1, 2. (a) Zultu pawl cu zeicah an khuaruah a har? (b) Jesuh nih zei bantuk rawlṭuannak kong dah a chim?

 ZULTU pawl cu an khuaruah a har. Jesuh nih “lo khi ṭha tein hei zoh hna hmanh u; rawl cu an hmin dih cang i ṭuan an cu diam cang khih” tiah a ti hna. Jesuh nih a sawhnak lei an zoh tikah an hmuhmi cu a hminmi rawl kung si loin a keuhkami rawl kung a si. Cucaah ‘zei rawlṭuannak kong dah a si hnga, rawlṭuan awkah thla tam nawn aa duh rih fawn’ tiah khua an ruat ko lai.—Johan 4:35.

² Asinain Jesuh nih rawlṭuannak taktak kong a chimmi a si lo. Thlaraulei rawlṭuannak a simi Khrihfabu ah mi pumhnak he aa tlaiin a biapimi thil pahnih kong cawnpiak a duh hna caah mah kha a chimmi a si. Cawnpiak a duhmi hna cu zeidah a si? A phi hngalh awkah mah kong kha a dikthliar deuh in i ruah hna u sih.

3. (a) Jesuh nih zeicah “rawl cu an hmin dih cang i ṭuan an cu diam cang” tiah a timi a si men lai? (b) Jesuh nih a bia kha zeitindah a fianter?

³ Jesuh le a zultu pawl bia an i ruah cu AD 30 a donghnak lei ah a si i Samaria peng, Saikhar khua pawngah a si. A zultu pawl khua chung i an luh lioah Jesuh cu tikhor pawngah a taang ta i nu pakhat kha biatak a cawnpiak, mah nu nih a cawnpiakmi a biapitnak kha a hngalh colh. A zultu pawl an rak kir tikah minu nih a hngalhmi kong kha mi va chimh awkah khua chungah a va kal zokzok. A chimhmi hna nih an lung a thawhter tuk hna i Jesuh ton awkah tikhor lei ah an ra zokzok. Jesuh nih lo pinlei kha a hei zoh i a sinah a rami Samaria mi kha a hmuh hna tikah “lo khi ṭha tein hei zoh hna hmanh u; rawl cu an hmin dih cang i ṭuan an cu diam cang” tiah a chimmi a si men lai. a Mah cu rawlṭuannak taktak kong si loin thlaraulei rawlṭuannak kong a si ti langhter awkah “rianṭuantu nih . . . zungzal nunnak caah khan rawl kha a pumh lio hna” tiah a ti chap.—Johan 4:5-30, 36.

4. (a) Jesuh nih rawlṭuannak he aa tlaiin zei thil pahnih dah a cawnpiak hna? (b) Zei biahalnak hna dah kan i ruah lai?

⁴ Thlaraulei rawlṭuannak he aa tlaiin zei a biapimi a kong pahnih dah Jesuh nih a cawnpiak hna? Pakhatnak, rian cu a biapi tuk. “Rawl cu an hmin dih cang i ṭuan an cu diam cang” timi bia in a zultu pawl kha rianṭuan awkah a sawm hna. Mah rian a biapitnak langhter awkah “rianṭuantu nih a  ṭuan man kha a hmuh lio cang” tiah Jesuh nih a ti. Rawlṭuan caan cu aa thawk cang caah tlai khawh a si lo. Pahnihnak, rianṭuantu cu an i lawm. A tuhtu le a ṭuantu cu “hmunkhat ah an i lawmṭi” lai tiah Jesuh nih a ti. (Johan 4:35b, 36) “Samaria mi tampi nih . . . an zumh” tikah Jesuh cu aa lawmh tuk bantukin a zultu hna zong rawlṭuannak ah lungthin dihlak in an i telnak thawngin lawmhnak taktak an hmu ve lai. (Johan 4:39-42) Kumzabu pakhatnak ah a cangmi mah kong cu kan caah a biapi tuk, zeicahtiah a lianngan bikmi thlaraulei rawlṭuannak caan a simi tuchan ah a cangmi kong kha a langhter caah a si. Mah chanthar rawlṭuan caan cu zeitik in dah aa thawk? Mah rian ah ahote dah aa tel? A phichuak cu zeidah a si?

5. Vawleicung pumpi rawlṭuan rian kha aho nih dah a hruai, Johan hmuhmi langhnak nih mah rian a biapit tuk kha zeitindah a langhter?

⁵ Lamkaltu Johan nih langhnak ah vawleicung pumpi rawlṭuan rian hruaitu ah Jehovah nih Jesuh rian a pekmi kha a hmuh. (Biathlam 14:14-16 rel.) Mah langhnak ah Jesuh cu bawiluchin aa chinh i fa-ah aa putmi in langhter a si. Jesuh nih “a lu ah sui bawiluchin aa chinh” timi nih Siangpahrang a sinak kha a langhter. “A kut in a haarmi fa-ah pakhat aa put” timi nih Rawlṭuantu a sinak kha a langhter. Jehovah nih vancungmi hmangin “vawleicung rawl cu ṭuan a cu cang” a tinak thawngin mah rian a biapitnak kha a langhter. “A caan a cut cang” caah tlai khawh a si lo. “Na fa-ah kha hmang” timi Pathian nawlpekmi ningin Jesuh nih a fa-ah cu a vun hai i rawl cu a ṭuan, phundang cun vawleicung i mi hna kha Khrihfabu ah a pumh hna. Lungthawh awk ngai a simi mah langhnak nih “rawl cu an hmin dih cang i ṭuan an cu diam cang” ti kha a kan hngalhter ṭhan. Mah langhnak nih vawleicung pumpi rawlṭuan caan aa thawknak kha hngalh awkah a kan bawm maw? A kan bawmh.

6. (a) “Rawlṭuan caan” cu zeitik in dah aa thawk? (b) ‘Vawleicung rawlṭuan caan’ taktak cu zeitik in dah aa thawk? Fianter.

⁶ Biathlam dal 14 ah ṭialmi Johan hmuhmi langhnak ah Rawlṭuantu Jesuh nih bawiluchin aa chinh (caang 14) a ti caah Siangpahrang in rian pek a si cang ti a lang. Mah cu 1914 ah a si. (Dan. 7:13, 14) Mah hnu caan tlawmpal ah Jesuh cu rawlṭuan rian thawk awkah nawlpek a si (caang 15). Cutin aa changchang in a cangmi thil kong kha Jesuh chimmi rawlṭuan caan kong bianabia zongah hmuh khawh a si ve. Mah bianabia ah Jesuh nih “rawlṭuan caan hi chan dongh caan a si” tiah a ti. Cucaah rawlṭuan caan le chan dongh caan cu caan caankhat ah a cang i mah cu 1914 ah a si. “Rawlṭuan caan” aa thawk hnu tlawmpal ah rawlṭuannak taktak aa thawk. (Matt. 13:30, 39) Hnulei caan kong kan zoh ṭhan tikah rawlṭuan caan taktak cu Jesuh Siangpahrang a ṭuan hnu kum tlawmpal ah aa thawk ti kha kan hngalh khawh. Jesuh nih 1914 in 1919 a thawklei tiang chiti thuhmi a zultu kha a  thenh hna. (Mal. 3:1-3; 1 Pit. 4:17) Mah hnu 1919 chungah ‘vawleicung rawlṭuan’ caan cu aa thawk. Phungchim rian a biapitnak kha unau pawl nih an hngalh nakhnga bawmh awkah Jesuh nih rian a pek kami zumhawktlak sal kha a hman colh. Zeidah a cang ti kha zohhmanh.

7. (a) Phungchim rian a biapitnak hngalh awkah unau pawl kha zei kong hlathlainak nih dah a bawmh hna? (b) Unau pawl cu zei tuah awkah dah forh an si?

⁷ 1920, July, Vennak Innsang nih hitin a ti: “Baibal ṭha tein kan hlathlai tikah church cu pennak kong thanhnak tinvo sung pek a si ti a lang.” Tahchunhnak ah, Isaiah chimchungbia nih unau pawl kha vawleicung pumpi ah Pennak kong thawngṭha thanh awk a si ti kha a hngalhter hna. (Isa. 49:6; 52:7; 61:1-3) Mah rian cu zeitindah kan liim khawh lai ti kha an hngal lo nain Jehovah nih mah caah lam a kan hunpiak lai tiah an zumh. (Isaiah 59:1 rel.) Phungchim rian a biapitnak kong fiang deuh in an hun hngalhmi nih unau pawl kha phungchimnak ah tam deuh in i tel awkah a forh hna. Mah tikah unau pawl nih zeidah an tuah?

8. 1921 ah unau pawl nih phungchim rian he aa tlaiin zei kong pahnih dah an hngalh?

⁸ 1921, December, Vennak Innsang nih hitin a thanh: “1921 hi a ṭha bikmi kum a si, hlan nakin tukum chungah biatak a theimi an tam deuh.” Hitin a ti chap: “Rian ṭuan awk tampi a um rih. . . . Mah kha lunglawm tein ṭuan hna u sih.” Phungchimnak he aa tlaiin Jesuh nih lamkaltu pawl a chimhmi hna a biapimi thil pahnih kha unau pawl nih an hngalh ti na hmuh ko lai. Mah cu rian hi a biapi tuk i rianṭuantu cu an i lawm timi a si.

9. (a) 1954, Vennak Innsang nih rawlṭuan rian he aa tlaiin zeidah a chim, zeicah? (b) A luancia kum 50 chungah vawleicung pumpi ah thawngthanhtu zeitlukin dah an karh? (“ Vawleicung pumpi Ṭhanchonak” timi zoh.)

⁹ 1930 hnuah unau pawl nih tuudang ah aa telmi mibu nganpi nih Pennak thawngṭha an cohlan lai ti kha an hngalhthiam tikah phungchim rian kha fak deuh in an hun ṭuan. (Isa. 55:5; Johan 10:16; Biat. 7:9) A phichuak cu zeidah a si? Pennak kong a chimmi hna cu 1934 ah 41,000 in 1953 ah 500,000 tiang an karh. 1954, December 1, Vennak Innsang nih hitin a ti: “Vawleicung pumpi rawlṭuan rian a hlawh a tlin khawhmi hi Jehovah thlarau le a Bia ṭhawnnak thawngin a si.” b—Zekh. 4:6.

10, 11. Anṭam ci bianabia nih thlaici a ṭhannak he aa tlaiin zeidah a langhter khun?

¹⁰ Jesuh chimmi Pennak kong bianabia pawl ah rawlṭuan rian i a phichuak kha fiang tein chimchung a si. Anṭam ci bianabia le thilnu bianabia kha i ruah hna u sih. Mah hna cu a hleiin donghnak caan ah zeitindah an tlin timi kong kha kan i ruah lai.

¹¹ Anṭam ci bianabia. Mipa pakhat nih anṭam ci a tuh. Mah cu thingkung tia in a ṭhang i va nih cuka ah bu an ser. (Matthai 13:31, 32 rel.) Mah bianabia nih thlaici a ṭhannak he aa tlaiin zeidah a langhter khun? (1) A nganpi tiang a ṭhanmi cu khuaruahhar a si. “Thlaici lak i a hme bikmi” cu ‘a nge a ngan pipimi’ thingkung ah a hung cang. (Mar. 4:31, 32) (2) A ṭhang ti cu a fiang. Thlaici cu an tuh hnuah “a hung ṭhang.” Jesuh nih “a ṭhang men lai” tiah a ti lo. “A hung ṭhang” ti tuin a ti. A ṭhanmi cu ngolter khawh a si lo. (3) A ṭhangmi thingkung nih va pawl kha an lung a lak hna i cuka ah bu an ser. “Vate kha an ra i a thladem ah bu kha an ser.” Mah a kong pathum cu chanthar thlaraulei rawlṭuannak he zeitindah aa pehtlaih?

12. Anṭam ci bianabia cu tuchan rawlṭuan rian he zeitindah aa pehtlaih? (“ Baibal Cawnpiaknak Karhnak” timi zong zoh.)

¹² (1) A nganpi tiang a ṭhang: Mah bianabia nih Pennak kong thawngṭha le Khrihfabu a ṭhanning kha a hleiin langhter. 1919 thawkin a lung a thomi rawlṭuantu hna cu dirh ṭhanmi Khrihfabu ah pumh an si. Mah lio caan ah rianṭuantu cu an tlawmte nain khulrang in an karh. 1900 hnuin tuchan tiangah zeitlukin dah an karh ti kha hmuh khawh a si. (Isa. 60:22) (2) A fiang: Khrihfabu a ṭhannak cu ngolter khawh a si lo. Pathian a ral hna nih a ci hmete hmaiah zei bantuk dawnkhantu thil an chiah hmanhah a ci cu a ṭhang thluahmah. (Isa. 54:17) (3) Bu an ser: Thingkung ah bu a sermi “vate” nih ram 240 hrawngin a rami lungthin ṭha a ngeimi mi nuai tampi kha a aiawh hna. Annih cu Pennak kong a cohlang i Khrihfabu ah a lutmi kha an si. (Ezek. 17:23) Khrihfabu ah thlarau rawl, hrimhnak le huhphenhnak an hmuh.—Isa. 32:1, 2; 54:13.

13. Thilnu bianabia nih zei bantuk ṭhannak dah a langhter khun?

¹³ Thilnu bianabia. Nu pakhat nih changvut ah thilnu tlawmpal a cawh tikah changvut cu a ningpi in a tho. (Matthai 13:33 rel.) Mah bianabia nih zei bantuk ṭhannak dah a langhter khun? A kong pahnih i ruah hna u sih. (1) Ṭhannak nih thlennak a chuahter. Thilnu nih “changvut cu a ningpi in a thawhter.” (2) A ṭhannak cu a cul dih. Thilnu nih “changvut rel khat” kha a ningpi in a thawhter. Mah a kong pahnih cu chanthar thlaraulei rawlṭuannak he zeitindah aa pehtlaih?

14. Thilnu bianabia cu tuchan rawlṭuan rian he zeitindah aa pehtlaih?

 ¹⁴ (1) Thlennak: Thilnu nih Pennak kong thawngṭha kha a aiawh i changvut nih minung kha a aiawh. Thilnu le changvut cu aa cawh tikah changvut aa thlen bantukin mi nih Pennak kong thawngṭha an cohlan tikah an lungthin aa thleng ve. (Rom 12:2) (2) A cul dih: Thilnu a karhmi nih Pennak kong thawngṭha a karhmi kha a aiawh. Thilnu cu changvut a ningpi in a cul dih tiang a karh bantukin Pennak kong thawngṭha cu “vawleicung khuazakip” ah a karh. (Lam. 1:8) Mah bianabia nih kan rianṭuannak khenkham a sinak hmun hmanhah Pennak kong thawngṭha cu a karh lai ti a langhter, cu bantuk hmun ah kan rianṭuannak cu mi nih an hmuh lo hmanhah Pennak kong cu a karh lai.

15. Isaiah 60:5, 22 bia cu zeitindah a tlin? (Cahmai 93 i “ Jehovah nih a Tuah Khawh” timi le cahmai 96-97 i “ ‘A Hme bik’ cu ‘a Ṭhawngmi Miphun’ ah a Canning” timi rinli kulh zong zoh.)

¹⁵ Jesuh nih mah bianabia hna a chim hlan kum 800 hrawngah Jehovah nih Isaiah hmangin chanthar thlaraulei rawlṭuan rian a kauh laining le mah rian nih lawmhnak a chuahter laining kong kha a chimchung. c Mi cu “lamhlapi in” an ra lai i a bupi chungah an lut lai tiah Jehovah nih a chim. “Jerusalem” in langhtermi vawleicung ah a taang rihmi  chiti thuhmi hna kha Jehovah nih hitin a ti hna: “Na hmuh lai i lunglawmhnak in na khat lai, naa lawmh tuk ah a ther in na ther lai. Miphun hna nih an rumnak cu na sinah an rak put lai i naa lawmh tuk ah a ther in na ther lai. Miphun hna nih an rumnak cu na sinah an rak put lai i rili bangin an chawva cu a ra lai.” (Isa. 60:1, 4, 5, 9) Mah bia cu a hmaan taktak. Caan saupi Jehovah a bia cangmi hna nih an ram ah thawngthanhtu tlawmte in thong tampi tiang an karhmi an hmuh tikah an i lawm tuk.

16, 17. ‘A tuhtu le a zuntu hmunkhat ah an i lawmhṭinak’ a ruang pakhat cu zeidah a si? (“ Amazon ah Cazual Pahnih nih Minung Pahnih An Lung a Suk hnaning” timi rinli kulh zong zoh.)

¹⁶ Jesuh nih lamkaltu pawl a chimhmi hna mah bia hi naa cinken ko lai: “Rianṭuantu nih . . . zungzal nunnak caah khan rawl kha a pumh lio hna, cucaah a tuhtu le a zuntu kha an pahnih in hmunkhat ah an i lawmṭi lai.” (Johan 4:36) Vawleicung pumpi rawlṭuan rian ah zeicah ‘hmunkhat ah kan i lawmhṭi’? Lam phunphun in a si. Mah lak i pathum kha i ruah hna u sih.

¹⁷ Pakhatnak, mah rian ah Jehovah aa telmi kan hmuhmi nih a kan lawmhter. Pennak kong kan chim tikah thlaici kan tuh a si. (Matt. 13:18, 19) Mi pakhat kha Khrih zultu si awk kan bawmh tikah a theitlai kan zun a si. Pennak thlaici ‘a keuh i a ṭhan’ nakhnga Jehovah nih a tuahmi kha kan hmuh tikah kan i nuam tuk. (Mar. 4:27, 28) Kan vorhmi thlaici cheukhat cu a hnuah a keuh i midang nih an zun. Tipil a innak kum 60 a si cangmi Britain i unaunu Joan bantuk hmuhtonnak hi na ngei ve men ko lai. Hitin a chim: “A luancia kum tampi lioah phung na rak kan chimh i kan lung chungah thlaici na rak tuh tiah a ka timi hna he kan i tong tawn. A hnuah unau dang nih Baibal an cawnpiak hna i Jehovah sal si awkah an bawmhmi hna kha ka rak hngal lo. Ka rak tuhmi thlaici cu a ṭhang i zun a si caah kaa nuam tuk.”—1 Korin 3:6, 7 rel.

18. 1 Korin 3:8 ah i lawmh awk a sinak zei a ruang dah a um?

¹⁸ Pahnihnak, Paul nih a chimmi mah bia hi kan i cinken caah aa nuammi rianṭuantu kan si peng: “An ṭuanning cio khan Pathian nih laksawng a pek ko hna lai.” (1 Kor. 3:8) Laksawng cu rian i a phichuak in si loin rian ṭuanning in pek a si. Mah cu lehrulhnak a um setsai lonak hmun ah phung a chimmi hna caah thazaang petu taktak a si. Thlaici tuhnak ah lungthin dihlak in aa telmi unau hna cu Jehovah hmuhnak ah ‘thei tampi a tlaimi’ an si caah an i lawm kho.—Johan 15:8; Matt. 13:23.

19. (a) Matthai 24:14 i Jesuh chimchungbia cu kan i lawmhnak he zeitindah aa pehtlaih? (b) Zultu siternak ah kan hlawh a tlin lo hmanhah zeidah kan i cinken awk a si?

¹⁹ Pathumnak, kan rian nih chimchungbia a tlinter caah kan i nuam. Lamkaltu hna nih “na ratnak ding hmelchunhnak le atu chan donghnak ding hmelchunhnak ah zei thil dah a um hna lai?” tiah an hal tikah Jesuh nih a lehmi hna kha ruathmanh. Mah hmelchunhnak lakah pakhat  cu vawleicung pumpi phungchim rian kha a si lai tiah a ti. Mah cu zultu siternak rian kha maw a chim duhmi a si? A si lo. Hitin a ti: “Miphun vialte hna ca i tehte si awkah Vancung Pennak kong Thawngṭha hi khuazakip ah chim a si lai.” (Matt. 24:3, 14) Cucaah thlaici tuhnak a simi Pennak kong chimnak hi hmelchunhnak pakhat a si ve. Pennak kong thawngṭha kan chim tikah zultu siternak ah kan hlawh a tlin lo hmanhah “tehte” khaannak ah kan hlawh a tling ti kha kan i cinken. d Cucaah mi nih zeitin an kan lehrulh hmanhah Jesuh chimchungbia tlinternak ah kan i tel ve i ‘Pathian rian ṭuanṭi hawi’ sinak tinvo sung kan hmu. (1 Kor. 3:9, NW) Mah cu lunglawmh awk a sinak a ruang ṭha taktak a si.

20, 21. (a) Malakhi 1:11 bia cu zeitindah a tlin? (b) Rawlṭuan rian he aa tlaiin zei tuah awkah dah bia na khiah, zeicah?

²⁰ Kumzabu pakhatnak ah Jesuh nih lamkaltu hna kha rawlṭuan rian a biapitnak hngalh awkah a bawmh hna. 1919 thawkin Jesuh nih chanthar a zultu hna kha mah biatak hngalh awkah a bawmh ve hna. Mah tikah Pathian miphun nih an rianṭuannak kha an kauh. Rawlṭuannak rian cu ngolter khawh a si lo ti cu a fiang ko. Profet Malakhi nih a chimchung bantukin tuchan ah phungchim rian cu “nichuahlei deng in nitlaklei deng tiang” ṭuan a si cang. (Mal. 1:11) Nichuahlei in nitlaklei tiang, khoika i a ummi an si hmanhah thlaici tuhtu le rawlṭuantu hna cu hmunkhat ah rian an ṭuanṭi i an i lawmṭi. Ni a chuah in ni a tlak tiang, phundang cun zingka in zanlei tiang asiloah chun nitlak a biapimi lungput he rian kan ṭuan.

²¹ A luancia kum 100 chung i a cangmi thil kan zoh tikah Pathian salle cu phu hmete in “a ṭhawngmi miphun” ah an i canmi kan hmuh caah kan i lawm tuk i ‘a ther in kan ther.’ (Isa. 60:5, 22) Mah kan i lawmhnak le “lo ngeitu” Jehovah kan dawtnak nih a lianngan bikmi rawlṭuannak rian ah i tel zungzal awkah kan dihlak in kan forh hram ko seh.—Luka 10:2.