Ṭhen 6
Mithi Caah Zei Ruahchannak Dah A Um?
1. Mithi caah zei thawngṭha dah a um?
Jesuh cu Jerusalem pawng i a ummi Bethani khua a phanh tikah a hawi Lazaruh cu a thihnak Nili a si cang. Jesuh cu Lazaruh farle, Mari le Martha he thlan ah an kal. Tlawmpal ah cuka ah mi tampi an ra. Jesuh nih Lazaruh a thawhter ṭhan tikah Mari le Martha, zeitlukin dah an i lawmh lai khi na mitthlam ah na cuanter kho maw?—Johan 11:21-24, 38-44 rel.
Martha nih mithi hna ca i thawngṭha kha a rak hngalhcia cang. Jehovah nih annih cu vawlei ah a thawhter ṭhan hna lai ti kha a hngalh.—Job 14:14, 15 rel.
2. Kan thih tikah zei ah dah kan can?
Pathian nih Adam kha “leidip na si i leidip ah na kir ṭhan lai” tiah a ti.—GENESIS 3:19.
Minung cu leidip in sermi kan si. (Genesis 2:7; 3:19) Kan pum chungah a thi kho lomi thlarau a um lo. Kan pum a thih tikah kan pum cheubang zeihmanh a nung ti lo. Kan thih tikah kan thluak zong a thi i ruahnak kan ngei ti lo. Mithi cu zeihmanh an hngalh lo caah Lazaruh zong a thih lio kong he aa tlaiin chim awk zeihmanh a ngei lo.—Salm 146:4; Phungchimtu 9:5, 6, 10 rel.
Pathian nih mi kha an thih hnuah mei in a hrem hna maw? Baibal nih mithi nih cun zeihmanh an hngal lo a ti caah hellmei cawnpiaknak cu Pathian thang a chiattermi, a hmaan lomi cawnpiaknak a si. Mei in minung hrem cu Pathian nih a fihmi thil a si.—Jeremiah 7:31 rel.
Kan Thih Tikah Zei Ah Dah Kan Can? timi video kha zoh
3. Mithi nih an kan chawn kho maw?
Mithi cu bia an chim kho lo i a theih zong an thei kho lo. (Salm 115:17) Asinain a ṭhalomi vancungmi cheukhat nih mithi bantuk ah i canter in mi kha an chawnh men hna lai. (Judas 6) Jehovah nih mithi he i chawnh kha a kan thlauh.—Deuteronomi 18:10, 11 rel.
4. Ahote dah a tho ṭhan lai?
A thi cangmi minung nuai tampi cu vawlei ah an tho ṭhan lai. Ṭhatlonak a tuahmi le Pathian a hngal lomi cheukhat hmanh an tho ṭhan lai.—Luka 23:43; Lamkaltu 24:15 rel.
A thoṭhanmi hna cu Pathian kong biatak cawnnak caanṭha le Jesuh nawl an ngaihnak thawng in an zumhnak langhternak caanṭha an hmu lai. (Biathlam 20:11-13) Ṭhatnak an tuah ahcun vawlei ah zungzal in an nung kho lai.—Johan 5:28, 29 rel.
5. Thawhṭhannak nih Jehovah kong zeidah a kan hngalhter?
Pathian nih a Fapa kha minung ca i thih awkah a thlahnak thawng in mithi caah ruahchannak a umter. Cucaah thawhṭhannak nih Jehovah dawtnak le a velngeihnak kha a kan hngalhter. A thimi an thawhṭhan tikah ahodah hmuh na duh bik?—Johan 3:16; Rom 6:23 rel.
