1. Zultu pawl hmunkhat ah an i pumh lioah zei bawmhnak dah an hmuh i mah cu zeicah an herh?

 JESUH a thawhṭhan hnu tlawmpal ah a zultu pawl cu pakhat le pakhat tha i pek awkah an i pum. Asinain an ral pawl an ṭih hna caah innka an i hrenhkhumh. Mah lioah Jesuh cu an sinah a lang i “Thiang Thlarau kha hmu ko u” tiah a ti hna tikah ṭihnak an ngeihmi cu a tlau ko lai. (Johan 20:19-22 rel.) A hnu, zultu pawl hmunkhat ah an i pumh ṭhan tikah Jehovah nih thiang thlarau a toih hna. Mah cu phungchim rian ṭuan khawh zungzal awkah thazaang petu taktak a si lai.—Lam. 2:1-7.

2. (a) Jehovah nih zeitindah thazaang a kan pek i mah kha zeicah kan herh? (b) Zeicah Chungkhar Pumhnak cu a biapit tuk? (A tanglei fianternak le cahmai 175 i “ Chungkhar Pumhnak” timi rinli kulh zoh.)

² Kumzabu pakhatnak i unau hna bantukin kannih zong harnak kan tong ve. (1 Pit. 5:9) A caan ah mi kan ṭih men hna lai. Cucaah phungchim rian ah inkhawhnak kan ngeih nakhnga Jehovah pekmi thazaang kan herh. (Efe. 6:10) Mah thazaang kha a bikin pumhnak ah Jehovah nih a kan pek. Atu ah zarh fate pumhnak pahnih kan ngei, Zapi Pumhnak, Vennak Innsang le zarhlai ah tuahmi Khrihfa Nunning le Rianṭuannak tiah auhmi kha an si. a Mah lengah kum fate tuahmi pumhnak pali zong kan ngei, mah cu pengkomh civui, peng civui voihnih le Khrih a Thih Philhlonak an si. Mah pumhnak dihlak ah i pumh cu zeicah a biapit? Tuchan kan i pumhning cu zeitindah thlen a si? Pumhnak he aa tlaiin kan lungput nih kan kong zeidah a langhter?

3, 4. Jehovah nih a miphun kha zeidah a fial hna? Tahchunhnak pe.

³ Jehovah nih a miphun kha amah biak awkah hmunkhat ah i pumh a fial hnanak hi a saupi cang. Tahchunhnak ah, BC 1513 ah Jehovah nih Israel mi kha Nawlbia a pek hna, mah Nawlbia ah innchungkhar kip nih amah an biak khawh nakhnga le a Nawlbia an cawn khawh nakhnga zarh fate Sabbath ulh ding timi aa tel. (Deut. 5:12; 6:4-9) Israel mi nih mah nawlbia an zulh tikah an innchungkhar pehtlaihnak a fek i an miphun ningin Pathian he an i pehtlaihnak zong a fek chin. Asinain Nawlbia an zulh lo tik le Jehovah biak awkah  hmaan tein i pumh ding timi kha zei i an rel lo tikah Pathian mithmai ṭha an sung.—Lev. 10:11; 26:31-35; 2 Chan. 36:20, 21.

⁴ Jesuh kong zong kha ruathmanh. Anih cu zarh fate Sabbath ni ah pumhnak inn ah a kal lengmang. (Luka 4:16) Jesuh a thih i a thawhṭhan hnuah a zultu pawl cu Sabbath ulh a hau ti lo nain hmaan tein hmunkhat ah an i pum lengmang rih. (Lam. 1:6, 12-14; 2:1-4; Rom 14:5; Kol. 2:13, 14) Mah pumhnak hna ah kumzabu pakhatnak i Khrihfa hna nih cawnpiaknak le thapeknak an hmuh lawng si loin thlacamnak, a phi peknak le hlasaknak in Pathian sinah thangṭhat raithawinak an pek.—Kol. 3:16; Heb. 13:15.

5. Zarh fatin tuahmi pumhnak le kum fatin tuahmi civui ah zeicah kan i pumh? (Cahmai 176 i “ Pathian Miphun Lung a Rualtermi Kum fatin tuahmi Pumhnak” timi rinli kulh zong zoh.)

⁵ Cu bantukin zarh fatin tuahmi pumhnak le kum fatin tuahmi civui ah kan i pumh tikah Pathian Pennak kan bawmh kan langhter a si. Mah tikah thiang thlarau bawmhnak kan hmu i kan zumhnak kan langhtermi in midang tha kan pek khawh hna. A biapi deuhmi cu thlacamnak, a phi peknak le hlasaknak hna in Jehovah biak awkah caanṭha kan hmu. Pumhnak kan tuahning cu Israel mi le kumzabu pakhatnak i Khrihfa hna tuahning he aa dang men ko lai nain a biapitnak cu aa khat. Tuchan kan i pumhning cu zeitindah thlen a si?

6, 7. (a) Kan i pumhnak i aa tinhnak cu zeidah a si? (b) Phu pakhat le pakhat nih pumhnak an tuahning cu zeitindah aa dan?

⁶ Unaupa Charles Taze Russell nih Pathian Bia in biatak a kawl tikah hmuitinh aa lomi hna he hmunkhat ah i pumh  a hau ti kha a hun hngalh. 1879 ah Russell nih hitin a ṭial: “Keimah le Pittsburgh khua i midang nih Baibal hlathlainak caah Baibal phu pakhat kha kan dirh i Zarhpi ni fate kan i pum.” Zion Vennak Innsang a relmi hna cu hmunkhat ah i pumh awkah forh an si, 1881 a phanh tikah Pennsylvania peng, Pittsburgh khua ah Zarhpi ni le Nithum ni fate pumhnak an tuah. 1895, November, Vennak Innsang nih mah pumhnak i aa tinhnak cu “Khrihfa hawikomhnak le dawtnak” ṭhanchoter awk le pakhat le pakhat thazaang i pek khawh awkah a si tiah a ti.—Hebru 10:24, 25 rel.

⁷ Kum tampi chungah Baibal Siangngakchia phu pakhat le pakhat pumhnak an tuahning le voi zeizat dah an tuah ti cu aa dang cio. Tahchunhnak ah, 1911 ah chuahmi, United States i phu pakhat nih an ṭialmi ca ah “zarh fate a tlawm bik pumhnak panga kan tuah” tiah an ti. Mah pumhnak hna cu Nikhat ni, Nithum ni, Ninga ni le Zarhpi ni ah voihnih in an tuah. 1914 ah chuahmi, Africa i phu pakhat nih an ṭialmi ca ah “thla khat ah pumhnak voihnih kan tuah, Ninga ni in kan thawk i Zarhpi ni tiang kan tuah” tiah an ti. Asinain a hnuah atu kan i pumhning in thlen a si. Pumhnak pakhat cio i a tuanbia kha a tawinak in i ruah hna u sih.

8. Zapi ca phungchimnak i biatlangpi cheukhat cu zeidah an si?

⁸ Zapi Pumhnak. Unaupa Russell nih Zion Vennak Innsang chuah a si hnu a hmai kum, 1880 ah Jesuh kha i zohchunh in phungchim awkah khual a tlawng. (Luka 4:43) Khual a tlawnnak ah Unaupa Russell nih Zapi Pumhnak kha a rak thawk. Vennak Innsang nih Russell a khualtlawnnak kong a thanhmi ah Russell nih “zapi pumhnak ah ‘Pathian pennak ah aa telmi thil’ timi kong a chim lai” tiah a ti. Ram tampi ah phu asiloah Khrihfabu dirh a si hnu, 1911 ah sining a tlinhmi hna kha an pawngkam hmun i phungchim dingin thlah awkah phu pakhat cio cu forh an si. Annih nih biaceihnak le tlanhnak man ti bantuk phungchimnak paruk kha an chim lai. Phungchimnak pakhat a dih tikah a hmaizarh ah phung a chimtu ding a min le a chim dingmi kong kha thanh a si.

9. Kum tampi chungah Zapi Pumhnak kha zeitindah an rak thlen, mah pumhnak kha zeitindah na bawmh khawh?

⁹ 1945, Vennak Innsang nih vawleicung pumpi ah Zapi Pumhnak campaign aa thawk lai, mah ah “atu lio tonmi a biapimi buaibainak” he aa tlaiin Baibal phungchimnak pariat a um lai tiah a thanh. Kum tampi chungah phungchimtu hna nih zumhawktlak sal timhpiakmi phungchimnak lawng si loin anmah tein an i timhmi phungchimnak zong an chim. Asinain 1981 ah phungchimtu dihlak cu Khrihfabu sinah kuatmi outline cungah hrambunh in chim awkah lamhruainak pek an si. b 1990 tiang zapi ca phungchimnak outline cheukhat ah aa pummi telternak le hmuhsaknak hna aa tel, asinain mah kum thawkin phungchimtu lawng  nih chim awkah lamhruainak pek an si. 2008, January in zapi ca phungchimnak kha minit 45 in minit 30 ah ṭhumh a si. Cu bantukin thlennak tampi a um ko nain ṭha tein timhmi zapi ca phungchimnak nih Pathian Bia zumh awk le Pathian Pennak kong tampi cawn awkah a kan bawmh rih ko. (1 Tim. 4:13, 16) Mah a biapimi Baibal hrambunhmi phungchimnak hna ngaih awkah lennolh na tuahmi hna le Jehovah Tehte a si lomi midang kha lungtho tein na sawm hna maw?

10-12. (a) Vennak Innsang Cawnnak cu zeitindah thlen a si? (b) Zei bia dah naa hal awk a si?

¹⁰ Vennak Innsang Cawnnak. Vennak Innsang Bu nih pilgrim tiah auhmi phungchimtu pawl kha Khrihfabu ah phungchim awk le phungchim rian hruai awkah an thlah hna, annih nih Vennak Innsang cawn awkah pumhnak hmaan tein tuah a herh tiah unau pawl kha 1922 ah ruahnak an cheuh hna. Mah kha unau pawl nih an cohlan i a hmasa ah cun Vennak Innsang cawnnak kha zarh lai asiloah Zarhpi ni ah an tuah.

¹¹ 1932, June 15, Vennak Innsang nih mah pumhnak kha zeitindah tuah ding a si timi lamhruainak a pek chap hna. Bethel Inn ah Vennak Innsang an cawnning kha i zohchunh in mah pumhnak kha unaupa pakhat nih a tlaih awk a si tiah mah capar ah aa ṭial. Unaupa pathum cu a hmai bik tlang ah an ṭhu lai i catlangbu kha aa changchang in an rel lai. Mah lio caan ah capar chungah biahalnak aa ṭial chih lo caah a tlaitu nih aa pummi hna kha an i ruahmi he aa tlaiin biahalnak a tuahter hna lai. Mah hnuah mah biahalnak hna phit awkah aa pummi kha a sawm hna lai. Tam deuh in fianter a herh ahcun a tlaitu nih “a tawinak le a fiannak in” a chim lai.

 ¹² A hramthawk ah cun Khrihfabu kip kha mi tam deuh nih cawn an duhmi mekazin i thimnak nawl pek an si. Asinain 1933, April 15, Vennak Innsang nih Khrihfabu dihlak kha hmanung bik chuahmi mekazin cawn awkah ruahnak a cheuh hna. 1937 ah mah cawnnak kha Zarhpi ni ah tuah awkah lamhruainak pek an si. 1942, October 1, Vennak Innsang ah atu kan hmanmi pumhning he aa tlaimi thlennak kong aa ṭial. Mah mekazin nih cawnnak capar i a tanglei ah biahalnak aa ṭial chih lai i mah kha hman awk a si lai tiah a thanh. Cun pumhnak cu suimilam pakhat chung a si awk a si tiah a ti. A phi pek tikah catlangbu chungin a rel in rel loin “mah bia tein” chim awkah a forh hna. Vennak Innsang Cawnnak cu zumhawktlak sal nih a caan hmaan tein thlarau rawl a kan peknak a biapimi pumhnak a si rih. (Matt. 24:45) Hitin kan i hal awk a si: ‘Zarh fatin Vennak Innsang cawnnak caah kaa tim maw? A si khawh ahcun a phi pek awkah kaa zuam maw?’

13, 14. Khrihfabu Baibal Cawnnak i a tuanbia kha chim. Mah pumhnak he aa tlaiin zei kha dah na duh?

¹³ Khrihfabu Baibal Cawnnak. 1895 hrawng, Kum Thongkhat Deika cauk an chuah hnuah U.S.A., Maryland, Baltimore khua ah a ummi Baibal Siangngakchia Unaupa H. N. Ran nih “Deika Baibal Cawnnak” tuah awkah ruahnak a cheuh hna. Unau inn ah tuahmi mah pumhnak cu a hmasa ah cun hneksaknak in an rak tuah chunh. Asinain 1895, September a phanh tikah Deika Baibal cawnnak cu United States i khua tampi ah an tuah i an hlawh a tling ngai. Mah thla Vennak Innsang nih Baibal Siangngakchia dihlak kha mah pumhnak tuah awkah a forh hna. Mah pumhnak a tlaitu cu carel a thiammi a si awk a si tiah a ti. Catlang pakhat a rel dih in aa pummi kha a phi a pekter hna lai. Catlangbu pakhat chung i catlang vialte a rel dih hnuin an i ruah lai. Cun cherhchanmi Baibal cacang pawl kha a kau lai i a rel lai. Ṭhen pakhat ningin a dih tikah aa pummi pakhat cio nih an i ruahmi he aa tlaiin a tawinak in an chim lai.

¹⁴ Mah pumhnak a min cu voi tampi thlen a si. Baibal ṭha tein a hlathlaimi kumzabu pakhatnak i Berea khuami hna kha cherhchan in Berea Baibal Cawnnak tiah an rak auh. (Lam. 17:11) A hnuah Khrihfabu Caukpi Cawnnak tiah an thlen ṭhan. Atu ah cun Khrihfabu Baibal Cawnnak tiah auh a si. A phuphu in unau inn ah pumh si ti loin unau dihlak ningin Biakinn ah pumh a si cang. Kum tampi chungah caukpi, brochure le Vennak Innsang capar hna kha cawnnak caah hman a rak si. A hramthawk tein aa pummi dihlak kha a phi pek awkah forh an si. Mah pumhnak nih Baibal kong hngalhthiam chin awkah a kan bawmh.  Mah pumhnak caah hmaan tein i timhchung in na si khawh chungin a phi na pe maw?

15. Phungchim Ning Cawnnak cu zeicah rak tuah a si?

¹⁵ Phungchim Ning Cawnnak. New York, Brooklyn zungpi ah rian a ṭuanmi Kery Barber nih hitin a chim: “1942, February 16, Nikhat zan ah Brooklyn Bethel chungkhar i pa vialte cu atu ah Phungchim Ning Cawnnak tiah kan auhmi cawnnak ah i tel awkah min pek dingin sawm an si.” A hnuah Uktu Bu chungtel a hung simi Unaupa Barber nih mah cawnnak cu “tuchan ah Jehovah nih a mi pawl a pehtlaih hnaning thlennak lakah a biapi tukmi a si ve” tiah a ti. Mah nih unau pawl kha cawnpiaknak le phungchimnak i ṭhancho awkah a bawmh tuk hna. Cucaah 1943 thawkin Theocratic Rianṭuannak Cawnnak timi cauk hmete kha vawleicung pumpi i Khrihfabu dihlak nih an hmuh nakhnga an timhtuah. 1943, June 1, Vennak Innsang nih Phungchim Ning Cawnnak  cu Pathian miphun kha “Pennak kong hmualngei tein an chim khawh nakhnga cawnpiaknak” caah tuahmi a si tiah a ti.—2 Tim. 2:15.

16, 17. Phungchim Ning Cawnnak nih phungchimning thiam deuh awk lawng maw a cawnpiak? Fianter.

¹⁶ A hmasa ah cun unau tampi nih aa pummi mi tampi hmai i phungchim kha an ṭih. Unaupa Clayton Woodworth Junior kong hi ruathmanh. 1918 ah Unaupa Rutherford le midang a ding loin thongthlak an si lioah a pa zong aa tel ve. Clayton nih 1943 ah a voikhatnak siangngakchia a ṭuan lioah a intuarmi kha hitin a chim: “Ka caah phungchim cu a har tukmi a si. Ka lei cu aa hrual thluahmah i ka dang a car thluahmah, cun a ka therh i ka aw zong a hmaan lo.” Asinain Clayton cu a ṭhangcho thluahmah i zapi ca phungchimnak tinvo tampi a hmu. Mah cawnnak nih phungchimning thiam deuh awk lawng a cawnpiakmi a si lo. Toidornak ngeih a herh le Jehovah i bochan a biapitnak zong a cawnpiak. Hitin a chim: “Phungchimtu cu biapi a si lo. A biapimi cu ṭha tein i timhchung le Jehovah i bochan kha a si, phungchimtu nih cutin a tuah ahcun a chimmi kha ngaih  an duh lai i a ngaitu hna nih pakhatkhat an i cawn khawh lai ti kha ka hun hngalh.”

¹⁷ 1959 ah unaunu pawl zong mah cawnnak ah min i pek awkah sawm an si. Civui ah mah kong an thanhmi a theimi Unaunu Edna Buaa nih hitin a chim: “Unaunu pawl an lung a thawh tukmi kha kaa cinken rih. Atu cu unaunu pawl caah tinvo a tampi cang.” Kum tampi chungah unau tampi nih Phungchim Ning Cawnnak ah i telnak tinvo sung kha an i tlaih i Jehovah cawnpiahnak kha an cohlan. Atu zongah zarhlai pumhnak ah mah bantuk cawnpiaknak kha kan hmu rih.—Isaiah 54:13 rel.

18, 19. (a) Phungchim Rianṭuannak caah hman awk a tlakmi lamhruainak hna kha khoika in dah kan hmuh? (b) Pumhnak ah zeicah hla kan sak? (“ Biatak Kong Hlasaknak” timi rinli kulh zoh.)

¹⁸ Rianṭuan Pumhnak. 1919 ah lohmun rian timhtuahnak caah pumhnak pawl an rak tuah. Mah lioah mah pumhnak ah unau dihlak in si loin cauk phawtzamhnak ah aa telmi hna lawng an rak i pum. Asinain 1923 thawkin Rianṭuan Pumhnak kha thla khat ah voikhat an tuah i phu asiloah Khrihfabu chungmi dihlak an i pum. 1928 a phanh tikah Khrihfabu hna cu zarh fatin Rianṭuan Pumhnak tuah awkah forh an si. 1935, Vennak Innsang nih Khrihfabu dihlak kha Director (a hnuah Thawng a thanhtu, mah hnuah Kannih Pennak Rianṭuannak tiah auh a si) timi cungah hrambunh in Rianṭuan Pumhnak tuah awkah a forh hna. Tlawmpal a rauh hnuah mah pumhnak cu Khrihfabu dihlak nih hmaan tein tuahmi a hung si.

¹⁹ Tuchan ah phungchim rianṭuannak caah hman awk a tlakmi lamhruainak hna kha zarhlai pumhnak in kan hmuh. (Matt. 10:5-13) Tuahchunhnak cauk kha nangmah pumpak in na ngeih ahcun ṭha tein naa tim maw? Mah ah aa telmi ruahnak cheuhnak hna kha phungchimnak ah na hmang maw?

20-22. (a) Jesuh a thih philhlonak cu zeicah kan tuah? (b) Kum fatin tuahmi Ruahnolhnak ah i pumhnak in zei ṭhatnak dah kan hmuh?

²⁰ Jesuh nih a zultu hna kha a rat ṭhan tiang a thih philhlonak tuah awkah a fial hna. Lanhtak puai bantukin Khrih a thih Philhlonak cu kum fatin tuahmi puai a si. (1 Kor. 11:23-26) Mah pumhnak ah kum fatin mi nuai tampi an i pum. Mah pumhnak nih chiti thuhmi hna kha Pennak ro cotu sinak tinvo sung kha a hngalhter ṭhan hna. (Rom 8:17) Tuudang kha Pathian Pennak Siangpahrang upat awk le a cungah zumhfek tein um awkah a forh hna.—Johan 10:16.

²¹ Unaupa Russell le a hawile nih Bawipa Zanriah tuah a biapitnak le kumkhat ah voikhat lawng tuah awk a si kha an hun hngalh. 1880, April, Vennak Innsang nih hitin a chim: “Hika Pittsburgh i a ummi mi tampi nih . . . Lanhtak puai [Ruahnolhnak] kan tuahnak le kan Bawipa a pum le a thi caah hmanmi kan eidinnak hi kum tam nawn a si cang.” Tlawmpal a rauh tikah Ruahnolhnak puai a dih in civui an  tuah chih. Cutin an tuahmi kha 1889 ah a voikhatnak cazin an khumh i aa pummi hi 225 an si i 22 tipil an ing.

²² Tuchan ah cun Ruahnolhnak tuah dih in civui kan tuah chih ti lo, asinain Biakinn asiloah hlanmi inn ah tuahmi Ruahnolhnak puai ah rak i pumh ve awkah ahopaoh kha kan sawm hna. 2013 ah Jesuh a thih philhlonak ah mi nuai 19 leng an i pum. A biapi tukmi mah zan ah kanmah lawng si loin midang zong rak i pumh ve awkah kan sawm khawhmi hna cu tinvo sung a si. Ruahnolhnak ah mi tam khawh chung tam kha rak i pumh ve awkah kum fatin na sawm hna maw?

23. Hmunkhat ah i pumhnak kha zeitindah na hmuh?

²³ Zumhfekmi Jehovah salle nih hmunkhat ah i pumh ding timi lamhruainak kha thilrit in an hmu lo. (Heb. 10:24, 25; 1 Johan 5:3) Tahchunhnak ah, Siangpahrang David cu Biakinn ah kal in Jehovah biak kha a duh tuk. (Salm 27:4) A hleiin Pathian a dawmi hna he i pumhṭi kha a duh khun. (Salm 35:18) Jesuh kong kha ruathmanh. A ngakchiat lio tein a Pa biakinn i um kha a duh tuk.—Luka 2:41-49.

24. Kan i pumh tikah zei caanṭha hna dah kan hmuh?

²⁴ Kan i pumh tikah Jehovah kan dawt le zumtu khat pawl thapek kan duh kha kan langhtermi a si. Mah lengah Pathian Pennak rammi in zeitindah kan nun awk a si timi cawn kan duh zong kan langhtermi a si, zeicatiah mah cawnnak hna kha pumhnak le civui hna in a bikin kan hmuh caah a si. Pumhnak nih tuchan ah Pathian Pennak nih a ṭuanmi a biapi bikmi rian ṭuan khawh awkah a herhmi thiamnak le thazaang a kan pek. Mah rian cu Siangpahrang Jesuh Khrih i zultu siternak le cawnpiaknak rian a si. (Matthai 28:19, 20 rel.) Hmunkhat ah i pumh zeitlukin dah kan duh timi nih Pathian Pennak cu kan caah zeitlukin dah a um taktakmi a si ti kha fiang tein a langhter. Pumhnak kha sunsak zungzal hna u sih.