Pennak kong Chimṭi Hawi Dawtmi Unau hna:

1914, October 2, Ninga ni zing ah Brooklyn Bethel chungkhar mi ka si ve tiah na mitthlam ah cuanter hmanh. Zing rawl einak cabuai i na ṭhut tawnnak ah na ṭhu i Unaupa C. T. Russell a rat lai kha na hngak. Tlawmpal ah rawl einak khaan innka aa hung i Unaupa Russell cu a rak lut. A tuah tawn bantukin chikkhat a dir ta i Bethel chungkhar mi dihlak kha “Nan dam maw, unau hna” tiah aan chawnhbiak hna. Mah hnuah cabuai lu i a ṭhutnak ah ṭhu colh loin a kut a bengh i a biapi tukmi thawng a thanh. “Jentail Mi hna Caan cu a dih cang, an siangpahrang hna chan cu a dong cang” tiah a thanh. Mah caan na rak hngahnak hi a saupi cang caah naa lawmhnak langhter loin na um kho lo. A dang Bethel chungkhar mi hna he lungtho thatho tein saupi na kut na bengh.

Unaupa Russell nih lungthawh awk ngai a simi mah bia a thanhnak hi a saupi cang. Mah caan thawkin Pennak nih zeidah a liim?  Tampi a liim. Pennak kha hmangin Jehovah nih a miphun kha a thenh hna i a cawnpiak thluahmah hna. Jehovah miphun a simi kannih cu 1914 ah mi tlawmte kan rak si nain atu ah nuai riat dengmang kan si cang. Mah cawnpiaknak in nangmah thengte zeitindah ṭhatnak na hmuh?

Atu ah unau pawl nih “Jehovah i vancung leng kekual cu a kal” tiah an timi kha kan theih tawn. Mah cu a hmaanmi a si. Asinain a taktak ti ah cun hmuh khawh lomi Jehovah bupi a aiawhmi vancung leng kekual cu 1914 thawkin rang chinchin in a kal. Cutin a si kha hi cauk ṭha tein na relnak thawngin na hngalh lai. Thawngṭha karhternak caah Pennak kong chimtu hna nih chanthar thilri a phunphun an rak hman. Mah ah thanhca, thawngthanhnak cataar i put in artlang in kalnak, hmanthlak hmuhsaknak, tehte khaannak card, awkhumhmi kuang, radio le Internet hmanh aa tel.

Jehovah nih kan rian ṭuanmi kha thluachuah a pek caah atu ah Baibal hrambunhmi cauk pawl kha holh phun 670 lengin kan chuah khawh cang i mikip kha man loin kan pek hna. A rummi ram ah siseh, a si a fakmi ram ah siseh mah lungtho tein aa pemi unau pawl cu Biakinn, Civui tuahnak Inn le zung ṭengnge inn saknak ah an i tel. Leiser ral a tlun tikah cuka hmun i a ummi unau pawl bawmh awkah dawtnak a ngeimi unau pawl cu an kal colh i cuticun “harnak i hrawm awkah hrin” an si kha an langhter.—Ptb. 17:17.

A caan ah biaknaklei hruaitu hna le midang nih ‘upadi hmangin harnak pek’ awkah an i zuam nain an i zuamnak cu “thawngṭha karhtertu a si lehlam” kha atu le atu kan hmuh caah mah nih kan zumhnak a fehter.—Salm 94:20, NW; Fil. 1:12.

Kan “sal hawi” a simi nannih he kan i hawikomh khawh caah kan i lawm tuk. Nan dihlak in kan in dawt tuk hna ti kha hngal hram ko u. Hi cauk chungah aa ṭialmi nih thlaraulei nan ro kha hlan nakin aan sunsakter chin hna lai tiah saduh kan thah.—Matt. 24:45.

Nan ca ṭhatnak a duhmi,

Nan unau,

Jehovah Tehte Hna i Uktu Bu