Pathian nih minung hi vawleicung ah nuam tein nung hna seh ti a kan duh. Minung kha a kan dawt caah vawlei le zeizong vialte hi a sermi a si. A rauhhlan ah nuam tein kan nun khawh nakhnga a kan tuahpiak cang lai. Harnak a chuahtermi thil in a kan khamh cang lai.​—Jeremiah 29:11 rel.

Zaangennak, zawtnak le thihnak hi minung cozah nih an hlo kho lo. Asinain thawngṭha a um. A rauhhlan ah Pathian nih minung cozah kha amah cozah in a airolh cang lai. Mah cozah tang ah a ummi hna cu daihnak le damnak an hmu lai.​—Isaiah 25:8; 33:24; Daniel 2:​44 rel.

Pathian nih vawleicung in miṭhalo vialte a hloh dih hna hnu lawngah harnak hi a dong lai. (Zefaniah 2:3) Mah cu zeitikah dah a si lai? Baibal nih atu ah minung nih kan tonmi harnak kong hi a chimchung. Hi vawlei thil umtuning nih Pathian biaceih caan cu a nai tuk cang ti a langhter.​—2 Timote 3:​1-5 rel.

Pathian kong kha Baibal ah kan hlathlai awk a si. Baibal cu dawtnak a ngeimi pale sinin hmuhmi cakuat he aa lo. Baibal nih atu ah zeitindah nuamhnak hmuh khawh a si ti le hmailei ah zungzal nunnak zeitindah hmuh khawh a si ti kha a kan chimh. Atu bantukin Baibal kong na hlathlaimi hi mi cheukhat nih an duh men lai lo. Asinain hmailei ah hmuh laimi a nuammi nunnak kong cawnnak kha midang ruang ah ngol awk a si lo.​—Phungthlukbia 29:⁠25; Biathlam 14:​6, 7 rel.