RIAN naa dinh ni ah phungchim kal awkah tuan tein naa tim. Asinain na bat pah caah naa cungcang. Zinglei ah i dinh cu a nuam tuk ko lai. Asinain thla na cam i kal awkah bia na khiak. Kum upa unaunu he nan kalṭi i inkhawhnak a ngeihmi le zaangfahnak a ngeihmi nih na lung aan suk tuk. Biatak kha innkhat hnu innkhat ah na chim lioah vawleicung pumpi i unau hna zong nih mah kong hi an chim ve, kan hmanmi cauk an hman ve i aa khatmi cawnpiaknak in ṭhatnak kan hmu ti kha na lung ah a hung chuak. Phungchim a dih tikah thazaang tampi he inn ah na ṭin. Inn ah i dinh loin phungchim na rak kal caah naa nuam tuk.

Atu lioah phungchim rian hi Pathian Pennak i a biapi bikmi rian a si. Phungchim rian cu donghnak caan ah khuaruahhar in a ṭhangcho lai tiah Jesuh nih a rak chimchung. (Matt. 24:14) A bia cu zeitindah a tlin? Hi dal ah phungchim rian caah a biapi tukmi minung hna, phungchimning hna le hmanmi hriamnam hna kong kan i ruah lai, mah hna nih vawleicung pumpi i mi tampi kha Pathian Pennak cu a um taktakmi a si ti hngalh awkah a bawmh hna.