1, 2. 1895, January, Zion Vennak Innsang ah zei thlennak dah a um, unau pawl nih zeitindah an lehrulh?

 A LUNG a thomi Baibal Siangngakchia John A. Bonet nih 1895, January ah chuahmi Zion Vennak Innsang a hmuh tikah a phaw aa thlenmi kha a hmuh i aa nuam tuk. Mah a phaw thar ah zan ah tilet a thomi rili kha mei hmuhsaknak inn i mei nih a ceuhmi hmanthlak a cuang. Mekazin ah mah a phaw thar kong thawngthanhnak kha “Kan Hnipuan Thar” timi biatlangpi in an thanh.

² Unaupa Bonet nih Unaupa Russell sinah “Vennak Innsang a phaw cu aa dawh tuk, mah cu ka duh tuk” tiah lunglawmhnak ca a ṭial. A dang zumhfekmi Baibal Siangngakchia John H. Brown zong nih a phaw kong kha hitin a ṭial: “Mah cu a cuang tuk. Tilet le thlichia nih an den lengmang buin mei hmuhsaknak inn cu a hram a fek tuk.” Mah a phaw aa thlenmi cu mah kum chungah a voikhatnak aa thlengmi thil a si nain a donghnak cu a si lo. Mah kum November ah a biapimi thlennak a um ṭhan. Lungthawh awk ngai a simi cu mah thlennak ah tilet a thomi rili aa tel ṭhan.

3, 4. 1895, November 15, Vennak Innsang nih zei buaibainak kong dah a fianter, a biapimi zei thlennak kong dah a thanh?

³ 1895, November 15, Vennak Innsang capar nih buaibainak pakhat kong a fianter. Tilet nganpi bantuk a simi buaibainak nih Baibal Siangngakchia hna bu i daihnak kha a hrawh tiah a ti. Unau pawl cu Khrihfabu ah ahodah hruaitu a si awk a si timi kongah bia an i al lengmang. Lungrualnak a hrawk khomi pakhat le pakhat i zuamnak lungput ngeih lo awkah a herhmi kha unau pawl nih an hngalh nakhnga mah capar nih bupi kha tilawng he a tahchunh. Cun hruaitu hna nih tilawng bantuk a simi bupi kha tilet a thawh tik i inkhawh awkah an timhtuahcia lo tiah fiang tein a chim. Zeidah an tuah a herh?

⁴ Hmuhtonnak a ngeimi tilawng haotu nih thlichia a hran tik caah nunnak khamhnak thilri a um nakhnga a timhtuah, cun a herhmi thil tuah awkah rianṭuantu pawl kha a chimhcia hna tiah mah capar nih a langhter. Cu bantukin bupi chung i hruaitu hna nih Khrihfabu dihlak kha thlichia bantuk a simi thil tawnghtham khawh awkah an timhtuah  hna a hau. Cutin tuah khawh awkah mah capar nih a biapimi thlennak kong a thanh. “Tuurun ‘zohkhenh awkah’” “Khrihfabu kip ah Khrihfa upa thim” colh hna u tiah lamhruainak a pek hna.—Lam. 20:28.

5. (a) Khrihfa upa timhtuahnak cu zeicah a caan hmaante ah tuahmi a si? (b) Zei biahalnak dah kan i ruah hna lai?

⁵ Khrihfa upa timhtuahnak cu a fekmi Khrihfabu si awkah a caan hmaante ah tuahmi a si. Mah nih Vawlei Ralpi Inak ruangah a chuakmi a fakmi tilet nganpipi kha inkhawh awkah unau pawl kha a bawmh hna. Mah hnu kum hna ah a ummi a dang bupi ṭhanchonak hna nih Pathian miphun kha Jehovah biak awkah thilthuam tling deuh in ngeih awk a bawmh hna. Mah ṭhanchonak kha zei Baibal chimchungbia nih dah a langhter? Zei bantuk bupi thlennak dah na hmuh? Mah in zei ṭhatnak dah na hmuh?

6, 7. (a) Isaiah 60:17 cu zei sullam dah a ngeih? (b) Mah cacang i “uktu bawi” timi bia nih zeidah a langhter?

⁶ Ṭhen 9nak ah kan hmuh cang bantukin Jehovah nih a miphun kha a karhter hna lai tiah Isaiah nih a chimchung. (Isa. 60:22) Asinain Jehovah nih mah nakin tam deuh ka tuah lai tiah bia aa kam. Mah chimchungbia ṭhiamṭhiam ah hitin a chim: “Dar canah sui kaan pek lai, thir canah ngun kaan pek lai i thing canah darsen kaan pek lai. Lung canah thir na hmuh lai. Aan uktu bawi hna nih khan an in hrem ti lai lo, dinnak le daihnak in ka ukter hna lai.” (Isa. 60:17) Mah chimchungbia cu zei sullam dah a ngeih? Mah cu tuchan ah zeitindah a tlin?

⁷ Isaiah chimchungbia nih thil pakhat kha a dang pakhat nih a airolh lai tiah a ti. Asinain mah airolhnak cu a chiami in a ṭhami ah si loin a ṭhami in a ṭha chinmi tu ah a si. Dar kha sui nih a airolhmi cu ṭhanchonak a si i mah cacang i a dang thil zong cutin an si. Cucaah mah bia in Jehovah nih a miphun pawl an sining cu a ṭhangcho thluahmah lai ti kha a langhter. Chimchungbia nih zei bantuk ṭhanchonak dah a langhtermi a si? “Uktu bawi” timi bia a hmannak thawngin Jehovah nih a miphun pawl zohkhenh an sining le dirh an sining cu duhsah duhsah in a ṭhangcho lai ti a langhter.

8. (a) Isaiah chimchungbia i ṭhanchonak cu aho nih dah a chuahter? (b) Mah ṭhanchonak in zei ṭhatnak dah kan hmuh? (“ Chimhhrinhnak kha Toidor tein a Cohlan” timi rinli kulh zong zoh.)

⁸ Mah bupi ṭhanchonak cu aho nih dah a chuahter? Jehovah nih hitin a ti: “Sui kaan pek lai, . . . ngun kaan pek lai . . . daihnak in ka ukter hna lai.” Khrihfabu dirhning a ṭhanchomi cu minung zuamnak ruangah si loin Jehovah nih a chuahtermi a si. Jesuh Siangpahrang a ṭuan tikah Jehovah nih a Fapa Jesuh kha hmangin mah ṭhanchonak kha a chuahter. Mah ṭhanchonak hna in zeitindah ṭhatnak kan hmuh? Mah cacang ah ṭhanchonak nih “dinnak le daihnak” a chuahter lai tiah a ti. Pathian lamhruainak kan cohlan i thlennak kan tuah ahcun kan lakah daihnak a um lai. Cun dinnak kan duh ahcun mah nih “daihnak a kan petu Pathian,” tiah lamkaltu Paul nih a auhmi Jehovah biak awkah a kan forh lai.—Fil. 4:9.

9. Khrihfabu lungrualnak le ningcang tein umnak i a hrampi cu zeidah a si, zeicah?

 ⁹ Jehovah he aa tlaiin Paul nih hiti zongin a ṭial: “Pathian cu ningcang lopi in a ummi si loin daite le rem tein a ummi Pathian a si.” (1 Kor. 14:33, NW) Paul nih ningcang lopi in umnak kha ningcang tein umnak he si loin daihnak he tu a tahchunh kha i cinken. Zeicah? Mah hi ruathmanh: Ningcang tein umnak nih daihnak a chuahter lo. Tahchunhnak ah, ralkap phukhat cu raltuknak hmun ah ningcang tein an kal, asinain mah nih daihnak si loin raltuknak tu a chuahter. Cucaah Khrihfa a simi kannih nih a biapimi mah hi kan i cinken awk a si: Ningcang tein umnak timi inn cu daihnak timi hram cungah aa bunh lo ahcun tuan ah a si lo hmanhah a hnuah a rawk ko lai. Asinain Pathian pekmi daihnak nih a chuahtermi ningcang tein umnak tu cu zungzal in a hmun. Cucaah “daihnak tihna Pathian” nih bupi kha lam a hruai i a thenhmi cu kan i lawmh tuk awk a si. (Rom 15:33) Vawleicung pumpi Khrihfabu ah kan hmuhmi le kan sunsakmi lungrualnak le ningcang tein umnak i a hrampi cu Pathian pekmi daihnak hi a si.—Salm 29:11.

10. (a) A hmasa kum hna ah bupi ah zei ṭhanchonak hna dah a um? (“ Zohkhenhning Ṭhanchonak” timi rinli kulh zoh.) (b) Zei biahalnak hna dah atu kan i ruah lai?

¹⁰ Hlanlio ah bupi ah tuahmi a ṭhahnemmi ningcang tein thlennak kong kha ““ Zohkhenhning Ṭhanchonak” timi rinli kulh ah a tawinak in aa ṭial. “Dar canah sui” kaan pek hna lai timi bia ningin Jehovah nih nai kum hrawngah kan Siangpahrang kha hmangin zei bantuk thlennak dah a chuahter? Mah zohkhenhning thlennak nih vawleicung pumpi Khrihfabu i daihnak le lungrualnak kha zeitindah a fehter? Mah nih “daihnak a kan petu Pathian” biak awkah zeitindah aan bawmh?

11. (a) Baibal hlathlainak in zeidah an hun hngalh? (b) Uktu bu ah aa telmi unaupa hna nih zei tuah awkah dah bia an khiah?

¹¹ 1964 in 1971 tiang uktu bu nih a kau ngaimi Baibal hlathlainak an timhtuah. An hlathlaimi tampi lakah pakhat cu kumzabu pakhatnak i Khrihfabu rianṭuanning a si. a Mah tikah kumzabu pakhatnak i Khrihfabu cu Khrihfa upa asiloah hruaitu pakhat nih si loin Khrihfa upa phu nih an hruai hna ti kha an hun hngalh. (Filipi 1:1; 1 Timote 4:14 rel.) Uktu bu nih mah kong kha ṭha deuh in an hngalhthiam tikah Siangpahrang Jesuh nih bupi dirhning thlen awkah lam a kan hruai ti kha an hun hngalh i mah ningin zulh awkah bia an khiah. Khrihfa upa rian peknak he aa tlaiin Baibal chimmi zulh awkah thlennak an tuah colh. 1970 hnuin an tuahmi thlennak cheukhat cu zeidah an si?

12. (a) Uktu bu chungah zei thlennak dah a um? (b) Atu ah Uktu Bu dirh an sining kha chim. (Cahmai 130 i “ Pennak Ṭhanchonak caah Uktu Bu Rianṭuanning” timi rinli kulh zoh.)

¹² A pakhatnak thlennak cu uktu bu thengte he aa pehtlaimi a si. Mah caan tiangah mah chiti thuhmi phu cu Pennsylvania i Vennak Innsang Baibal le Cazual Bu i director a  simi unaupa pasarih in dirh a si. Asinain 1971 ah uktu bu cu 7 in 11 ah an karh i director in rian an ṭuan ti lo. Mah phu ah aa telmi hna nih kan dihlak in aa tlukmi kan si tiah an ruah i chairman rian kha kum fatin aa changchang in an ṭuan.

13. (a) Kum 40 chungah zei timhtuahnak dah an rak hman? (b) 1972 ah Uktu Bu nih zeidah an tuah?

¹³ A dang thlennak cu Khrihfabu dihlak he aa pehtlai. Zeitin in dah? 1932 in 1972 tiang Khrihfabu zohkhenhnak rian kha a bikin unaupa pakhat nih a ṭuan. Mah rianpekmi unaupa kha 1936 tiang rianṭuannak director tiah auh a si. Mah hnuah Khrihfabu rianṭuantu tiah thlen a si i a donghnak ah Khrihfabu zohkhenhtu tiah thlen a si. Mah unaupa hna nih tuurun kha thlaraulei an ṭhancho nakhnga lungtho tein an zohkhenh hna. Khrihfabu zohkhenhtu nih a dang Khrihfabu rianṭuantu hna he i ruahceihṭi loin Khrihfabu caah biakhiahnak a tuah tawn. Asinain 1972 ah Uktu Bu nih a biapimi thlennak an tuah. Mah ah zeidah aa tel?

14. (a) 1972, October 1 ah zei timhtuahnak thar dah aa thawk? (b) Khrihfa upa phu ah khuakhangtu nih Filipi 2:3 i ruahnak cheuhnak kha zeitindah a zulh?

¹⁴ Khrihfabu kip ah unaupa pakhat lawng kha Khrihfabu zohkhenhtu in rian pek si ti loin Baibal halmi sining a tlinhmi a dang unaupa pawl zong kha Khrihfa upa in rian pek an si cang lai. An dihlak in Khrihfa upa phu in rian an ṭuan lai i Khrihfabu kha an zohkhenh lai. Mah timhtuahnak thar cu 1972, October 1 in aa thawk. Tuchan ah, Khrihfa upa  phu ah khuakhangtu nih a dang Khrihfa upa hna nakin ka biapi deuh tiah i ruat loin “a hme bikmi” ka si tiah aa ruat. (Luka 9:48) Vawleicung pumpi unau rual lakah cu bantuk aa toidormi unaupa an ummi cu thluachuah taktak a si.—Fil. 2:3.

15. (a) Khrihfabu ah Khrihfa upa phu an ummi nih zei ṭhatnak dah a chuahter? (b) Siangpahrang nih fim ngaiin thil a tuah ti kha zeinihdah a langhter?

¹⁵ Khrihfabu rian kha Khrihfa upa phu ah aa telmi hna nih ṭuanṭi ding timi timhtuahnak cu ṭhanchonak taktak a si. Mah in a chuakmi ṭhatnak pathum hi ruathmanh: A pakhatnak le a biapi bikmi cu mah timhtuahnak nih Khrihfa upa dihlak kha Khrihfabu i an rian cu zeitluk a nganmi a si hmanhah Khrihfabu Lu cu Jesuh a si ti kha hngalh awkah a bawmh hna. (Efe. 5:23) Pahnihnak ah, Phungthlukbia 15:22 nih a chim bantukin “ruahnak cheutu an tam ahcun a hlawh a tling.” Khrihfa upa hna cu Khrihfabu thlaraulei he aa pehtlaimi thil kong an i ruahceihṭi i pakhat cio i an ruahnak kha an tuaktanṭi tikah Baibal phunglam ningin biakhiahnak an tuah khawh. (Ptb. 27:17) Jehovah nih cu bantuk biakhiahnak kha thluachuah a pek caah hlawhtlinnak an hmu. Pathumnak ah, sining a tlinhmi unaupa tampi cu Khrihfa upa in rian an ṭuan caah Khrihfabu zohkhenh awk le tuukhalh awkah a herh chin lengmangmi kha bupi nih a tlam a tlinter khawh.  (Isa. 60:3-5) Vawleicung pumpi i Khrihfabu cu 1971 ah 27,000 in 2013 ah 113,000 leng tiang a karhmi hi ruathmanh. Siangpahrang nih a zultu pawl caah tuukhal kha a herh caante ah fim ngaiin a timhtuah ti cu a fiang ko.—Mik. 5:5, NW.

16. (a) Khrihfa upa cu zei rian dah an ngeih? (b) “Tuu kha zohkhenh hna” timi Jesuh bia kha Baibal Siangngakchia hna nih zeitindah an hmuh?

¹⁶ A hmasa Baibal Siangngakchia hna chan lioin Khrihfa upa hna nih zumtu khat pawl kha Pathian salle an si zungzal nakhnga bawmh ding rian kan ngei ti kha an hngalh. (Galati 6:10 rel.) 1908, Vennak Innsang capar pakhat nih “ka tuu kha zohkhenh hna” timi Jesuh bia kha a fianter. (Johan 21:15-17) Mah capar nih Khrihfa upa pawl kha hitin a ti hna: “Tuu he aa tlaiin kan Bawipa rianpekmi kha a biapi tukmi in kan hmuh awk a si i Bawipa zultu hna rawl pek le zohkhenh kha tinvo sung in kan hmuh awk a si.” 1925, Vennak Innsang nih Khrihfa upa pawl kha hitin ralrin a pek hnanak thawngin tuukhal rian a biapitnak kha a langhter ṭhan: “Church cu Pathian ta a si, . . .  i unau pawl caah rian ṭuan khawhnak tinvo sung a hmumi hna kha an ṭuanning he aa tlaiin Pathian nih bia a ceih hna lai.”

17. Hruaitu hna cu sining a tlinhmi tuukhal si awkah zeitindah bawmh an si?

¹⁷ Khrihfa upa hna i tuu an khalhning kha ‘thir in ngun’ ah ṭhanchoter awkah Jehovah bupi nih zeitindah a bawmh hna? Tinṭan a pek hnanak in a si. 1959 ah Khrihfa upa le bu rianṭuantu hna caah a voikhatnak Pennak Rianṭuannak Tinṭan tuah a si. An cawnmi pakhat cu “Tuu Pakhat cio Cungah Siaherhnak Langhter” timi a si. Rian a ngeimi unaupa hna cu “thawngthanhtu pawl kha an inn i va len awkah a caan suai u” tiah tha pek an si. Cu bantuk lennak cu thazaang petu a si nakhnga tuah khawhning lam a phunphun kha an cawnpiak hna. 1966 ah Pennak Rianṭuannak Tinṭan kha an remh. Mah  an remhmi tinṭan nih “Tuukhalhnak Rian a Biapitnak” kong a cawnpiak hna. Mah nih a bikin a cawnpiakmi hna cu zeidah a si? Hruaitu hna nih “an innchungkhar le phungchim rian kha daihthlanh loin Pathian tuurun kha dawtnak in an zohkhenh hna awk a si” timi a si. Nai kum hna ah Khrihfa upa caah tinṭan dangdang zong tuah a si. Jehovah bupi nih tinṭan an pek lengmangmi hna in zei ṭhatnak dah a chuak? Tuchan ah Khrihfabu ah thlaraulei tuukhal a simi sining a tlinhmi unaupa tampi an um.

18. (a) Khrihfa upa cu a ngan ngaimi zei rian dah pek an si? (b) Jehovah le Jesuh nih rian aa zuammi Khrihfa upa kha zeicah an dawt hna?

¹⁸ Jehovah nih Siangpahrang Jesuh hmangin rian ngan ṭuan awkah Khrihfa upa kha rian a pek hna. Mah rian cu zeidah a si? Minung tuanbia chung i a har bikmi caan ah Pathian tuu pawl lamhruai kha a si. (Efe. 4:11, 12; 2 Tim. 3:1) Jehovah le Jesuh nih rian aa zuammi Khrihfa upa kha an dawt tuk hna, zeicahtiah annih nih mah Baibal bia hi an zulh caah a si: “Pathian nih aan pekmi hna tuurun a khaltu kha si u law . . . lungtho tein zohkhenh hna u. . . .  ṭuan nan duh taktak ruang tu ah nan rian kha ṭuan u. . . .  an i zohchun ding tu si i zuam u.” (1 Pit. 5:2, 3) Khrihfa tuukhal pawl cu tuurun caah zohchunh awk ṭha an sining le Khrihfabu ah daihnak le lawmhnak an chuahterning lam tampi lakah pahnih kha i ruah hna u sih.

19. Phungchimnak ah kanmah he a kalṭimi Khrihfa upa kha zeitindah kan hmuh hna?

¹⁹ Pakhatnak ah, Khrihfa upa cu unau pawl he rian an ṭuanṭi. Thawngṭha ṭialtu Luka nih Jesuh kong kha hitin a chim: “Jesuh cu khuapi he khuate he a tlawng duahmah hna i Pathian Pennak kong Thawngṭha kha a chimh hna. Lamkaltu pahleihnih hna nih khan an zulh.” (Luka 8:1)  Jesuh cu lamkaltu hna he phungchim an kalṭi bantukin tuchan i zohchunhawk ṭha a simi Khrihfa upa hna zong unau pawl he phungchim an kalṭi ve. Cutin tuahnak nih Khrihfabu ah ṭhatnak tampi a chuahter ti kha an hngalh. Cu bantuk Khrihfa upa hna kha unau pawl nih zeitindah an hmuh hna? Kum 90 dengmang a simi unaunu Zanen nih hitin a chim: “Phungchimnak ah Khrihfa upa he kan kalṭimi nih amah he biaruahnak caanṭha a ka pek i a kong ka hun hngalh chin.” Kum 35 a simi unaupa Steven nih hitin a chim: “Khrihfa upa he innkhat hnu innkhat phungchimnak i kan kalṭi tikah bawmh a ka duh ti kha ka hun hngalh. Cu bantuk bawmhnak ka hmuh caah kaa nuam tuk.”

20, 21. Jesuh chimmi bianabia i tuukhal kha Khrihfa upa nih zeitindah an i zohchunh khawh? Tahchunhnak pe. (“ Man a Ngeimi Zarh Fate Lennak” timi rinli kulh zong zoh.)

²⁰ Pahnihnak ah, Khrihfabu he aa hlatmi hna cungah siaherhnak langhter awkah Jehovah bupi nih Khrihfa upa kha a cawnpiak hna. (Heb. 12:12) Cu bantuk thlaraulei a dermi hna kha Khrihfa upa nih zeicah an bawmh hna awk a si i zeitindah an bawmh hna awk a si? Jesuh chimmi tuukhal le a tlaumi tuu bianabia nih a phi hngalh awkah a kan bawmh. (Luka 15:4-7 rel.) Mah bianabia ah tuukhal nih tuu pakhat a tlau ti a hngalh tikah mah tuu lawng a ngeihmi si sehlaw cu bang fakpi in a kawl. Mah tuukhal kha tuchan Khrihfa upa hna nih zeitindah an i zohchunh khawh? A tlaumi tuu cu tuukhal caah a sunglawimi a si rih bantukin Pathian miphun he aa hlatmi hna cu Khrihfa upa caah a sunglawimi an si ve. Khrihfa upa nih mah a tlaumi hna kawlnak le bawmhnak rian cu caan sawksam men a si tiah an ruat lo. Mah lengah tuukhal nih “a tlaumi cu a hmuh hlan loin a kawl” bantukin Khrihfa upa nih a tha a dermi hna kha anmah nih an kawl hmasa hna i an bawmh hna.

²¹ Bianabia chung i tuukhal nih a tlaumi tuu kha a hmuh tikah zeidah a tuah? Nem tein a cawi, “a liang ah aa khinh” i tuurun sinah a kalpi. Cu bantukin Khrihfa upa nih thlaraulei a dermi cungah a bia in le a tuahsernak in siaherhnak a langhternak thawngin nem tein a cawi i Khrihfabu i kir ṭhan awkah a bawmh. Khrihfabu he aa hlatmi Africa i unaupa Victor cu cu bantuk thil a tong. “Kum riat chung thlaraulei ka cawlcangh lo lioah Khrihfa upa cu keimah bawmh awkah an i zuam peng” tiah a ti. Zeinihdah a lung a suk khun? Hitin a chim: “Nikhat cu Hmaikal Tinṭan kan rak kaiṭimi Khrihfa upa John nih a ka leng i tinṭan kan kai lio i hmanthlak cheukhat kha a ka hmuhsak. Mah tikah hlanlio kong tampi kan lung ah a chuak ṭhan i Jehovah rian ka rak ṭuan lio i kaa nuamhnak kha hmuh ka duh ṭhan.” John nih a len hnu tlawmpal ah Victor cu Khrihfabu ah a kir ṭhan. Atu cu hmaikal a ṭuan ṭhan cang. Kan zawn a ruatmi Khrihfa upa hna nih an kan lawmhter taktak.—2 Kor. 1:24. b

22. Dinnak le daihnak nih Khrihfabu lungrualnak kha zeitindah a fehter chin? (“ Kan Khuaruah A Har Tuk” timi rinli kulh zong zoh.)

²² A hmasa ah kan hmuh cang bantukin Jehovah nih a miphun lakah dinnak le daihnak a karh lai tiah a chimchung. (Isa. 60:17) Mah ziaza pahnih nih Khrihfabu lungrualnak a fehter chin. Zeitin in dah? Dinnak he aa tlaiin, ‘Pathian cu pakhat lawng a simi Jehovah a si.’ (Deut. 6:4, NW) A dingmi a phunglam cu ram pakhat i Khrihfabu le a dang ram i Khrihfabu ah an i dang lo. A hmaan le hmaan lo kong i a phunglam cu pakhat lawng a si i ‘a thiangmi hna i Khrihfabu dihlak’ ah aa khat dih. (1 Kor. 14:33, NW) Cucaah Khrihfabu pakhat cu Pathian phunglam an zulh lawngah ṭhatnak tampi an hmu lai. Daihnak he aa tlaiin, kan Siangpahrang nih Khrihfabu ah daihnak hmu hna seh ti lawng si loin daihnak a sertu si hna seh ti zong a kan duh. (Matt. 5:9) Cucaah “daihnak a chuahtertu thil” kha tuah awkah kan i zuam. A caan ah kan lakah lung i khahlonak a um tikah kanmahlei in kan tawnghtham hmasa. (Rom 14:19) Cuticun Khrihfabu ah daihnak le lungrualnak kan umter chin.—Isa. 60:18.

23. Tuchan Jehovah salle cu zeidah kan hmuh?

²³ 1895, November, Vennak Innsang nih Khrihfa upa timhtuahnak kong a thanh tikah rianngeimi unaupa hna zong nih an lung duhnak kha an langhter ve. Mah cu zeidah a si? Mah bupi timhtuahnak thar nih Pathian miphun kha “zumhnaklei ah khulrang in an lung rualter hna seh” tiah an duh i thla an cam. A luancia kum hna kong kan ruah tikah Jehovah nih kan Siangpahrang hmangin zohkhenhning a thenh thluahmahmi kha kan hmuh. Mah nih Pathian kan biaknak ah lungrualnak a fehter chin. (Salm 99:4) Cucaah tuchan vawleicung pumpi i Jehovah miphun dihlak cu ‘kan i tinhmi le kan ṭuanning aa khat’ i “daihnak a kan petu Pathian” kha “lungkhat tein” kan biak.—2 Kor. 12:18; Zefaniah 3:9 rel.