PULPIT cung i phung a chimmi unaupa kha na nih. Anih cu nan Khrihfabu i mino unaupa a si i civui ah a voikhatnak phung a chim a si. A phungchimmi na ngaih lioah Pathian miphun hmuhmi cawnpiaknak kha na khuaruah a har tuk. Mah unaupa i a voikhatnak phung a chim lio kha naa cinken rih i zeitlukin dah a ṭhancho ti kha na hmuh. Hmaikal Tinṭan a kai hnuah a ṭhangcho tuk. Nai zongah a nupi he Pennak Phungchimtu hna caah Tinṭan an kai. Mah unaupa i a ṭha tukmi phungchimnak a dih in na kut na bengh lioah na pawngkam na zoh i Pathian miphun dihlak hmuhmi cawnpiaknak kong kha na ruat.

Jehovah nih a miphun dihlak a “cawnpiak” hna lai caan kong kha Baibal nih a chimchung. (Isa. 54:13) Kannih cu mah caan chungah a nungmi kan si. Fimcawnnak kha bupi chuahmi cauk lawngin si loin pumhnak le civui hna zongin kan hmuh. Mah lengah Jehovah bupi rian ṭuan khawh awkah a kan timhtuahmi tinṭan pawl zongin kan hmuh. Hi dal ah mah fimcawnnak dihlak nih tuchan ah Pathian Pennak nih a uk cang ti a langhterning kha kan i ruah hna lai.