1-3. Jesuh nih phungchim rian kha zeitindah a kauh, zei biahalnak dah a chuak?

 JESUH cu Galilee peng ah kum hnih chung phung a chim. (Matthai 9:35-38 rel.) Khuapi he khuate he a kal, pumhnak inn ah a cawnpiak hna i Pennak kong thawngṭha kha a chim. Phung a chimnak kip ah mibu cu a sinah an rat caah “rawl ṭuan awk cu tampi a um” ti le rawlṭuantu tampi a herh ti kha Jesuh nih a hmuh.

² Jesuh nih phungchim rian kha kauh awkah a timhtuah. Zeitin in dah? Lamkaltu 12 kha “Pathian Pennak kong chim” awkah a thlah hnanak thawngin a si. (Luka 9:1, 2) Lamkaltu hna nih mah rian cu zeitindah kan ṭuan lai tiah khua an ruat men lai. Cucaah Jesuh nih a thlah hna hlanah vancung a Pa nih a rak pekmi kha a pek ve hna, mah cu cawnpiaknak a si.

³ Mah biahalnak hna hi a chuak: Jesuh nih a Pa sinin zei cawnpiaknak dah a hmuh? Lamkaltu hna kha Jesuh nih zei cawnpiaknak dah a pek hna? Tuchan ah tah Messiah Siangpahrang nih a zultu hna kha a cawnpiak hna maw? A cawnpiak hna ahcun zeitin in dah?

4. Jesuh cu a Pa nih zeitikah le khoika ah dah a cawnpiak?

⁴ Jesuh nih ka Pa nih a ka cawnpiak tiin fiang tein a phuan. Phungchim rian a ṭuan lioah “ka Pa nih a ka cawnpiakmi lawnglawng ka chim” tiah a rak ti. (Johan 8:28) Jesuh cu zeitikah le khoika ah dah cawnpiak a si? Pathian Fater a simi Jesuh cu ser a si hnu tlawmpal ah cawnpiak a si. (Kol. 1:15) Vancung ah a Pa he kum tampi an umṭi chungah a Liannganmi Cawnpiaktu bia kha a ngaih i a tuahmi kha a zoh. (Isa. 30:20) Cucaah Fapa nih a Pa sining, a rianṭuanning le aa tinhnak he aa tlaiin a ṭha bikmi cawnpiaknak kha a hmuh.

5. Pa nih a Fapa kha vawleicung i a ṭuan hngami phungchim rian he aa tlaiin zeidah a cawnpiak?

⁵ A caan a cut tikah Jehovah nih a Fapa kha vawleicung ah a ṭuan hngami phungchim rian he aa tlaiin a cawnpiak. A Liannganmi Cawnpiaktu le a Fater an i pehtlaihnak kong a langhtermi chimchungbia hi zohhmanh. (Isaiah 50:4, 5 rel.) Chimchungbia nih Jehovah nih a Fapa kha “zing fate in” a ṭhangh tiah a ti. Mah bia nih a siangngakchia kha  cawnpiak awkah zingka tein a ṭhangmi cawnpiaktu kha a langhter. Baibal hrilhfiahnak pakhat nih hitin a ti: “Jehovah nih . . . a fapa kha siangngakchia bantukin sianginn ah a kalpi i zei kong dah chim awk a si ti le zeitindah chim awk a si ti kha a cawnpiak.” Mah vancung “sianginn” ah Jehovah nih a Fapa kha zei kong dah chim awk a si ti kha a cawnpiak. (Johan 12:49) Pa nih a Fapa kha zeitindah chim awk a si ti zong kha a cawnpiak. a Vawleicung a um lioah Jesuh nih phungchim rian a ṭuannak thawng lawngin si loin a zultu pawl zong phungchim rian an ṭuan khawh nakhnga a cawnpiak hnanak thawngin a hmuhmi cawnpiaknak kha ṭha tein a hman.

6, 7. (a) Jesuh nih lamkaltu hna kha zei cawnpiaknak dah a pek hna, mah nih zei tuah khawh awkah dah a bawmh hna? (b) Jesuh nih tuchan a zultu hna kha zeidah a cawnpiak hna?

⁶ A hramthawknak ah kan hmuh cang bantukin Jesuh nih lamkaltu hna kha zei cawnpiaknak dah a pek hna? Matthai dal 10 ah kan hmuh bantukin phungchimnak he aa tlaiin lamhruainak a dikthliar in a pek hna, mah ah a tanglei hna hi an i tel: khoika ah dah chim ding (caang 5, 6), zei kong dah chim ding (caang 7), Jehovah i bochan a herhnak kong (caang 9, 10), inn-ngeitu fuhpanhning (caang 11-13), ralchanhnak tawnghthamning (caang 14, 15), hremnak ton tikah lehrulhning (caang 16-23). b Jesuh nih a fiangmi cawnpiaknak a pek hna caah lamkaltu hna nih kumzabu pakhatnak ah thawngṭha chimnak rian kha an hruai khawh.

⁷ Tuchan ah tah zeitin? Pathian Pennak Siangpahrang a simi Jesuh nih a zultu hna kha a biapi bikmi rian a pek hna, mah cu “miphun vialte hna ca i tehte si awkah Vancung Pennak kong Thawngṭha hi khuazakip ah chim” kha a si. (Matt. 24:14) Mah a biapi bikmi rian ṭuan khawh awkah Siangpahrang nih a kan cawnpiak maw? A kan cawnpiak. Khrihfabu lengah zeitindah phungchim ding a si ti le Khrihfabu chungah an hmuhmi rian zeitindah ṭuan ding a si ti kha vancung in Siangpahrang nih a zultu hna kha ṭha tein a cawnpiak hna.

8, 9. (a) Phungchim Ning Cawnnak nih a bikin aa tinhmi cu zeidah a si? (b) Zarhlai pumhnak nih phungchim thiam deuh awkah zeitindah aan bawmh?

⁸ Jehovah bupi nih Pathian miphun kha phungchimning cawnpiak awkah civui le Rianṭuan Pumhnak ti bantuk an hmannak hi a saupi cang. Asinain 1940 hnuin zungpi ah hruaitu a simi unaupa hna nih tinṭan a phunphun hmangin cawnpiaknak kha an timhtuah.

⁹ Phungchim Ning Cawnnak. A hmasa ṭhen ah kan hmuh cang bantukin mah cawnnak cu 1943 in aa thawkmi a si. Mah cawnnak i aa tinhnak cu unau pawl kha Khrihfabu pumhnak ah hmualngei tein phung an chim khawh nakhnga cawnpiak lawng maw a si? A si lo. Mah cawnnak nih a bikin aa tinhmi cu Pathian miphun kha phungchimnak ah an biachim khawhnak kha hmangin  Jehovah an thangṭhat khawh nakhnga cawnpiak kha a si. (Salm 150:6) Mah cawnnak nih min aa pemi unau dihlak kha Pennak rianṭuantu ṭha si awkah a bawmh hna. Atu ah cu bantuk cawnpiaknak kha zarhlai pumhnak in kan hmuh.

10, 11. Atu ah Gilead Tinṭan ah ahote dah a kai kho, mah tinṭan ah an cawnmi i aa tinhnak cu zeidah a si?

¹⁰ Vennak Innsang Baibal Gilead Tinṭan. Atu ah Vennak Innsang Baibal Gilead Tinṭan tiah auhmi tinṭan hi 1943, February 1, Nikhat ni ah thawkmi a si. Mah tinṭan i a hramthawk tinhnak cu hmaikal le caantling rian a ṭuanmi hna kha vawleicung hmun khatkhat ah missionary ṭuan awkah cawnpiak kha a si. Asinain 2011, October thawkin special caantling rian phun khatkhat ah aa telmi special hmaikal, khualtlawng rianṭuantu le an nupile, Bethel ah a ummi le mah tinṭan a kai rih lomi missionary pawl lawng kai khawh a si cang.

¹¹ Gilead Tinṭan ah an cawnmi i aa tinhnak cu zeidah a si? Caan saupi tinṭan cawnpiaktu a simi unaupa pakhat nih hitin a chim: “Baibal ṭha tein hlathlainak thawngin tinṭan a kaimi hna an zumhnak fehter awk le thlaraulei ziaza ngeih awk bawmh kha a si. Cuticun an rianṭuannak ah zuamcawhnak an ton tikah an tei khawh lai. Cun an cawnmi nih a bikin aa tinhmi cu thawngṭha chimnak rian ṭuan duhnak lungput ngeih chin awkah bawmh kha a si.”—Efe. 4:11.

12, 13. Gilead Tinṭan nih vawleicung pumpi phungchim rian kha zeitindah ṭhatnak a pek? Tahchunhnak pe.

¹² Gilead Tinṭan nih vawleicung pumpi phungchimnak rian kha zeitindah ṭhatnak a pek? 1943 thawkin mah tinṭan a kaimi cu 8,500 leng an si cang. c Gilead tinṭan a kaimi missionary pawl cu ram 170 lengah rian an ṭuan cang. Missionary a ṭuanmi hna nih an cawnmi kha ṭha tein an hman, phungchimnak ah lungtho tein an i tel i midang zong cutin tuah awkah an cawnpiak hna. Thil sining tampi ah missionary a ṭuanmi hna cu thawngthanhtu tlawmte lawng an umnak hmun asiloah an um lonak hmun ah rian an ṭuan.

¹³ Vawlei Ralpi IInak lioah phungchim rian ngol a sinak Japan ram i a cangmi hi ruathmanh. 1949, August thla a phanh tikah Japan ram ah Japan miphun a simi thawngthanhtu cu pahra hmanh an si ti lo. Asinain mah kum a donghlei ah Gilead tinṭan a kaimi missionary 13 cu Japan ah an ra i phungchim rian kha fakpi in an ṭuan. A dang missionary tampi zong an ra chap. A hmasa ah cun missionary pawl cu khua ngan deuh ah rian an ṭuan nain a hnuah khua dang zongah an i ṭhial. Annih nih Baibal an cawnpiakmi hna le midang kha hmaikal ṭuan awkah lungtho tein tha an pek hna. Cutin lungtho tein an i zuammi nih ṭhatnak tampi a chuahter. Atu ah Japan ah thawngthanhtu 216,000 leng an um cang i buaktlak in 100 ah 40 cu hmaikal an ṭuan. d

14. Tinṭan hna nih zeidah a langhter? (Cahmai 188 i “ Pennak Rianṭuantu pawl a Cawnpiakmi Tinṭan” timi rinli kulh zong zoh.)

¹⁴ A dang tinṭan pawl. Hmaikal Tinṭan, Khrihfa Nuva caah Baibal Tinṭan le Nupi a Ngei Lomi Unaupa pawl caah Baibal Tinṭan nih a kaimi hna kha thlaraulei ṭhancho awk le thawngṭha chimnak rian lungtho tein hruai awkah a bawmh  hna. e Mah tinṭan dihlak nih Siangpahrang nih a zultu hna kha phungchim rian ṭuan khawh awkah sining a tlinhter hna ti a langhter.—2 Tim. 4:5.

15. Rian a ngeimi unaupa hna nih Jesuh kha zeiti lam in dah i zohchunh an duh?

¹⁵ Jesuh cu Pathian nih a cawnpiak timi Isaiah chimchungbia kha ruat ṭhan hmanh. Vancung “sianginn” ah Fapa nih ‘a bami thazaang pek’ khawhning kha a cawn. (Isa. 50:4) Jesuh nih mah cawnpiaknak kha a zulh i vawleicung a um lioah “re a theimi le thil a ritmi” kha hrimhnak a pek hna. (Matt. 11:28-30) Rian ngeimi unaupa hna nih Jesuh kha i zohchunh in unau pawl hrimhnak a petu si kha an duh. Cucaah sining a tlinhmi unaupa hna kha an unau pawl caah hmualngei tein rian an ṭuan khawh nakhnga bawmh awkah tinṭan tampi timhtuah a si.

16, 17. Pennak Rianṭuannak Tinṭan i aa tinhmi cu zeidah a si? (A tanglei fianternak zong zoh.)

¹⁶ Pennak Rianṭuannak Tinṭan. Mah tinṭan cu 1959, March 9 ah New York, South Lansing ah tuah hmasa bik a si.  Thla khat a raumi mah tinṭan kai awkah khualtlawng rianṭuantu lawng si loin Khrihfabu rianṭuantu (atu ah Khrihfa upa phu ah khuakhangtu tiah auh a si) zong sawm an si. A hnuah mah tinṭan i cawnmi kha Mirang holh in holh dangdang ah an leh i vawleicung pumpi i unaupa pawl cu mah tinṭan in cawnpiak an si. f

¹⁷ Pennak Rianṭuannak Tinṭan aa tinhnak kha 1962 Jehovah Tehte Hna Yearbook nih hitin a chim: “Rian a tammi hi vawlei ah Jehovah Tehte Hna i Khrihfabu zohkhenhtu a simi pakhat cu a nunnak ṭha tein a tlangtla khomi a si a hau. Mah lawngah unau pakhat cio kha lungthin a pek khawh hna lai i an caah thluachuah a si lai. Khrihfabu zohkhenhnak caah a chungkhar a daithlanhmi a si awk a si lo i ṭha tein khua a ruat khomi a si a hau. Vawleicung pumpi i Khrihfabu rianṭuantu hna cu Pennak Rianṭuannak Tinṭan kai awkah sawm an simi cu zeitluk tinvo sung dah a si, mah tinṭan ah Baibal nih a chimmi zohkhenhtu nih ṭuan ding a simi rian kha ṭuan khawh awkah cawnpiak an si lai.”—1 Tim. 3:1-7; Titas 1:5-9.

18. Pathian miphun dihlak cu Pennak Rianṭuannak Tinṭan in zeitindah ṭhatnak kan hmuh?

 ¹⁸ Pathian miphun dihlak cu Pennak Rianṭuannak Tinṭan in ṭhatnak kan hmu. Zeitin in dah? Khrihfa upa le bu rianṭuantu hna nih tinṭan in an cawnmi kha an zulh tikah annih cu Jesuh bantukin unau pawl caah hrimhnak petu an si. Dawtnak a ngeimi Khrihfa upa asiloah bu rianṭuantu hna nih zaangfahnak a ngeimi bia an chimmi, kan bia ṭha tein an ngaihmi le thapek awkah an kan lenmi kha na sunsak ko lo maw? (1 Thes. 5:11) Cu bantuk sining a tlinhmi unaupa hna cu Khrihfabu caah thluachuah taktak an si.

19. Cawnpiaknak Kawmiṭi nih a dang zei tinṭan hna dah an tlangtlak, mah tinṭan hna nih unaupa pawl kha zeitindah a bawmh hna?

¹⁹ A dang tinṭan pawl. Uktu Bu i Cawnpiaknak Kawmiṭi nih bupi chung i rian a ngeimi unaupa pawl cawnpiak awkah a dang tinṭan zong an tlangtlak. Mah tinṭan pawl cu Khrihfa upa, khualtlawng rianṭuantu le Zung Ṭengnge Kawmiṭi chungtel ti bantuk rian a ngeimi unaupa pawl kha an rian hmualngei tein ṭuan khawh awk bawmhnak caah tuahmi a si. Baibal hrambunhmi cawnpiaknak nih unaupa pawl kha anmah theng thlaraulei ṭhawn peng awk le Jehovah pekmi a sunglawimi tuu an pehtlaih hna tikah Baibal phunglam zulh awkah a bawmh hna.—1 Pit. 5:1-3.

20. Kan dihlak in ‘Pathian nih a kan cawnpiak’ tiah Jesuh nih zeicah a chim khawh, zei tuah awkah dah bia na khiah?

²⁰ Messiah Siangpahrang nih a zultu pawl kha ṭha tein a cawnpiak hna ti cu a fiang ko. Cawnpiaknak vialte cu cunglei in a rami a si: Jehovah nih a Fapa a cawnpiak, a Fapa nih a zultu hna kha a cawnpiak hna. Cucaah kan dihlak in ‘Pathian nih a kan cawnpiak’ tiah Jesuh nih a chim khawhmi a si. (Johan 6:45; Isa. 54:13) Siangpahrang nih lam a phunphun in a kan cawnpiak. Mah in ṭhatnak tling hmuh awkah biakhiak hna u sih. Cawnpiaknak vialte i aa tinhnak cu thlaraulei kan ṭhawn zungzal nakhnga bawmh kha a si, cuticun phungchim rian kha ṭha tein kan ṭuan khawh lai.