Ṭhen 13
A Rauhhlan Ah Biaknak Nih Zeidah An Ton Lai?
1. Biaknak hi a dihlak in a ṭha maw?
Biaknak kip ah lungthin ṭha a ngeimi an um. Annih cu Pathian nih a hmuh hna i a zohkhenh hna ti cu thawngṭha a si. Asinain, biaknak lei ah aa zuammi hna nih ṭhatlonak an tuahmi hi ngaihchiat awk ngai a si. (2 Korin 4:3, 4; 11:13-15) Biaknak cheukhat cu zaang-ennak, miphun ning in thahnak, raltuknak le ngakchia duh paoh in tuahnak hmanh ah an i tel. Mah nih lungtak tein Pathian a zummi hna kha zeitluk in dah an ngaih a chiatter hna lai.—Matthai 24:3-5, 11, 12 rel.
A hmaanmi biaknak nih Pathian thang a ṭhatter nain, a hmaan lomi biaknak nih cun Pathian thang a chiatter. Annih nih Baibal ah a um lomi, a hmaan lomi zumhnak kha mi an cawnpiak hna, mah ah Pathian le mithi kong zong aa tel. Asinain, Jehovah nih cun mi kha amah kong biatak hngalhter a duh hna.—Phungchimtu 9:5, 10; 1 Timote 2:3-5 rel.
2. A rauhhlan ah biaknak nih zeidah an ton lai?
Pathian kan dawt an ti nain a taktak ah Satan vawlei a dawmi biaknak hna kha Pathian nih a cohlang hna lo. (Jeim 4:4) Baibal nih a hmaan lomi biaknak vialte kha “a liannganmi Babilon” tiah a auh. Babilon cu Noah chan Buanchukcho hnuah a hmaan lomi biaknak aa thawknak hlanlio khualipi a si. Mi a hlengmi le a hremmi biaknak vialte kha a rauhhlan ah Pathian nih ruah lopi in a hrawh cang hna lai.—Biathlam 17:1, 2, 5, 16, 17; 18:8 rel.
A dang thawngṭha a um rih. Jehovah nih vawleicung pumpi i a hmaan lomi biaknak lakah a ummi lungthin ṭha a ngeimi hna kha a philh hna lo. Annih kha biatak a cawnpiak hnanak thawng in a hmaan lomi biaknak in chuah awkah a bawmh hna.—Mikah 4:2, 5 rel.
3. Lungthin ṭha a ngeimi hna nih zeidah an tuah awk a si?
A hmaanmi biaknak nih mi kha an lung a rualter hna
A hmaanmi le a ṭhami thil a duhmi hna kha Jehovah nih an zawn a ruah hna. Cucaah a hmaan lomi biaknak kha chuahtak awkah a forh hna. Pathian a dawmi hna nih Pathian lungton awkah an nunning thlen an duh.—Biathlam 18:4 rel.
Kumzabu pakhatnak ah, lungthin ṭha a ngeimi hna nih lamkaltu pawl chimmi thawngṭha kha an theih tikah lunglawm tein an cohlan i nunning thar in nun kha an cawn. Cuticun an nunning cu sullam a ngei i ruahchannak an ngeih caah an i nuam. Thawngṭha kha an cohlan i an nunnak ah Jehovah kha pakhatnak ah an chiah caah tuchan kan caah zohchunhawk ṭha an si.—1 Thesalon 1:8, 9; 2:13 rel.
Jehovah nih a hmaan lomi biaknak a chuahtakmi hna kha amah chungkhar ah i tel ve awkah a sawm hna. Mah sawmnak kha na cohlan ahcun, Pathian hawikom sinak, dawtnak in a khatmi Jehovah chungkhar sinak le zungzal nunnak na hmuh lai.—Marka 10:29, 30; 2 Korin 6:17, 18 rel.
4. Pathian nih vawleicung mi vialte an i lawmh nakhnga zeidah a tuah lai?
A rauhhlan ah a hmaan lomi biaknak biaceih a si cang lai ti cu thawngṭha a si. Mi cu hremnak an tonmi in an luat cang lai. A hmaan lomi biaknak nih mi kha zeitikhmanh ah a hleng kho ti hna lai lo i a ṭhen kho ti hna lai lo. Mi vialte nih a hmaanmi Pathian kha lungrual tein an biakṭi cang lai.—Biathlam 18:20, 21; 21:3, 4 rel.
