah tehte hna timi min in mi nih hngalh le auh kha kan duh.” Mah tikah aa pummi dihlak nih mah biafang pahnih a sullam kha an hun hngalh. Mah cu Isaiah 43:10 in lakmi Jehovah Tehte Hna (Jehovah’s Witnesses) timi a si.

²⁰ Mah kha a thanh tikah aa pummi hna cu thangpi in an au i saupi an kut an bengh. Cutin Colombus ah lungtho ngaiin an lehrulhmi kha radio in vawlei hnarcheu hrawng tiang a thang. Australia ah a ummi Arnast le Naomi Barber nih hitin an chim: “America ah an kut an benghmi kha an theih tikah Melbourne i unau pawl cu an i hlok i saupi an kut an bengh. Mah kha zeitikhmanh ah kan philh kho lai lo.” a

21. Min thar nih unau pawl kha phungchim awkah zeitindah an lung a thawhter hna?

²¹ Baibal hrambunhmi Jehovah Tehte Hna timi min an i lakmi nih Pathian salle kha phungchim awkah an lung a thawhter chin hna. 1931, Columbus ah tuahmi civui ah aa  pummi United States i hmaikal a ṭuanmi Edward le Jessi Grimes te nuva nih hitin an chim: “Inn in kan chuah lioah cun Baibal Siangngakchia kan si nain kan rak kir tikah cun Jehovah Tehte kan si cang. Kan Pathian min thanter chin awkah a kan bawmmi min kan ngeih caah kan i nuam tuk.” Mah civui hnuah unau cheukhat nih phungchimning thar an hun hman. Inn-ngeitu an chawnhbiak hna tikah “JEHOVAH Pathian Pennak kong a chimmi JEHOVAH tehte pakhat ka si” tiin aa ṭialmi card kha an hmuhsak hna. Pathian miphun cu Jehovah min putu an simi kha an i uangthlar i mah min a biapitnak kong kha khuazakip ah chim awkah timhcia an si.—Isa. 12:4, Judson .

22. Jehovah miphun nih aa thleidangmi min an ngeih kha zeinihdah a langhter?

²² Jehovah forhfialnak thawngin chiti thuhmi unaupa hna nih aa thleidangmi mah min an i laknak hi a sau tuk cang. 1931 thawkin Pathian miphun hna i an min kha mi nih an hngalh nakhnga lo Satan nih a tuah kho maw? A dang biaknak he aa thleidang lomi siter awkah aa zuammi cu a hlawh a tling maw? A tling hrimhrim lo. Pathian i a tehte hna timi min nih hlan nakin midang he a kan thleidanter chinchin. (Mikah 4:5; Malakhi 3:18 rel.) Pathian min zalong tein a hmangmi paoh kha Jehovah Tehte an si tiah fawi tein thleidan khawh a si caah Pathian min he kan i naih tuk ti a lang. Artlang in a ummi tlang hna bantuk a simi a hmaan lomi biaknak hna he i cawh loin Jehovah i a hmaanmi biaknak cu “tlang vialte lakah a sang bik tlang a si.” (Isa. 2:2) Atu ah Jehovah biaknak le a thiangmi a min cu hlorh a si taktak.

23. Salm 121:5 ningin Jehovah he aa tlaimi zei a biapimi biatak nih dah thazaang a kan pek?

²³ Atu le hmailei ah Satan dohnak in Jehovah nih a kan huhphenh lai ti hngalh cu thazaang petu taktak a si. (Salm 121:5) Hitin a ṭialmi salm caṭialtu bia hi kan chim ve: “An Pathian ah BAWIPA [“Jehovah,” NW] a simi miphun cu lunglawmmi miphun an si, BAWIPA nih a mi ah a thimmi hna cu lunglawmmi an si.”—Salm 33:12.