Ṭhen 8
Zeicah Pathian Nih Ṭhatlonak Le Harnak Hi Umnak Nawl A Awnh?
1. Ṭhatlonak zeitindah aa thawk?
Minung uknak nih minung tonmi harnak kha an hlo kho lo ti langhter awkah Pathian nih caan a za in a pek hna
Satan nih a hmasa bik lih a rak chim lio in vawleicung ah ṭhatlonak cu a hung um. Satan cu a hramthawk ahcun a tlingmi vancungmi a rak si nain “biatak kha zeitikhmanh ah a ṭanh bal lo.” (Johan 8:44) Pathian lawng nih a hmuh awk a simi, biakmi sinak kha a duh chin lengmang. Cucaah Evi kha Pathian bia ngaih loin amah bia tu ngaih awkah a lem. Adam zong nih Evi bantukin Pathian bia a rak ngai ve lo. Mah nih harnak le thihnak a chuahter.—Genesis 3:1-6, 19 rel.
Satan nih Evi kha Pathian bia ngaih lo awk a rak forh cu Pathian i uknak nawl a ngeihmi kha a doh a si. Minung tampi nih Satan bantukin Pathian kha an Uktu in an cohlang lo. Cuticun Satan cu “hi vawlei uktupa” a hung si.—Johan 14:30; 1 Johan 5:19 rel.
2. Pathian thil sermi cu a chambaunak a um maw?
Pathian thil sermi paoh cu a tling dih. A sermi minung le vancungmi nih a bia kha tling tein an ngaih khawh. (Deuteronomi 32:4, 5) Pathian nih a ṭhami thil maw kan tuah lai, a ṭhalomi thil dah ti kha zalong tein thimnak nawl a kan pek. Mah zalonnak nih Pathian kan dawt langhternak caanṭha a kan pek.—Jeim 1:13-15; 1 Johan 5:3 rel.
3. Pathian nih zeicah atu tiang sifah harnak hi umnak nawl a awnh?
Jehovah nih cungnung bik a sinak a dotu hna kha hrawh colh loin zeicah atu tiang a zuah hna? Pathian tel loin mahte in i uk khawh a si lo ti kha langhter a duh caah a si. (Phungchimtu 7:29; 8:9) Cutin a si taktak kha kum 6,000 chung i minung tuanbia nih a langhter. Minung uknak nih raltuknak, zaang-ennak, dinlonak le zawtfahnak kha an hlo kho lo.—Jeremiah 10:23; Rom 9:17 rel.
Minung uknak he i lo loin Pathian uknak nih cun a uknak a cohlangmi hna kha ṭhatnak tampi a pek hna lai. (Isaiah 48:17, 18) A rauhhlan ah, Jehovah nih minung uknak vialte kha a hrawh dih cang lai. Pathian uknak a cohlangmi lawng vawleicung ah an um cang lai.—Isaiah 11:9; Daniel 2:44 rel.
Zeicah Pathian Nih Sifah Harnak Hi Umnak Nawl A Awnh? timi video kha zoh
4. Pathian lungsaunak nih zei tuahnak caanṭha dah a kan pek?
Minung nih Jehovah an biak cu anmah ṭhatnak caah pei a si ko cu tiah Satan nih a ti. Mah bia a hmaan lo kha langhter na duh maw? Na duh ko lai. Pathian lungsaunak nih amah uknak maw kan duh asiloah minung uknak dah ti langhternak caanṭha a kan pek. Zeidah kan duh ti kha kan nunning in kan langhter.—Job 1:8-12; Phungthlukbia 27:11 rel.
5. Pathian Uknak kan duh kha zeitindah kan langhter khawh?
Kan i thimmi nih Pathian uknak kan duh le duh lo a langhter
Baibal ah hram aa bunhmi, a hmaanmi biaknak kong cawnnak le mah biaknak ah i telnak thawng in Pathian uknak kan duh kha kan langhter khawh. (Johan 4:23) Jesuh bantukin nainganzi le raltuknak ah kan i tel lonak thawngin Satan uknak kan duh lo kha kan langhter khawh.—Johan 17:14 rel.
Satan nih a nawlngeihnak hmang in ziaza rawhralnak le ṭih a nungmi tuahsernak kha a ṭhami a lawhter. Mah kha kan tuah lo tikah kan hawile le kan rualchan cheukhat nih an kan nihsawh asiloah an kan doh men lai. (1 Piter 4:3, 4) Cucaah biakhiahnak kan tuah a hau. Pathian a dawmi hna he kan i kom lai maw? Pathian fimnak le dawtnak aa telmi a nawlbia kha kan zul lai maw? Cutin kan tuah ahcun harnak an ton tikah ahohmanh nih Pathian bia an ngai lai lo timi Satan bia, a hmaan lo kha kan langhter khawh lai.—1 Korin 6:9, 10; 15:33 rel.
Pathian nih minung kha a dawt hna. Cucaah ṭhatlonak le harnak hi a hrawh lai ti kha kan zumh khawh. An zumhnak kha an tuahsernak in a langhtermi hna cu vawleicung ah zungzal in an nung lai.—Johan 3:16 rel.
