Ṭhen 4
Jesuh Khrih Cu Ahodah A Si?
1. Jesuh nunnak cu zeitindah aa thawk?
Jesuh cu zei a ziaza nih dah naih a fawimi a siter?—MATTHAI 11:29; MARKA 10:13-16.
Aho minung he hmanh i lo loin Jesuh cu vawlei ah hrin a si hlan ah vancung ah thlarau pum in a rak nung. (Johan 8:23) Anih cu Pathian nih a ser hmasa bikmi a si i a dang thil vialte sernak ah Pathian kha a bawmh. Amah lawng hi Jehovah nih dairek in a sermi a si caah Pathian “Fapa ngeihchunte” tiah auh cu aa tlak. (Johan 1:14) Jesuh cu Pathian Bia Chimtu a si caah “Bia” ti zong in auh a si.—Phungthlukbia 8:22, 23, 30; Kolose 1:15, 16 rel.
2. Jesuh cu zeicah vawlei ah a rat?
Pathian nih a Fapa nunnak kha Judah ngaknu Mari nauinn ah a ṭhial i vawlei ah a thlah. Cucaah Jesuh cu minung pa a ngei lo. (Luka 1:30-35) Jesuh cu (1) Pathian kong biatak cawnpiak awkah, (2) harnak ton caan hmanhah Pathian duhnak zeitindah tuah awk a si timi kong ah zohchunhawk ṭha chiah awkah le (3) a tlingmi a nunnak kha “tlanhnak” man ca i pek awkah vawlei ah a ra.—Matthai 20:28 rel.
3. Zeicah tlanh kan herh?
Tlanhnak man timi cu mi pakhat kha thihnak in chanh awkah pekmi a man kha a si. (Exodus 21:29, 30) Pathian nih minung hi tar ding le thi ding in a kan ser lo. Mah cu zeitindah kan hngalh khawh? Pathian nih hmasa bik mipa Adam kha “sualnak” na tuah ahcun na thi lai tiah a rak ti. Cucaah Adam cu sualnak a tuah lo ahcun zeitikhmanh ah a thi lai lo. (Genesis 2:16, 17; 5:5) Baibal nih a chim bantukin thihnak cu Adam ruangah vawleicung ah “a tlung.” Adam nih a tefa vialte kha sualnak le mah ruang i a chuakmi thihnak kha a roh hna. Cucaah Adam sinin kan comi ro, thihnak in luat awkah tlanh kan herh.—Rom 5:12; 6:23 rel.
Thihnak in kan luat khawh nakhnga aho nih dah tlanhnak man a pek khawh lai? Kan thih tikah kanmah kan sualnak man lawng kan pek khawh. A tling lomi minung nih midang sualnak caah tlanhnak man pek khawh a si lo.—Salm 49:7-9 rel.
4. Jesuh cu zeicah a thih?
Kanmah he i lo loin Jesuh cu a tlingmi a si. Sualnak a tuah bal lo caah amah sualnak ruangah a thih a herh lo. Anih cu midang sualnak ruangah a thihmi a si. Pathian nih a Fapa kha kanmah ca thih awkah a thlahnak thawng in a dawtnak zeitluk in dah a ngan kha a langhter. Jesuh zong nih a Pa nawl a ngaih i kan sualnak caah a nunnak a peknak thawng in dawtnak a langhter ve.—Johan 3:16; Rom 5:18, 19 rel.
Zeicah Jesuh A Thih? timi video kha zoh
5. Jesuh cu atu ah zeidah a tuah?
Jesuh nih vawleicung a um lioah mizaw a damter hna, mithi a thawhter hna i harnak a tongmi kha a bawmh hna. Cuticun nawlngaimi vialte caah hmailei ah a tuah laimi kha a langhter chung. (Matthai 15:30, 31; Johan 5:28) Jesuh cu a thih hnuah Pathian nih thlarau pum in a thawhter ṭhan. (1 Piter 3:18) Mah hnuah Pathian orhlei kam ah a ṭhu i Pathian nih vawlei dihlak uknak nawl a pek lai caan kha a hngak. (Hebru 10:12, 13) Atu ah Jesuh cu van ah Siangpahrang a si cang i mah kong thawngṭha kha a zultu hna nih vawleicung pumpi ah an chim.—Daniel 7:13, 14; Matthai 24:14 rel.
A rauhhlan ah Jesuh nih harnak le harnak a chuahtertu vialte hna kha hrawh awkah Siangpahrang pakhat in a nawlngeihnak a hman cang lai. A nawl an ngaihnak in an zumhnak a langhtermi vialte hna cu vawlei paradis ah an um cang lai.—Salm 37:9-11 rel.
